Adieyi Tulongokele mu Kuma kia Yesu

Mu Diambu dia Zingu kia esi nzo

Adieyi tufwete zaya mu kuma kia longo dikitulang’e zingu kia nzo se kiakiese?

Longo i kangwa kiavauka. Vava Yesu kayuvulwa kana vo muntu olenda kwandi vonda e longo, wavova vo: “Nga ke nwatanga wo ko, ovo, ona wabavanga kuna lubantiku eyakala yo nkento kabavang’e? ovovele mpe vo, muna kuma kiaki o’yakala kafwete yambwil’o s’andi yo ngw’andi, katatidil’o nkaz’andi; yau ewole bakala se nitu mosi. Ke bekala diaka nwole ko, se nitu mosi kaka. Dianu vo, kina kiayikakeswa kwa Nzambi, o muntu kavambanisa ko. . . . Inusamunwini vo, konso on’osindik’o nkaz’andi, ovo ke mu diambu dia zumba ko kasompa wakaka, zumba katele yandi.” (Matai 19:4-6, 9) Vava yakala yo nkento besadilanga elongi dia Yesu yo songa kwikizi muntu yo nkw’andi, awonso muna nzo bekalanga ye luvuvamu ye kiese.

Ekuma o zola muna Nzambi kukitulanga e zingu kia nzo se kiakiese?

Yesu wavova vo: “Zola Yave wa Nzambi aku yamuna nsi a ntim’aku yawonso, yo muna fulumwinu kiaku kiawonso, yo muna nyindu aku wawonso. I wau wuwu o nkanikinu anene, wantete mpe.” Aweyi i nkanikinu wanene una wezole? Yesu wavova vo: “Zola nkw’aku, [kumosi ye mfinangani zaku, ye yitu yaku] konso un’okuzolela.” (Matai 22:37-39) E nsabi muna kala ye zingu kia nzo ya kiese, i kala ye ngwizani yambote yo Nzambi, kadi zola muna yandi kukutufila mu zola muntu yo nkw’andi.

 O Yakala yo nkento aweyi balenda yangidikila muntu yo nkw’andi?

Akala beyangidikanga akazi au vava belandanga mbandu a Yesu. Wakivana se kimenga mu kuma kia zola kwandi kwa nkaz’andi una vo i nkutakani. (Efeso 5:25) Yesu wavova vo: “Mwan’a muntu, kayiz’asadilwa kwa selo ko, kasadila kaka.” (Matai 20:28) Yesu katuminanga awana bakala ku nsi a wisa kiandi ko ngatu kala yo ntim’ambâdi, kansi wabavuvikanga. (Matai 11:28) Diau adimosi mpe akala bafwete kadila ye wisa kiau kuna lembama kimana esi nzo awonso babaka nluta.

Akento mpe balenda baka nluta muna mbandu a Yesu. Nkand’a Nzambi uvovanga vo: “O ntu a Kristu, i Nzambi.” Uvovanga mpe vo: “O ntu a nkento, i’yakala.” (1 Korinto 11:3) Yesu kayimwenanga ko vo wakuluka o zitu wau vo Nzambi kasakalelanga. Wakala ye vumi wakieleka kuna kwa S’andi. Yesu wavova vo: “Mvangang’oma mekunyangidikanga.” (Yoane 8:29) Akento besakalelanga kintu kia akazi au muna zola yo zitisa Nzambi, mayingi bevanganga mu kitula zingu kia nzo zau se kiakiese.

Adieyi balenda longoka amase muna mpila Yesu kabadikilanga wana?

Yesu wavaulanga ntangwa yafwana mu mokena yo wana yo vwa ngindu zau o mfunu. O Nkand’a Nzambi uvovanga vo: “Yesu ubabokele, oku vo, nuyambula yingyana-ngyana iz’okungina.” (Luka 18:15, 16) Lumbu kimosi, wantu batumba aleke ana basonga lukwikilu lwau muna Yesu. Kansi, Yesu wabasanisina yo vovesa ana babatumba vo: “Nga ke nutangidi wo nkutu ko, ovo, muna nua mia nsedia ye ngyemo i kunkulwidi o lusanisinu e?”—Matai 21:15, 16.

O wana adieyi balenda longoka kwa Yesu?

Yesu wasisa mbandu ambote kwa wana bakala y’etima dia mambu ma mwanda. Vava kakala ye kimbuta kia mvu 12, wasololwa “muna tempelo, ovwende vana ven’alongi, kekubawanga, yo yuvula ngyuvu.” Nkia nluta diatwasa? “Awonso banwidi, basivikidi muna zayi wandi ye mvutu zandi.” (Luka 2:42, 46, 47) Elo, Yesu kayitundidikanga ko mu kuma kia zayi wandi. Kansi, wamfila mu zitisa mase mandi. Muna Nkand’a Nzambi tutanganga vo: “Ubatumamene.”—Luka 2:51.

Muna zaya diaka mambu makaka, tal’o nkanda, O Nkand’a Nzambi Adieyi Kieleka Kelonganga? * kapu kia 14

[Mvovo Vana Yand’a]