Sambu

2 Kwa Nani Tufwete Samba?

NGA Nzambi owanga e sambu yawonso lembi tala nkia nzambi osambilwanga? I wau beyindulanga wantu o unu kiaki. E ngindu zazi ziyangidikanga ulolo wa wantu bena ye fu kia lungana vamosi mu samba ye mabundu makaka, kadi bebanzanga vo nsambila kaka zina zaswaswana, kansi mabundu mawonso mambote kwandi. Nga diadi dialudi?

Kieleka, Nkand’a Nzambi ulonganga vo ndonga ke besambilanga Nzambi aludi ko. Tuka kiasonekenwa Nkand’a Nzambi, wantu bakala ye fu kia sambila e teke. Nkumbu miayingi Nzambi walukisanga mu kuma ki’evangu diadi. Muna Nkunga 115:4-6 tutanganga mu kuma kia teke vo: “Bena yo matu, yau ke bawe.” Ozevo, ekuma ofwete sambila nzambi ndiona kalendi kuwá ko?

O lusansu lwa Nkand’a Nzambi lusonganga mfunu a diambu diadi. Eleya wa ngunza akwikizi a Yave wafidisa ngunza za Bale e mpaka vava kabalomba basamba kwa nzambi zau, i bosi yandi mpe wadi samba kwa Nzambi andi. Eleya wavova vo Nzambi aludi ovana e mvutu za sambu yau, vo i nzambi aluvunu ke vana mvutu za sambu yau ko. I bosi, e ngunza za Bale basamba tuka menemene yamu ola kumi ye zole yo kaza kikilu, kansi mpavala kwandi. Lusansu lusonganga vo: ‘Ke vakala on’ovutula ko yovo on’owunikina.’ (1 Ntinu 18:29) Adieyi diabwa vava Eleya kasamba?

Vava Eleya kasamba, vana vau Nzambi andi wamvana e mvutu, watwika tiya tuka kun’ezulu twabomona lukau lwa Eleya. Ekuma e sambu kia Eleya kiawakana, wau vo kia ngunza za Bale ke kiawakana ko? E sambu kavanga yandi kibeni Eleya kiasonama muna 1 Ntinu 18:36, 37 kivananga e mvutu. Sambu kiankufi kikilu kiakala, tezo kia mvovo 30 kaka mu nding’antete ya Kiyibere. Kansi, mu mvovo miami miakete, Eleya wasamba kwa Nzambi yo yika nkumbu andi Yave nkumbu tatu.

Bale una ye nsasa vo “mvwe” yovo “mfumu” wakala nzambi a esi Kenani, konso zunga basadilanga nsas’a nkumbu andi mu mpila yaswaswana. Vo i Yave, Yandi kaka oyikilwanga e nkumbu yayi omu nza yawonso. O Nzambi ndioyo wavovesa kwa nkangu andi vo: “Omono i Yave; eyayi i nkumbu ame: kivana nkembo ame kw’akaka ko.”—Yesaya 42:8.

Nga sambu kia Eleya ye sambu ya ngunza za Bale kwa Nzambi mosi yafilwa? E nsambila ya Bale keyayangidikanga wantu ko kumosi ye mavangu mandi ma nsafu ye tukau twa wantu tuna bavananga. Kansi e nsambil’a Yave yayangidikanga nkangu andi Isaele yo kubavevola muna mavangu mama ma nsafu. Se badika ediadi: Avo otwikidi e nkanda  kwa nkundi aku ona otoma zitisanga, nga oyangalala vo nkanda wowo walwakila kwa muntu akaka una ye fu yambi yaswaswana ye nkundi aku? Ve kikilu.

Vava osambanga kwa Yave, osambanga kwa Mvangi, w’Ese dia wantu. * Yesaya wa ngunza wavova muna sambu vo “ongeye, e Yave, u S’eto.” (Yesaya 63:16) Ozevo, Ondioyo i Nzambi kayika Yesu Kristu vava kavovesa alongoki andi vo: “Tomboka ntomboka kw’ediame Se, w’edieno Se; y’eyame Nzambi, wa Nzambi eno.” (Yoane 20:17) O Yave i Se dia Yesu. Oyandi i Nzambi kasambila Yesu yo longa kwa alongoki andi vo basambanga kwa yandi.—Matai 6:9.

Nga Nkand’a Nzambi ukutuzayisanga vo twasambilanga Yesu, Maria, aveledi yovo ambasi? Ve. Yave kaka. Badika kuma yole tufwete sambila kaka Yave. Entete, e sambu kina nze nsambila ye Nkand’a Nzambi uvovanga vo Yave kaka ofwete sambilwa. (Luvaiku 20:5) Diezole, muna Nkand’a Nzambi, yandi oyikilwanga vo “Owanga sambu.” (Nkunga 65:2) Kana una vo Yave ovananga mbebe ya salu kw’akaka, e mbebe ya wá e sambu kayekeka yo kwa muntu akaka ko. Osianga nsilu vo owá e sambu kia konso muntu muna yeto.

Ozevo, avo zolele vo e sambu yaku yawakana kwa Nzambi, sungamena e mvovo miami mia Nkand’a Nzambi: “Konso on’ovovela nkumbu a Yave, ovuluzwa.” (Mavangu 2:21) Nga Yave owanga e sambu yawonso? Nga vena ye diambu tufwete zaya avo tuzolele vo e sambu yeto yawakana kwa Yave?

[Mvovo Vana Yand’a lukaya]

[Foto ina muna lukaya lwa 5]

Eleya wafidisa ngunza za Bale e mpaka mu songa vo e sambu yawonso keyifilwanga kwa Nzambi mosi ko