Zingu kia Akristu Muna Tandu Kiantete

“Minkubika-Nzo”

“Wau bayendanga, oyandi olueke muna mpata-vata: o nkento nkumbu andi Mareta, untambwidi muna nzo andi. Okedi yo mbunzi, nkumbu andi Maria, andiona wafongele van’ekolo dia Mfumu, kawila mambu mandi. Kansi o Mareta wabambamena ye salu yayingi, unsunzukidi, oku vo, ‘e Mfumu, nga ke diambu ko, o mbunzi ame unsisidi mono amosi kaka vana salu e? se umvovesa vo keza kunsadisa.’ O Mfumu umvutwidi vo, e Mareta, ‘e Mareta, muna mambu mengi otelekelele o moyo, ozuwaninini: dimosi kaka dina mfunu: o Maria osolele ndambu ambote, ina ke ikunkatulwa ko.’”​—⁠LUKA 10:​38-42.

MARETA nkento a nsadi kakala. Ka lukatikisu ko, Mareta watoma zitiswanga kw’akaka. Mun’owu wa fu ya kisi nsi y’Ayuda, o zitu wa nkento wamonekanga muna mpila ina kayivaninanga muna salu ya nzo ye una kalungisilanga e nsatu za esi nzo andi.

Akento Akristu a tandu kiantete, bakasakeswanga mpe mu kala “minkubika-nzo.” (Tito 2:⁠5) Kansi, bakala mpe y’elau ye mbebe yakaka ya longa oma ma lukwikilu lwau kw’akaka. (Matai 28:​19, 20; Mavangu 2:​18) Nkia “salu yayingi” basalanga akento Ayuda muna tandu kiantete? Nkia  diambu tulenda longoka muna mvovo mia Yesu kwa Maria?

“Salu Yayingi” O nkento a Nyuda wasikamanga una kuma ke kukiele ko. (Ngana 31:​15) Avo omene lamba madia ma esi nzo andi, i bosi kakubikanga o wan’andi amakala yo kubanata kuna sikola z’esambilu. O wan’andi amakento kuna nzo basalanga mu longwa e salu ya nzo kimana bakituka se akento bazeye o sala.

O ngudi yo wan’andi amakento bayantikanga e lumbu mu sala e salu yamfunu nze sia mazi muna mini (1), komba e nzo (2), yo kama kimvumina kia nkombo (3). I bosi bavanganga e mbolo za dia. Entete, dumbelele bayungulanga e mfumfu yo katula e nseka (4) E nseka zozo banikanga zo vana tadi (5). I bosi, o ngudi wabonganga e mfumfu yayi yo sanga yo maza ye funa. Waniemanga yo kimana yatoma sangalakana (6), i bosi wayambulanga yo ya funa, ekolo kasalanga e salu yakaka. Muna kolo kiokio, e dumbelele bazowanga kimvumina kia nkombo mu vanga queijo (7).

Muna mene, o ngudi yo wan’andi amakento nanga bayendanga ku zandu. Kwakuna, bawanga e nsunga za lekwa itomesanga madia, wá mazu ma bulu ye mazu ma wantu bawizananga e ntalu za lekwa basumbanga. O ngudi wasumbanga mpe madia (8). Nanga wasumbanga nkove ye kimungwa yovo munsambu. Avo nkento a Nkristu, nanga wasadilanga mpe elau diadi mu samuna oma ma lukwikilu lwandi kw’akaka kuna zandu.​—⁠Mavangu 17:⁠17.

Ngudi angangu wasadilanga elau diadi mu longa wan’andi e nkanikinu mia Nkand’a Nzambi ekolo bakangalanga muna nzila ye kuna zandu. (Nsiku 6:​6, 7) Wamokenanga mpe yo wan’andi amakento e nkanikinu milenda kubasadisa mu lembi sumbanga lekwa ina ke bavwidi mfunu ko.​—⁠Ngana 31:​14, 18.

E salu kiakaka kiasalanga o nkento, i kwenda teka maza kuna sima (9). Wazadisanga e mvungu mia nzo andi yo maza, nanga ekolo kasalanga e salu kiaki wamokenanga ye akento akaka ana batekanga mpe maza ma esi nzo zau. Vava kavutukanga kuna nzo o ngudi yo wan’andi amakento bayantika e salu kia yoka e mbolo. Entete, bazengozionanga e mbumba wafuna (10) i bosi bayokanga mio kuna mbazi. Ekolo bawanga e nsunga za mbolo yo mokena, bamonanga vava e mbolo zavianga.

I bosi, bayendanga mpe ku nkoko mu sukula e mvwatu (11). Akento basukulanga e mvwatu ye sabuni yavangilwa mu ntoto a mpolo a makaya ma nti bayokanga. Avo mivelele, bakamunanga mio yo yanika mio muna ntayi za nti ye vana matadi.

 Avo batwese mvwatu kuna nzo, ngudi yo wan’andi amakento basalanga mpe muna masuku mau mu londa e mvwatu miafwa (12), i bosi basianga mio muna suku mialundilwanga. I bosi, o wana balongwanga una balenda sila e nsele muna mvwatu (13). Ke kolo ko, e ola ya lamba madia mafuku yifwene (14). E fu kia tambula nzenza kiakala se mpila zingu kiau, esi nzo bakubamanga mu dia mbolo, nkove, munsambu ye maza ma nzizi, ye badianga kumosi ye konso nzenza batambulanga.

Kuna mfoko a lumbu, o wana avo bakubamene mu kwenda leka, e ntete balengolanga mazi mambote muna malu. Ekolo mini kialemanga, mase bazingwilanga lusansu lwa Nkand’a Nzambi kwa wan’au yo samba kumosi. Kuna mfoko, yakala wakalanga ye kiese kia vovesa nkaz’andi e mvovo emi mitomene zayakana: “O nkento angangu, nani okunsolola? Kadi e ntalu andi iviokele kikilu makolado.”​—⁠Ngana 31:⁠10.

Sola “Ndambu Ambote” Ka lukatikisu ko, akento angangu a tandu kiantete bakala ye “salu yayingi.” (Luka 10:​40) Diau adimosi mpe ye akento o unu, salu yayingi bekalanga yau, musungula angudi. E makina mevanganga akwa umbangu wa tandu kiaki, mesadisanga akento muna salu yakaka ya nzo keyisadilwanga diaka mu moko ko. Kansi ngudi zayingi ke besalanga kaka salu ya nzo ko, besadilanga mpe kumbazi mu lungisa e kiyekwa kiau.

Kana una vo bemonanga mpasi za mpila mu mpila, akento ayingi bena vo Akristu o unu belandanga mbandu a Maria, ona tuyikidi kuna lubantiku lwa longi diadi. Bezayanga o mfunu wa mambu ma mwanda. (Matai 5:⁠3) Nze una Nkand’a Nzambi ukubakasakesanga, betoma lunga-lunganga esi nzo zau. (Ngana 31:​11-​31) Kansi, belandanga mpe e mvovo mia Yesu mina kazayisa kwa Mareta. Wau vo mambu ma mwanda kazolanga, Mareta walemvokela nkanikinu wau ye nsi a ntima. Akento bena vo Akristu ke bafwete yambula ko vo e salu ya nzo yabavunza mu longoka oma ma Nzambi (15) yovo mu mokena y’akaka oma ma lukwikilu lwau. (Matai 24:14; Ayibere 10:​24, 25) “Ndambu ambote” besolanga. (Luka 10:​42) Muna kuma kiaki, beyangalelwanga kwa Nzambi, kwa Kristu ye kwa esi nzo zau.​—⁠Ngana 18:⁠22.