O Wutuluka nga i Nzengo Kalenda Baka o Muntu Yandi Kibeni?
O Wutuluka nga i Nzengo Kalenda Baka o Muntu Yandi Kibeni?
NANI owutululanga o muntu? Vava bevovesanga nkangu au wakituka Akristu awutuluka, alongi a mabundu mvovo mia Yesu besadilanga: “Nuwutuluk’aka.” (Yoane 3:7) Alongi awaya besadilanga e mvovo miami nze nsiku. Belonganga vo konso nkwikidi kafwete lemvokela Yesu yo vava wutuluka. Muna ngindu zau, o wutuluka i nzengo kalenda baka muntu yandi kibeni. Nga ngindu zazi ngwizani zina ye dina kavova Yesu kwa Nikodemo?
Avo otomene tanga e mvovo mia Yesu, obakula vo Yesu kalonga ko vo o wutuluka yovo lembi wutuluka i nzengo kalenda baka muntu yandi kibeni. Ekuma? E mvovo wa Kingerekia wasekolwa vo “wutuluka” ulenda sekolwa mpe vo “wutululwa kuna ntandu.” * Muna nsekola yayi, o wutululwa “kuna ntandu” disonganga vo wutululwa “kun’ezulu” yovo “kw’Ese.” (Yoane 19:11; Yakobo 1:17) Kieleka, Nzambi owutululanga o muntu.—1 Yoane 3:9.
Avo tusungamene e mvovo wau “kuna ntandu,” ka dikala mpasi ko mu bakula vo o muntu kalendi kiwutulula ko yandi kibeni. Yindula e ngutuk’aku. Nga mu luzolo lwa ngeye kibeni wawutukil’e? Ve kikilu! Mu luzolo lwa mase maku wawutukila. Diau adimosi, tulenda wutuluka avo Nzambi kaka w’Es’eto ezulu ozolele wo. (Yoane 1:13) Muna kuma kiaki, Petelo wa ntumwa wavova vo: ‘Okembelwa o Nzambi w’Es’andi a Mfumu eto Yesu Kristu, ona wina vo, muna nkenda zandi zayingi, watuwutulwila muna vuvu kiamoyo, muna lufuluku lua Yesu Kristu, muna mafwa.’—1 Petelo 1:3.
O Wutuluka nga Nsiku?
Akaka balenda yuvula, ‘wau vo o wutuluka ka luzolo lwa muntu yandi kibeni ko, ekuma Yesu kakanikina vo: “Nuwutuluk’aka”?’ E kiuvu kiaki mfunu kina. Avo Yesu nsiku kasia, tulenda vova vo diambu katuma dina katulendi vanga ko. Kalendi wo vanga ko. Ozevo, aweyi tufwete bakulwila e mvovo “nuwutuluk’aka”?
Avo tutomene fimpa e mvovo wau muna ndinga Kingerekia, tubakula vo ka nsiku ko. Kansi, ziku kia diambu. Muna mvovo miakaka, vava Yesu kavova vo “nuwutuluk’aka,” ziku kia diambu kasonga, kavana nsiku ko. Wavova vo: “Diamfunu nwawutululwa kuna ntandu.”—Yoane 3:7, nsekola ya Modern Young’s Literal Translation.
Kasikil’owu, tala e nona kisonganga nswaswani a nsiku ye ziku kia diambu. Yindula mbanza ina ye sikola zayingi. E sikola imosi yavaulwa mu kuma kia wana bawutukila muna mbanza yayina. Lumbu kimosi, nleke anzenza walomba kwa mfumu a sikola vo: “Nzolele tangila mu sikol’aku.” Mfumu a sikola wamvovesa vo, “muna tangila mu sikola yayi, ofwete kala mungutukil’a mbanza yayi.” E mvovo mia mfumu a sikola ka nsiku ko. Kavovesa nleke ko vo “Kituka mungutukil’a mbanza yayi!” Kansi, edi kamvovesa vo, “muna tangila mu sikola yayi, kafwete kala mungutukil’a mbanza.” O mfumu a sikola ziku kia diambu kasongele yovo dina divavwanga muna tangila mu sikola yayi. Diau adimosi, vava Yesu kavova vo: “Nuwutuluk’aka,” ziku kia diambu kasonga, i sia vo dina divavwanga mu “kota muna kintinu kia Nzambi.”
Wau vo Kintinu kia Nzambi ngwizani kina ye diambu dia wutuluka, tala kiuvu kiamfunu divaikisanga: Nkia kuma kifwete wutulukilwa? Ozaya e mvutu za kiuvu kiaki i nsabi muna toma bakula e nsas’a wutuluka.
[Mvovo Vana Yand’a lukaya]
^ tini. 3 Nsekola zayingi za Nkand’a Nzambi zisekolanga sono kia Yoane 3:3 mu mpila yayi. Kasikil’owu, e nsekola ya Literal Translation of the Bible ivovanga vo: “Avo muntu kawutulwilu ko kuna ntandu, kalendi mona kintinu kia Nzambi ko.”
[Foto ina muna lukaya lwa 6]
Nkia diambu dia ngutuk’eto dina ngwizani ye wutuluka?