Mwand’avelela i Nkuma Ovwidi o Mfunu Muna Zingu Kiaku
Mwand’avelela i Nkuma Ovwidi o Mfunu Muna Zingu Kiaku
“KUNKUDI oko wina ko; kunkatula mwand’aku avelela ko.” (Nkunga 51:11) E kiaki i sambu kia Davidi wa ntinu vava kasumuka.
Davidi nkumbu miayingi kamona nkum’a mwand’avelela muna zingu kiandi. Vava kakala nleke, mwand’avelela wansadisa mu vonda Ngoleyate ona wakala ekesa tuka kileke kiandi. (1 Samuele 17:45-50) Davidi wavova vo: “O mwand’a Yave uvovele omu mono, e diambu diandi din’ova lubini.”—2 Samuele 23:2.
Yesu Kristu yandi kibeni wasonga e ziku kiaki vava kayika e nsal’a mwand’avelela muna zingu kia Davidi. Lumbu kimosi, Yesu wavova kwa Ayuda vo: “Oyandi Davidi kibeni kavovela muna mwand’avelela vo, o Yave ovovele kwa Mfumu ame vo, fong’oku koko kwame kwalunene, yavana nsi’atantu aku se nsikinwa tambi yaku.” (Maku 12:36; Nkunga 110:1) Yesu wazaya wo vo vava Davidi kasoneka o nkunga wau, mwand’avelela wamfila. Nga mwand’a velela ulenda mpe kutusadisa o unu?
“Nulomba, Ozevo Nuvewa”
Nanga kulendi soneka nkand’a nkunga ko. Kansi, olenda nwana ye nkakalakani zampwena zilenda kumwesa wonga nze Ngoleyate. Muna bong’e nona, badika dina diabwila Isabel. * O nkanz’andi wambembola yo kwenda sompa mwan’andumba. Wansisila mfuka zayingi yo lembi kunsisila nzimbu za sansila wan’au wole amakento. Wavova vo: “Yakimwenanga nze mono ngyekwelo yo badikilwa nze má kiakondwa mfunu. Kansi tuka kansisila, imonanga vo mwand’avelela a Nzambi ukunkumikanga.”
Nga Isabel wavavanga vo Nzambi kamvana mwand’avelela mu mpila y’esivi? Ve kikilu, walombanga kwa Nzambi lumbu yawonso kamvana mwand’andi. Wazaya wo vo ngolo za Nzambi kavwanga o mfunu muna kunsadisa, kazizidila e zingu kia kusentu ye vuvu yo lenda lungisa e nsatu za wan’andi yo katula e ngindu za kibadikila vo kena mfunu ko. Wasungamena mpe e mvovo mia Yesu vo: “Nulomba, ozevo nuvewa; nuvava, ozevo nusolola; nudoda, ozevo nuziulwilwa.”—Matai 7:7.
Roberto mpe mwand’a Nzambi kavwanga o mfunu, kansi mu mpila yakaka. Fomo yangolo kanwanga. Mvu miole kanwana mu sunda e fu kiaki kiambi, kansi ye mpasi zayingi. Roberto wavova vo: “Avo yambwidi nua fomo yangolo mpasi omona. Kadi nitu yikwamanana lomba e lumbu yawonso.”
Roberto wakudikila vo: “Kansi, yabaka e nzengo za soba e zingu kiame, kadi mu mpila yayi kaka ndenda sadila Nzambi yo kunyangidika. “Yavavanga zadisa e ngindu zame ye nkanikinu mia Nkand’a Nzambi. Yasambanga kwa Nzambi ntangwa zawonso kampana nkuma yo lunda nkanikinu mia Nkand’a Nzambi muna zingu kiame. Kadi yazaya wo vo kilendi sikila mu ngolo za mono kibeni ko. Yamona una Yave kavanina e mvutu za sambu yame, musungula vava yakendalalanga. Ikwikilanga vo mwand’avelela a Nzambi ukunkumikanga; kondwa mwanda wau, kiadi lenda zizidila ko.”—Filipi 4:6-8.
