Yuvu Y’atangi Eto . . .

Nga Yesu i Mikaele wa Mbasi Ambuta?

▪ E mvutu za kiuvu kiaki, elo. O unu, wantu ayingi bazayakene mu nkumbu zole yovo zitatu. Diau adimosi mpe divangamanga mu kuma kia nkumbu ziyikwanga muna Nkand’a Nzambi. Muna bong’e nona, Yakobo wa nkulu oyikilwanga mpe vo Isaele. (Etuku 35:​10) Petelo wa ntumwa oyikilwanga mu nkumbu zayingi zaswaswana, Simone, Petelo, Kefa ye Simone Petelo. (Matai 10:2; 16:16; Yoane 1:42; Mavangu 15:​7, 14) Aweyi tulenda kwikila vo Mikaele i nkumbu yakaka ya Yesu? Badika e ziku kesonganga o Nkand’a Nzambi.

Nkand’a Nzambi nkumbu tanu uvovelanga Mikaele wa vangwa kia mwanda kia nkuma. E nkumbu yayi fulu tatu mpe yasonama muna nkand’a Daniele. Muna Daniele 10:​13, 21, tutanganga mu kuma kia mbasi ona watumwa kwa Yave wasadiswa kwa Mikaele, ona oyikilwanga vo “omosi vana ven’akuluntu a ntu” ye “nkuluntu eno.” I bosi muna Daniele 12:​1, tutanganga vo muna ntangwa mbaninu, “Mikaele otelama, wa nkuluntu anene, on’otelamene muna diambu dia wan’a nkangu aku.”

E nkumbu Mikaele iyikwanga diaka muna Lusengomono 12:7 vo: “Mikaele ye mbasi zandi” banwana e vita anene kun’ezulu baveta Nkadi Ampemba wa Satana ye mbasi zandi ova nza.

Zaya dio vo muna sono iyikilu ova ntandu, Mikaele osongwanga se mbasi a nkuma onwananga mu tanina nkangu a Nzambi ye osundanga Satana wa mbeni anene a Yave.

Muna Yuda tini kia 9 Mikaele oyikilwanga vo “mbasi ambuta.” E mvovo “mbuta” una ye nsasa vo “mfumu” ye mvovo “mbasi ambuta” ke usadilwanga ko mu Nkand’a Nzambi muna yika mbasi zayingi. E mvovo mbasi ambuta wasonama diaka muna 1 Tesalonika 4:​16, muna sono kiaki Paulu Yesu kayika ona wafulwa vava kavova vo: “O Mfumu [Yesu] yandi kibeni, i kulumuka tuka kun’ezulu, ye boko, ye nding’a mbasi ambuta, ye mpungi a Nzambi.” Muna kuma kiaki, Yesu Kristu yandi kibeni oyikilwanga mu sono kiaki se mbasi ambuta yovo mfumu a mbasi.

Adieyi tulenda vova mu kuma kia mana tulongokele? Tulenda vova vo Yesu Kristu i Mikaele wa mbasi ambuta. E nkumbu zazi zau zole zina ye nsasa, Mikaele (ina ye nsasa vo “Nani Wafwanana yo Nzambi?”) e nkumbu a Yesu (ina ye nsasa vo “Yave i Mvuluzi”) zisonganga fulu kiandi nze nkambami muna kimfumu kia Nzambi. Muna Filipi 2:9 tutanganga vo: “O Nzambi, kankundidikila kikilu, kakumvana nkumbu ina iviokele nkumbu zawonso.”

Diamfunu mu zaya vo Yesu wateka zinga una kawutukidi ko se muntu ova ntoto. Una Yesu kawutukidi ko, Maria wakingulwa kwa mbasi ona wanzayisa vo oyimita muna lusadisu lwa mwand’avelela ye owuta mwana yo kumvana nkumbu a Yesu. (Luka 1:​31) Ekolo kasalanga salu kiandi, nkumbu miayingi Yesu wavovelanga oma ma zingu kiandi kun’ezulu una kawutukidi ko nze muntu ova ntoto.​—⁠Yoane 3:13; 8:​23, 58.

Muna kuma kiaki, Mikaele wa mbasi ambuta i nkumbu a Yesu una kayizidi ko ova ntoto. Vava kafuluka yo vutuka kun’ezulu, Yesu watambula kiyekwa kiandi se Mikaele, mfumu a mbasi “muna nkembo a Nzambi w’Ese.”​—⁠Filipi 2:11.