Nkia Mavwanga Besianga Wantu mu Kuma kia Mwand’avelela?

NKI i mwand’avelela? E kiuvu kiaki nga kiakete kwandi, kansi ke kilendakananga vaninwa mvutu zasikila ko. Papa Benedito XIV wavovesa nkangu a Austrália vo: “Ke dilendakana ko edi dia zaya emvimba e nsasa a Mwanda.”

Kieleka, wantu ngindu zaswaswana bekalanga zau mu kuma kia kiuvu eki: Nki i mwand’avelela? E mvutu zakaka bevananga i zazi:

• Mwand’avelela i muntu on’okalanga muna kati kwa nitu z’alongoki a Kristu.

• I ngangu za Nzambi yovo nsiku mia Nzambi muna mavangu.

• I nkal’a Nzambi muna salu kiandi ova nza.

• I muntu a ntatu muna Nzambi mu Ntatu.

Akieyi i kuma kia ngindu zazi zaswaswana? E ngindu zazi zayantika vava alongoki akaka a mambu ma Nzambi basoka elongi dia sia vo mwand’avelela, muntu, wafwanana yo Nzambi. Kansi Nkand’a Nzambi ye alandi antete a Kristu ke diau ko balonganga. O nkanda New Catholic Encyclopedia uvovanga vo: “E Luwawanu Luankulu ka lubadikilanga mwand’a Nzambi ko vo muntu . . . Mwand’a Nzambi, i ngolo za Nzambi kwandi.” Uvovanga mpe vo: “Sono yayingi ya Luwawanu Luampa iyikilanga mwand’a Nzambi nze má, ka nze muntu ko, ediadi dimonekanga musungula muna sono itezanesanga mwanda ye ngolo za Nzambi.”

Dialudi vo, diampasi kwa wantu mu badikila o nkuma nze muntu. Lufimpu lumosi lwavangama kuna Estados Unidos lwasonga vo wantu ayingi ke bekwikilanga ko vo mwand’avelela muntu. Nga balungidi kwau? Nga tufwete kwikila awana bevovanga vo “Mwand’avelela Muntu wavambana yo Se yo Mwana”?

Muna zaya e mvutu zasikila za kiuvu kiaki, diamfunu twafimpa mu Nkand’a Nzambi twazaya una Nkand’a Nzambi utoma kieseselanga o mwand’avelela. Paulu wa ntumwa wasoneka vo: “E sono yawonso yavumunwinwa kwa Nzambi, ina yo mfunu mpe muna longa, muna tumba.”​—⁠2 Timoteo 3:⁠16.

Ekuma ofwete zayila e ludi mu kuma kia mwand’avelela? E kuma kadi o zaya e ludi mu kuma kia diambu diadi, dilenda kusadisa mu vwa lusadisu lwa Nzambi. Nga vena ye ntangwa okuyimwenanga vo kwafwana ko mu vanga diambu mu ngolo za ngeye kibeni? Yesu wavovesa alongoki andi vo: “Nulomba, ozevo nuvewa . . . Ovo nuzeye o vana tukau twambote kwa wan’eno, o Tata kun’ezulu, nkia nduta kelut’o van’o mwand’avelela kw’awana bekunlomba.”​—⁠Luka 11:​9, 13.

Mun’elongi dilanda, Nkand’a Nzambi ukutusonga kana nki i mwand’avelela. Tuzaya mpe una nkuma wau ulenda kutusadisila muna zingu kieto.

[Foto ina muna lukaya lwa 3]

E Sono yikutuzayisanga etuku dia mwand’avelela