‘O Yave Ntima Ketalanga’
Finama Nzambi
‘O Yave Ntima Ketalanga’
NDOSE a muntu ilenda kutuvuna. E mpw’a muntu ka yisonganga kiwuntu kiandi ko, i sia vo ntim’andi. O wantu bena ye fu kia fundisa akw’au muna tala e ndose. Diakiese diazaya vo Yave wa Nzambi ketalanga ndose ko. Ediadi ditoma kieseswanga muna mvovo mina muna 1 Samuele 16:1-12.
Badika mana meyikwanga muna lusansu lwalu nze ngeye omonanga mo. Yave ozolele kusa ntinu ampa muna zula kia Isaele. Nzambi ovovese Samuele wa ngunza vo: “Ikutuma kuna kwa Yisai wa mwisi Beteleme: kadi nsolwele ntinu muna wan’andi.” (Tini kia 1) Yave kavova nkumbu ko, kansi wavova kaka vo osola mosi muna wan’a Yisai. Vava Samuele kayenda kuna Beteleme nanga wakiyuvula: ‘Aweyi izayila ndiona kasolele Yave muna wan’a Yisai?’
Vava Samuele kalwaka kuna Beteleme, wavovesa Yisai yo wan’andi bakela kimenga. Vava Eliabe wa mwan’antete a Yisai kakota, vana vau Samuele watala e mpw’andi yo sivika. Samuele wayindula vo Eliabe i ntinu yo vova vo: “Kieleka, o kuswa kia Yave kina vana kena.”—Tini kia 6.
Kansi, Yave mu mpila yaswaswana kebadikilanga mambu. Wavova kwa Samuele vo: “Kutadi ndose andi ko ngatu ntel’andi; imbembwele.” (Tini kia 7) Yave kasivika ntela ko ngatu vienga kwa Eliabe. Meso ma Yave memonanga mawonso mena muna ntim’a muntu yo solola mo dina diambote.
Yave wavovesa Samuele vo: “Kadi o Yave kemwena una kemwena muntu ko; kadi muntu otala ndose, o Yave otala ntima.” (Tini kia 7) Kieleka, ntima i kiwuntu kiaswekama kia muntu, i sia vo nto a ngindu ye makani ma muntu, ediadi i diambu dilutidi o mfunu kuna kwa Yave. Yave ‘otalanga ntima’ wabembola Eliabe wa mwana Yisai ye abunzi andi sambanu ana bayiza kwa Samuele.—Ngana 17:3.
Yisai wakala diaka ye mwana wakaka wa nleke, nkumbu andi Davidi ‘mameme kavungudinge.’ (Tini kia 11) I bosi babokela Davidi kuna mpatu yo kwiza kwa Samuele. Yave ovovese Samuele vo: “Telama wankusa: kadi i yandi yuyu.” (Tini kia 12) Dialudi vo, Davidi “mote kwandi, wa mpw’ambote.” Kansi ntim’andi wansadisa mu yangalelwa vana meso ma Nzambi.—1 Samuele 13:14.
Nswaswani ye wantu a nza betalanga e mpw’ambote kena yau o muntu, tufiaulwiswanga mu zaya vo Yave wa Nzambi ketalanga mpwa ko. Ketalanga ntela ko yovo mpw’ambote ina bemonanga akaka. Kansi ntima ketalanga, i sia vo kiwuntu kiaku kiaswekama, ediadi i diambu dilutidi o mfunu kuna kwa Yave. O zaya diambu diadi nga ka difwete kufila ko mu songa fu yambote ilenda kusadisa mu kala ye mpw’ambote vana meso ma Nzambi?