Sambu

1 Ekuma Tufwete Sambila?

SAMBU. I dimosi muna mambu meyikwanga mu Nkand’a Nzambi mesikamesanga luzolo lwa wantu. Badika yuvu nsambwadi iyuvulwanga mu kuma kia sambu; i bosi tufimpa kumosi e mvutu za Nkand’a Nzambi. Malongi mama, makubikilu y’ekani dia kusadisa mu samba yo tomesa e sambu yaku.

MUNA nz’amvimba, wantu a makanda ye mabundu mawonso besambanga. Besambanga vana fulu kia yau amosi yovo kia ndonga. Besambanga muna nzo za nzambi, matempelo, masambilu ye nzo zavauka. Besadilanga lekwa ya mpila mu mpila muna samba nze nsanga, teke, matadi, babu ya sambu, nkanda mia sambu ye yakaka mpe.

E sambu kiswaswanesanga wantu ye bulu. Dialudi vo, vena ye mambu mayingi tuvanganga mafwanana ye mana bevanganga e bulu. Nze bulu, yeto mpe tuvwanga o mfunu wa tembwa, dia, yo nua. Nze bulu, tuwutwanga, tuzinganga yo fwa. (Kimpovi 3:19) Kansi, wantu kaka besambanga. Ekuma?

E mvutu za nkufi nanga i zazi, yeto wantu sambu tuvwanga o mfunu. Vana ntandu, wantu beyindulanga vo e sambu kilenda kubafila mu nza ya kimwanda, fulu kina bebadikilanga vo kiavauka yovo kiavelela ye kiakwele mvu. O Nkand’a Nzambi usonganga vo twavangwa ye nsatu za mambu ma mwanda. (Kimpovi 3:11) Yesu Kristu mpe wavova vo: ‘Akwa nsambu awana bazeye nsatu zau za mwanda.’—Matai 5:3.

Mu kuma kia ‘nsatu zazi za mwanda,’ o wantu besokanga mambu ma mpila mu mpila yo fwasa ulolo wa ntangwa mu kuma kia sambu. Akaka beyindulanga vo yau kibeni balenda lungisa nsatu zau za mwanda yovo sadiswa kw’akaka muna zo lungisa. Kansi, nga wantu balenda vana lusadisu lwafwana? Ve ke twafwana ko kadi twatovoka, mvu miakete kaka tuzinganga ye ke tulendanga bakula mawonso ko. Ndiona kaka osundidi ngangu ye nkuma ozinganga yakwele mvu olenda lungisa nsatu zeto za mwanda. Azeyi i nsatu zazi za mwanda zikutufilanga mu samba?

Badika ediadi: Nga kwasidi vava luludiku ko, ngangu yovo mvutu za yuvu ina wamona vo wantu ke balendi yo vanina mvutu ko? Nga wavava kala lufiaulwisu vava wafwilwa yitu yo luludiku vava wavavang’o baka nzengo za diambu diampasi yovo lolokwa mu kuma ki’esumu wavola?

Mun’owu wa Nkand’a Nzambi, omama i mambu mafwete kufila mu samba. Nkand’a Nzambi i nkanda usundidi bundwa e vuvu mu kuma kia diambu diadi kadi, uyikanga sambu ya selo yayingi yakwikizi ya Nzambi, akala y’akento. Basambanga mu lomba lufiaulwisu, luludiku, luloloko yo lomba mvutu za yuvu yisundidi e mpasi.—Nkunga 23:3; 71:21; Daniele 9:4, 5, 19; Kabakuke 1:3.

Kana una vo e sambu yayi yaswaswana yakala, diambu dimosi bazayanga. Yau awonso basambanga, bazaya dina bafwete vanga kimana e sambu yau yavaninwa e mvutu, diambu dina wantu a nza ke bezayanga ko. Selo ya Nzambi bazayanga kana kwa nani bafwete samba.