Nga Nzambi Wasoba Ngindu Zandi?

NKAND’A Nzambi uvovanga mu kuma kia Nzambi vo: “Kena ya soba-soba ko, ngatu tombe kia nzietoka.” Muna kumika e mvovo miami, Nzambi yandi kibeni wavova vo: “Mono Yave kisoboka ko.” (Yakobo 1:17; Malaki 3:⁠6) Ekw’e nswaswani ina vana vena Yave wa Nzambi y’awana bena vo diampasi mu kubayangidika ye ke bafwana bundwa vuvu ko, e kuma kadi, ntangwa zawonso besobanga ngindu zau!

Atangi akaka a Nkand’a Nzambi bekiyuvulanga kana vo Nzambi wasoba e ngindu zandi. Kasiki’owu, vakala ye ntangwa ina Yave wa Nzambi kavana Akristu e nkuma wa vanga masivi, kansi owau kevanganga wo diaka ko. Kuna nz’ankulu, Nzambi wayambulwila e fu kia sompa akento ayingi, kansi owau ke tondanga kio diaka ko. Muna Nsiku a Mose, Yave wasikidisa vo nkangu andi walundang’e Lumbu kia Vundu, kansi owau ke vavanga wo diaka ko. Nga mambu mama ke mesonganga ko vo Nzambi wasoba?

Diantete, tulenda kala ye ziku vo Nzambi ke sobanga nsiku miandi mia zola ye unsongi ko. ‘Ekani diandi dia mvu ya mvu mpe’ dia twasa nsambu kwa wantu muna Kintinu kiandi, ke diasoba ko. (Efeso 3:​11) Kansi kadi, nze una olenda sobela ngindu zaku za mpila obadikilanga muntu okukendelekanga, Yave mpe osobanga ngindu zandi mu kuma kia diambu edi ye diakaka.

Nzambi wasobanga mpe malongi mandi kwa nkangu andi, muna nsungi ye tezo kia nsatu zau. Ediadi ke difwete kutusivikisa ko. Badika dina kalenda vanga o nsongi a nzila  kele vo omwene vonza kuna ntwala. Olenda lukisa ana kefilanga mu soba e nzila. Ediadi ke disongele ko vo e ngindu zandi za kubanata kuna bazolele kwenda zisobele. Owau, yambula twabadika mambu matatu mana wantu bebadikilanga vo ma mpimpita.

Ekuma Masivi Masukila?

Ekuma Nzambi kavanina nkuma kwa Akristu akaka muna tandu kiantete wa vanga masivi? Zaya wo vo vava Isaele bakala se nkangu wasolwa kwa Nzambi, Nzambi wavanganga masivi mu songa vo wakalanga yau. Muna Mose, Nzambi wasonga masivi mandi muna kôla Aneyisaele muna Engipito yo kubafila muna makanga vava bayendanga kuna Nsi a Nsilu. Diankenda kikilu vo, ntangwa ke ntangwa, Aneyisaele ke babundanga Yave vuvu ko. Vava Yave kabembola Isaele yo sikidisa e nkutakani ya Akristu, wavana nkuma kwa ntumwa ye akaka mu vanga masivi. Kasikil’owu, Petelo wa ntumwa ye Yoane, bawuka muntu wakala ye kimbevo kia malu tuka kawutukila, vo i Paulu, wafula etoko dimosi diafwa. (Mavangu 3:​2-8; 20:​9-​11) Masivi bavanga masadisa akaka mu kwikila muna Kristu. Ekuma masivi mama masukila?

Paulu wa ntumwa wasonga ekuma, muna yika kingana kimosi. Wavova vo: “Vava yakala kimwana-mwana, yavova mpov’a kimwana-mwana, yakala ye ntona za kimwana-mwana, yabadika mbandik’a kimwana-mwana: kansi wau yakala se mbuta, yalembw’oma ma kimwana-mwana.” (1 Korinto 13:​11) E mpila in’o se kekadilanga ye mwan’andi akete yaswaswana ye mpila kekadilanga ye mwan’andi ambuta. Diau adimosi mpe Yave wasoba e mpila ya kakadila ye nkutakani ya Kikristu vava ke bakala diaka “kimwana-mwana” ko. Paulu wa ntumwa wavova vo tukau twatu tw’esivi nze i vova ndinga za kinzenza yo sakula, ‘suka twadi suka.’​—⁠1 Korinto 13:⁠8.

Evangu dia Sompa Akento Ayingi Ekuma Diayambulwilwa?

