O Wutuluka nga i Nzil’a Luvuluku?
O Wutuluka nga i Nzil’a Luvuluku?
NKIA mvutu olenda vana mu kiuvu kiaki: “Nga wawutuluka kala?” Ndonga muna Kikristu kia Kimpangila mu nza yawonso bevutulanga vo, “elo!” Bekwikilanga vo awana kaka bewutulukanga i Akristu akieleka, ye luwutuluku i nzil’a luvuluku. E ngindu zau ngwizani zina ye z’afidi a mabundu nze Robert C. Sproul wa mfimpi a mambu ma Nzambi ona wasoneka vo: “Avo muntu kawutulukidi ko, . . . ke Nkristu ko.”
Nga u mosi mun’awana bekwikilanga vo o wutuluka i nzil’a luvuluzu? Avo i wau, nanga ozola sadisa yitu ye akundi aku kimana basolola e nzila yayi yo kangalela mo. Kansi, muna vanga wo bafwete zaya nswaswani ya muntu wawutuluka y’ona walembi wutuluka. Aweyi olenda kubasongela e nsasa ya wutuluka?
Ndonga bekwikilanga vo o mvovo “wutuluka” uyikanga muntu osianga nsilu wa sadila Nzambi yo Kristu. Tuka kiakina ovangulukanga, vana fulu kia kala wafwa muna mwanda, okitukana se wamoyo. Dicionário dia Merriam-Webster’s Collegiate Dictionary—Eleventh Edition disasilanga vo: O wutuluka “i ntangwa in’o muntu kekitukanga se Nkristu, ovangulukidi yovo osidi umbangi wa lukwikilu lwandi musungula vava kewokesanga salu kiandi muna dibundu.”
Ng’olenda sivika mu zaya vo Nkand’a Nzambi ke diau ko kelonganga? Ng’ozolele zaya dina kieleka kelonganga o Nkand’a Nzambi mu kuma kia wutuluka? Olenda baka nluta muna toma badika e diambu diadi. Ekuma? E kuma kadi o zaya e nsasa ya wutuluka dilenda soba e mpila osadilanga e zingu kiaku ye vuvu kiaku kia kusentu.
O Nkand’a Nzambi Adieyi Kelonganga?
O mvovo wau “wutuluka,” wasonama muna Yoane 3:1-12, usonganga e moko kia Yesu ye mfumu a dibundu muna Yerusaleme. Lusansu lwalu lwa Nkand’a Nzambi lwasonama muna kunku kina muna lukaya lulende. Tulombele watanga kio ye sungididi kiawonso.
Muna moko kiaki, Yesu wayika mambu mayingi mu kuma kia “wutuluka.” * Kieleka, e moko kia Yesu kilenda kutusadisa mu vana mvutu za yuvu tanu yamfunu eyi ilende:
▪ O wutuluka nkia mfunu kwina?
▪ O wutuluka nga i nzengo kalenda baka o muntu yandi kibeni?
▪ O wutuluka adieyi i kani diandi?
▪ O wutuluka nkia mpila kuvangamenanga?
▪ O wutuluka nki’ekani kulungisanga?
Yambula twafimpa e yuvu yayi kimosi kimosi.
[Mvovo Vana Yand’a lukaya]
^ tini. 8 O mvovo wau “wutuluka” wasonama mpe muna 1 Petelo 1:3, 23. E mvovo wasadilwa mu sono yayi yau yole mu mvovo wa Kingerekia watuka uyikilwanga vo gen·na’o.
[Babu/ Foto ina muna lukaya lwa 4]
“Nuwutuluk’aka”
‘Vakala Mfarisi, nkumbu andi Nikodemo, wa nkuluntu a Ayuda: Andioyu kakwiza kwa Yesu o fuku, umvovese vo: E Nlongi, tuzeye wo vo nge i nlongi watuka kwa Nzambi: Kadi ke ven’on’olend’o vanga sinsu in’ovanga ko, nanga o Nzambi kakala yandi. O Yesu umvutwidi vo: Kieleka, kieleka, isamunwini vo, o muntu, ovo kalembi wutuluka, kalendi mona kintinu kia Nzambi ko. O Nikodemo umvovese vo, o muntu on’onunuvini, nkia ngutuluka kelend’o wutuluka? Lenda kwandi o kota nkota ina yezole muna vumu kia ngw’andi, kawutuk’e? O Yesu ovutwidi vo, kieleka, kieleka, isamunwini vo, o muntu, ovo kalembi wutwa kwa maza yo mwanda, kalendi kota muna kintinu kia Nzambi ko. Eki kiwutwa kwa nitu, nitu; eki kiwutwa kwa mwanda, mwanda. Kusalukwa ko wau ivovese vo, nuwutuluk’aka. E mpemo ivekomoka konso oku iyizolèle, o mazu mandi owidi, kansi kuna itukidi, kuzeye ko ko, ngatu kuna ikwenda: i una konso ona wawutwa kwa mwanda. O Nikodemo umvutwidi vo, nkia nkala mekala mambu mama? O Yesu umvutwidi vo: Ngeye i nlongi a Isaele, kuzeye mama ko e? Kieleka, kieleka, isamunwini vo, una tuzeye i tuvova, una tumwene i tusila umbangi; o umbangi weto wau ke nutambudi. Ovo inuvovese oma mansi, yeno ke nukwikidi, nkia nkwikila nukwikila, ovo ikunuvoves’oma mezulu?’—Yoane 3:1-12.