Ekuma Wantu Bevangilanga Mambu Mambi?

AKETE kaka bekatikisanga vo yeto awonso tu asumuki, tuvanganga vilwa ye mambu mekutufilanga mu kuyibanza. Kana una vo i wau, nga ekiaki i kuma kifwete fila wantu mu vanga ulolo wa mambu mambi tutalanga lumbu yawonso muna televizau, wá muna rádio ye mana tutanganga muna zulunalu?

Kana una vo wantu awonso asumuki, bazeye wo vo vena ye nsiku mia nkal’ambote kamifwete kululwa ko ye balenda mpe venga mavangu mambi. Ndonga mpe bekwikilanga vo vena ye nswaswani vana vena vova diambu lembi teka yindula yo vuna. Vena mpe ye nswaswani vana vena lweka muntu lembi wo kana yo vonda muntu kuna lukanu. Nkumbu miayingi, mavangu mambi mevangwanga kwa wantu bena yo zayi wasikila ana tuzinganga yau belo kimosi. Ekuma wantu bevangilanga mavangu mambi?

 O Nkand’a Nzambi utoma kiesesanga e diambu diadi. Usonganga e kuma kiasikididi kifilanga wantu mu vanga mambu mana bazeye vo mambi. Badika dina kelonganga o Nkand’a Nzambi.

▪ “O lubangamu lukitula nkwa ngangu se lau.”—KIMPOVI 7:7.

O Nkand’a Nzambi usonganga vo ezak’e ntangwa wantu befilwanga mu vanga mambu mana ke bafwana vanga ko. Akaka bevanganga mavangu mansoki kadi beyindulanga vo muna wo vanga i befokolwela e mpasi yo kondwa kwa unsongi. O nkanda Terrorismo Urbano uvovanga vo: “Nkumbu miayingi, e diambu diantete difilanga wantu mu vanga mavangu mansoki i mpasi za zingu ye mavwanga mevangamanga mu tuyalu.”

▪ “O zola nzimbu i’sina dia mayi mawonso.”—1 TIMOTEO 6:10.

Vena ye kingana kiankulu kivovanga vo e nzimbu zilenda fwasa e fu yambote, disongele vo kana nkutu wantu ambote bekululanga e nsiku mia nkal’ambote kele vo nzimbu zayingi baveno. Akaka bemonekanga vo wantu ambote, kansi mu kuma kia nzimbu, besobanga e fu yau yo kituka se akwa mavangu mansoki vava bekalanga mu mpasi. Yindula mavangu mayingi mansoki mevangamanga mu kuma ki’eloko kumosi yo wivi wa nzimbu, luvunu yo vonda.

▪ “Wau vo e nzengo mun’evangu diambi ke ivika lungiswa ko, o ntim’a wan’a wantu wakangam’o vanga mayi.”—KIMPOVI 8:11.

E sono kiaki kisonganga vo wantu beyindulanga vo balenda kwau kulula e nsiku avo ke vena nyingidi ko yovo muntu olenda kubabaka. I wau beyindulanga awana benatinanga makalu mu mpila yambi, awana bevunanga muna ntangwa bevanganga lufimpu kuna sikola ye kuna salu, ana beyiyanga nzimbu zisadilwanga e salu ya nkangu ye mambu makaka mambi. O lembi kanga avangi a mambi yo lembi kubatumba difilanga wantu ambote mu vanga diambu dina ke bafwete vanga nkutu ko. E zulunalu Argumentos e Fatos yavova vo: “Yimpumbulu bevaikiswanga muna pelezo lembi vewa tumbu, ediadi difilanga wantu ana bena yo zayi wasikila mu vanga mavangu mansoki.”

▪ “Konso muntu vana ken’ovukumunwa, ovo otwalakeso kwa diandi’keto, yo nekenwa. I bosi, eketo, ovo diyimiti, diwutidi esumu.”—YAKOBO. 1:14, 15.

Wantu awonso balenda yima ngindu zambi. Lumbu yawonso tuwanananga ye mambu mayingi ye ntonta zilenda kutufila mu vanga oma mambi. Kuna nz’ankulu, Akristu bavoveswa vo: “Ke nutontwa ntontwa iviokele o uwuntu ko.” (1 Korinto 10:13) Kana una vo i wau, e nsola kevanganga konso muntu, ya katula e ngindu zambi mu ntima yovo lembi zo katula yo nungununa zo, ilenda songa dina dilenda kumbwila. E sono kia vumunwinwa kia nkand’a Yakobo kina ova ntandu kisongele vo avo muntu oyambwidi vo ngindu zambi ‘zawokela’ mu ntim’andi, ediadi dilenda kumfila mu vanga mavangu mambi.

 ▪ “On’okangala y’akwa ngangu, okal’e ngangu: O makangu ma mazowa, mpasi kemona.”—NGANA 13:20.

Akundi eto balenda kutufila mu vanga mambu mambote yovo mambi. Nkumbu miayingi wantu bevanganga mambu mana ke bafwana vanga ko mu kuma kia yikundi yambi ye ntonta za akundi a sikola yovo a salu, ediadi mpasi zayingi dikubatwasilanga. Muna Nkand’a Nzambi, e mvovo “mazowa,” ke uyikanga wantu bakondwa ngangu ko, kansi uyikanga awana bevezanga malongi ma Diambu dia Nzambi. Twakala ambuta yovo aleke, avo ke tuna ye ngangu zitukanga mu Nkand’a Nzambi ko mu diambu ditadidi akundi, tuzaya dio vo ‘mpasi tumona.’

E sono yayi ya Nkand’a Nzambi ye yakaka mpe itoma sasilanga ekuma wantu ana bena yo zayi wasikila bevangilanga mambu mambi ye mansoki. Wau vo tubakwidi e diambu difilanga wantu mu vanga mavangu mambi, nga vena ye vuvu vo mavangu mambi mefokoka emvimba? Elo, kadi o Nkand’a Nzambi ke usasilanga kaka ko ekuma wantu bevangilanga mavangu mambi, kansi usianga mpe nsilu vo mavangu mawonso mambi mefokoka emvimba. Nkia nsilu kesianga o Nkand’a Nzambi? Nga mavangu mawonso mambi ova nza mefokoka emvimba? Elongi dilende divana e mvutu za yuvu yayi.