Yesu wavova vo Nzambi wasikidisa longo vava kavova kwa yakala yo nkento antete vo: “O’yakala kafwete yambwil’o s’andi yo ngw’andi, katatidil’o nkaz’andi; yau ewole bakala se nitu mosi.” (Matai 19:⁠5) O longo lufwete kala kintwadi kia wantu wole eki ke kifwete vambaneswa ko. Kansi, vava Nzambi kasikidisa Isaele se zula yo kubavana Nsiku, evangu dia sompa akento ayingi diasayana. Kana una vo ke Nzambi ko wayantika evangu diadi ngatu kasakesa wantu mu vanga wo, wasikidisa una bafwete kadilanga. Vava e nkutakani ya Kikristu yasikidiswa, e Diambu dia Nzambi diasima kikilu evangu diadi.​—⁠1 Timoteo 3:⁠2.

Yave wa Nzambi wayambulwilanga mavangu makaka yavana kiafwanang’e ntangwa mu singika mo. (Roma 9:​22-​24) Yesu wasonga vo Yave wayambulwila evangu diadi diambi mu fikolo mu kuma kia “bala kwa ntima” mia Aneyisaele.​—⁠Matai 19:8; Ngana 4:⁠18.

Ekuma Nsiku wa Lunda Lumbu kia Vundu Wakadila wa Kolo Kiandwelo?

Vava Nzambi kakôla Aneyisaele muna Engipito, wasikidisa vo balundanga Lumbu kia  Vundu. I bosi, o nkanikinu wau wakoteswa muna Nsiku kavana kwa nkangu. (Luvaiku 16:​22-30; 20:​8-​10) Paulu wa ntumwa wavova vo, Yesu wayivana se kimenga yo ‘fokola Nsiku a nkanikinu mina muna nkoki’ yo “vunzun’e sono kia nkoki.” (Efeso 2:15; Kolosai 2:​14) O lunda e Lumbu kia Vundu, umosi muna nsiku ‘wafokolwa’ yo ‘vunzunwa.’ Muna kuma kia nsiku wau, tutanganga muna Nkand’a Nzambi vo: “Ke vakadi on’okunufundila muna madia ko, yovo nua, yovo mu diambu dia nkungi, ovo nzangamu a ngonde, ngatu lumbu kia vundu.” (Kolosai 2:​16) Ekuma Nzambi kavanina o Nsiku, kumosi ye nsiku wa Lumbu kia Vundu va fulu kiantete?

Paulu wa ntumwa wasoneka vo: “O nsiku i nlongi eto a kutufila kwa Kristu.” Wakudikila diaka vo: “Kansi wau kiayiz’o lukwikilu, ke tuna diaka muna wisa kia nlongi ko.” (Ngalatia 3:​24, 25) Vana fulu kia soba e ngindu zandi, Nzambi wasadila e Lumbu kia Vundu nze nsiku wa kolo kiandwelo, mu longa o nkangu vo bafwete vaulanga e ntangwa ya badika mambu ma mwanda. Kana una vo, o nsiku wa Lumbu kia Vundu wa kolo kiandwelo wakala, wasonganga e lumbu kina wantu bewukwa muna nitu ye muna mwanda.​—⁠Ayibere 4:10; Lusengomono 21:​1-4.

Nzambi Azola Wafwanwa Bundw’e Vuvu

E nona ya Nkand’a Nzambi tuyikidi va ntandu yisonganga vo Yave wa Nzambi ovananga luludiku ye malongi muna ntangwa zaswaswana. Kansi ediadi ke disongele ko vo wasoba e ngindu zandi. Kana una vo wasobanga maka mambu mun’owu wa nsatu za nkangu andi ye kolo bazinganga, wavanganga wo muna wete diau. Idiau mpe kevanganga mu lumbu yeto.

Wau vo Yave kasoba nsiku miandi ko, i tuzayilanga dina tufwete vanga muna kunyangidika. Vana ntandu, tufwete kala ye vuvu vo mawonso Nzambi kasila nsilu mesinga lungana. Yave wavova vo: “Vanga mvanga zolela yame yawonso. . . nkanini, mvanga dio mpe.”​—⁠Yesaya 46:​10, 11.

[Babu ina muna lukayalwa 19]

Nzambi ke sobanga nsiku miandi mia zola ye unsongi ko

[Babu ina muna lukaya lwa 20]

Paulu wavova vo tukau tw’esivi ‘suka twadi suka’

[Babu ina muna lukaya lwa 21]

O longo lufwete kala kintwadi kia wantu wole eki ke kifwete vambaneswa ko