Yesu Adieyi Kalonga mu Kuma kia Nzambi

“Ke ven’on’ozeye o Mwan’owu kenena ko, Ese kaka; ngatu Ese, owu kenena, Mwana kaka, konso ona mpe o Mwana kakanini kunsengomwena.”​—⁠LUKA 10:⁠22.

UNA KAKEDI ko nze muntu, Mwan’antete a Nzambi wateka zinga ulolo wa mvu yo S’andi, bakala ye ngwizani yambote. (Kolosai 1:​15) Muna kuma kiaki, Mwana watoma zaya e ngindu ye nzila za S’andi. Vava Mwana ndioyo kayiza ova ntoto nze muntu yo yikilwa vo Yesu, wakala ye luzolo lwa longa e ludi mu kuma kia S’andi. Tulenda longoka mayingi mu kuma kia Nzambi muna lemvokela mambu mana Mwana ndioyo kalonga.

Nkumbu a Nzambi E nkumbu a Nzambi, Yave, mfunu kikilu yakala kwa Yesu. Mwana ndioyo wanzolwa, wazola vo akaka bazaya yo sadila e nkumbu a S’andi. E nkumbu a Yesu ina ye nsasa vo “o Yave i Mvuluzi.” Muna fuku wansuka una kafwidi ko, Yesu wasamba kwa Yave vo: ‘Yabazayisi nkumbu aku.’ (Yoane 17:​26) Ke diasivi ko vo Yesu wasadila nkumbu a Nzambi yo zayisa yo kw’akaka. Kele vo ke wau ko, awana bawá Yesu aweyi badi bakulwila e ludi mu kuma kia Yave, lembi zaya e nkumbu Andi ye nsas’andi? *

Nzol’ampwena kasonga Nzambi Lumbu kimosi Yesu wasamba kwa Nzambi oku vo: “E Tata, . . . wanzola, vava ke kiasemeno nza ko.” (Yoane 17:​24) Wau vo wamona o zola kwa Nzambi kun’ezulu, Yesu vava kayiza ova ntoto, wasonga mpe o zola kwaku mu mpila zayingi.

Yesu wasonga vo e nzol’a Yave yampwena. Wavova vo: “Kadi muna nzola kazolele nza o Nzambi i kavanin’o Mwan’andi amosi, kimana konso on’okwikilanga muna yandi ke vila ko, moyo a mvu ya mvu kevwa.” (Yoane 3:​16) E mvovo wa Kingerekia wasekolwa vo “nza” ka uyikanga “ntoto” ko. Usadilwanga muna sono kiaki mu yika wantu awonso. Ozevo, e nzol’a Yave kwa wantu yampwena kikilu kadi wavana Mwan’andi on’osundidi o mfunu kimana wantu akwikizi bavevolwa muna ubundu w’esumu yo lufwa yo vwa e vuvu kia moyo a mvu ya mvu. Ka tulendi teza ko o lambuka yovo sina kwa zola kwaku kwampwena.​—⁠Roma 8:​38, 39.

Yesu wayika e ludi kilenda kutufiaulwisa vava kavova vo: Yave otoma zolanga konso muntu muna awana bekunsambilanga. Yesu walonga vo Yave una nze mvungudi ona obadikilanga konso ememe diandi diamfunu kikilu. (Matai 18:​12-​14) Yesu wavova vo ka vena ntietie ilenda bwa ko ova ntoto Yave ka lembi wo zaya. I bosi wakudikila vo: “Nsuki zeno za ntu nkutu, zavwa tangwa.” (Matai 10:​29-​31) Avo Yave ozayanga vava ntietie imosi ibwanga muna nzialwa, nkia tezo kemwenanga yo lunga-lunga konso muntu muna awana bekunsambilanga? Avo Yave otanganga e nsuki zeto, nga lenda vilakana e nsatu zeto, mpasi zeto ye mambu makaka malenda kututokanesa muna zingu?

S’eto Ezulu Nze una tumwene mun’elongi diviokele, Yesu i Mwana amosi kaka wa Nzambi. Ke diasivi ko vo, Mwana ndioyo wa  nzolwa nkumbu miayingi kamokenanga yo Yave yo Kunyikila vo “Se” diandi. Kieleka, e mvovo miantete mia Yesu miasonama, wavova mio muna tempelo vava kakala ye kimbuta kia mvu 12, wayikila Yave vo “Es’ame.” (Luka 2:​49) E mvovo “Se” tezo kia fulu 190 wasonama muna Nsangu Zambote. Yesu nkumbu miayingi wayikilanga Yave vo “S’eno,” “S’eto,” yo “S’ame.” (Matai 5:16; 6:9; 7:​21) Muna sadila mazina mama, Yesu wasonga e ngwizani kena yau o Yave ye wantu alembi lunga.

Nkwa nkenda ye nloloki Yesu wazaya wo vo wantu alembi lunga nkenda za Yave bavwidi o mfunu. Muna kingana kia mwan’a nkolami, Yesu watezanesa Yave yo se dianzodi dia nloloki ona watambula mwan’andi waviluka kieleka o ntima. (Luka 15:​11-​32) E mvovo mia Yesu milenda kutusonga ziku vo Yave oyangalalanga vava nsumuki kevilukanga o ntima yo kunsonga e nkenda Zandi. Yave una ye luzolo lwa loloka nsumuki ovilukidi kieleka o ntima. Yesu wavova vo: “Inusamunwini vo, kiese kikala kun’ezulu muna diambu dia nsumuki mosi ovilukilu o ntima, kisundidi kiakina muna luvwa ye vwa lua wantu ansongi ke bena yo nkinzi a vilukw’o ntima ko.” (Luka 15:⁠7) Dialudi vo tuzolele finama Nzambi ndioyo wa nkwa nkenda.

Owang’e sambu Una kayizidi ko ova ntoto, Yesu kun’ezulu wamonanga vo Yave “owanga sambu” yo yangalela e sambu ya selo yandi ya kwikizi. (Nkunga 65:⁠2) Muna kuma kiaki, ekolo kasalanga salu kiandi, Yesu walonga awana banwanga una balenda sambila ye dina balenda lomba. Wavova vo: “Ke nuvovolola ko.” Wabavovesa basamba vo luzolo lwa Nzambi “luavangam’ova nza nze koko’zulu.” Tulenda mpe lomba katuvana dia kwa lumbu ke lumbu, kaloloka masumu meto ye katusadisa mu zizidila umpukumuni. (Matai 6:​5-​13) Yesu walonga vo Yave una nze ese, owang’e sambu ya selo Yandi, ovananga mvutu za ndomba zau za kwikizi.​—⁠Matai 7:​7-11.

Tuna ye ziku vo Yesu walonga e ludi mu kuma kia Yave yo songa mpila Nzambi kena. Kansi Yesu wakala mpe ye luzolo lwa samuna diambu diakaka mu kuma kia Yave. Muna lusadisu lwa diambu diadi, Yave osoba mambu mu nza yawonso muna lungisa ekani diandi mu kuma kia ntoto yo wantu. Kieleka, e diambu diadi diakala se ntu a diambu wa nsangu kasamuna o Yesu.

[Mvovo Vana Yand’a lukaya]