“Kudikila Diaka Kopo Dimosi”

ALLEN wayantika nua malavu ma nkolwa vava kakala ye kimbuta kia mvu 11.  * Allen y’akundi andi ku mfinda bayendanga sakanena, batangininanga e fu ye mavangu ma wantu ana bamonanga mu filmes. Mana bamonanga mu filmes zazi ke makala makieleka ko, kansi Allen y’akundi andi malavu kikilu banuanga.

Tony kimbuta kia mvu 40 kakala vava kawokesa e fu kia nua malavu ma nkolwa. Konso fuku kopo dimosi yovo mamole kanuininge, i bosi wayantika nua makopo matanu yovo masambanu. I bosi, kazayanga diaka ko lutangu lwa mbwata yovo nlangi mia malavu kanuininge muna lumbu.

Allen wavava lusadisu, mu yambula nua malavu. Tony waveza lusadisu kavewa kwa yitu ye kw’akundi andi. O unu, Allen moyo kena mu vova lusansu lwandi; kansi Tony wafwa mu sumbula kia kalu mu kuma kia kolwa malavu.

Kana una vo muntu yandi mosi okolwanga malavu, mana kevanganga kunsi a nkolwa, sumbula metwasanga yo sia mioyo mi’akaka mu vonza. * O kolwa malavu, i diambu difilanga wantu mu vanga umpumbulu, yo twasa sumbula ya makalu, sumbula kuna salu yo mayela. O kolwa malavu kufilanga wantu mu fwasa ulolo wa nzimbu konso mvu, kutwasanga mpasi kwa muntu yandi kibeni, kwa yitu ye kwa wan’andi.

Kana una vo i wau, “ke awonso ko benuanga malavu lumbu yawonso balenda yikilwa vo nduvu, ye ke nduvu zawonso ko benuanga malavu lumbu yawonso,” uvovele Institutos Nacionais de Saúde kuna Estados Unidos. Ndonga bena vo ka nduvu ko, kansi malavu mayingi benuanga lembi wo zaya. Akaka ke benuanga malavu lumbu yawonso ko, kansi belendanga nua vioka mbwata tanu za malavu vana vau.

Avo malavu onuanga aweyi olenda zayila vo viokese tezo kiaku? Aweyi olenda zayila vo kufwete “kudikila diaka kopo dimosi ko”? (Ngana 23:​29, 30, Contemporary English Version) Elongi dilende divana mvutu zasikila mu kuma kia diambu diadi.

[Mvovo Vana Yand’a lukaya]