Vumuka “Muna Mave nze Ngo-ezulu”
Nze Isabel ye Roberto, ulolo wa Mbangi za Yave bemonanga una mwand’avelela ukumikinanga zingu kiau. E ngolo za Yave zina vo i nkuma kasemena lekwa yawonso, olenda zo vwa, avo zolele. Nzambi una ye luzolo lwa kuvana mwand’andi, avo lombele wo. Kansi muna tambula mwanda wau, ofwete longoka e ludi mu kuma kiandi yo vanga luzolo lwandi.—Yesaya 55:6; Ayibere 11:6.
Muna lusadisu lwa mwand’avelela olenda tambula nkuma yo sadila Nzambi una ufwene yo zizidila konso mpasi zilenda kubwila muna zingu kiaku. Nkand’a Nzambi usongang’e ziku vo: “[Yave] ovan’efuka kwa munfwe mfune; kwa munkondwa nkuma i kewokesanga nkuma. . . . Awana betadila Yave benungunukina ngolo zau o va; bevumuka muna mave nze ngo-ezulu; belundumuka, ke mu yoya; bediata, ke mu fwa mfune.”—Yesaya 40:28-31.
[Mvovo Vana Yand’a lukaya]
^ tini. 6 E nkumbu zasobwa.
[Foto ina muna lukaya lwa 9]
UNA MWAND’AVELELA ULENDA KUTUSADISILA
[Foto ina muna lukaya lwa 9]
Mwand’avelela ulenda kusadisa mu sunda e ntonta ye fu yambi. Paulu wa ntumwa wavova vo: “O Nzambi i nkwa kwikizi, ona kekunuyambula nwatontwa ntontwa iviokele ina nulenda ko; kumosi ye ntontwa, oteta nzil’a nkutiswa, kimana nwalenda yo zizidila.”—1 Korinto 10:13.
[Foto ina muna lukaya lwa 9]
Mwand’avelela ulenda kusadisa mu yima e fu yambote. ‘E fu ya mbongo a mwanda, zola, kiese, luvuvamu, luzindalalu, walakazi, unsongi, kwikizi.’—Ngalatia 5:22, 23.
[Foto ina muna lukaya lwa 9]
Mwand’avelela ulenda kukumika mu zizidila mpasi. “Nlenda vanga mawonso muna ndion’okunkùmikanga.”—Filipi 4:13.
[Foto ina muna lukaya lwa 8]
‘Yasambanga kwa Nzambi ntangwa zawonso kampana nkuma. Kadi yazaya wo vo kilendi sikila mu ngolo za mono kibeni ko. Yamona una Yave kavanina e mvutu za sambu yame’
[Foto ina muna lukaya lwa 7]
Nzambi wasadila mwand’avelela mu sema o ntoto ye lekwa yakaka ina mu nsema. Ntozi a nkunga wavova vo: “E Yave, kuna kwa ulolo wa mavangu maku: Kuna ngangu wavangila mawonso: E nza yazala yo vwa kwaku. Ovaikisa mwand’aku, basemokene.”—Nkunga 104:24, 30; Etuku 1:2; Yobi 33:4.
Mwand’avelela wavumunwina wantu basoneka Nkand’a Nzambi. Paulu wa ntumwa wasoneka vo: “E sono yawonso yavumunwinwa kwa Nzambi.” (2 Timoteo 3:16) Fulumwinu kia Yave yovo mwand’andi, wafila asoneki a Nkand’a Nzambi mu samuna “e diambu dia Nzambi.”—1 Tesalonika 2:13.
Mwand’avelela wafwanisa selo ya Nzambi mu zayisa oma ma kusentu ye ziku kiawonso. Petelo wa ntumwa wasoneka vo: “Ke vena diambu diasakuka dia sono dina dia nsas’a ndioyo ovwidi dio ko. Okala vo kadi, ke diambu diasakukila muna luzolo lua muntu ko, kansi o wantu bavovela muna Nzambi, e mpoveswa bavoveswa kwa mwand’avelela.”—2 Petelo 1:20, 21; Yoele 2:28.
Mwand’avelela wasadisa Yesu ye selo yakaka ya kwikizi mu samuna e nsangu zambote za Kintinu kia Nzambi yo vanga masivi. Yesu wavova vo: “O mwand’a Yave wina yame, e kuma kadi, mazi kankusila yateleka nsangu zambote kw’asukami: Kakuntuma yasamun’e ngyambula kwa nkole, e mbweno kwa mpofo.”—Luka 4:18; Matai 12:28.