Yuvu Y’atangi Eto . . .

Akweyi Ikala e Paradiso Iyikwanga Muna Nkand’a Nzambi?

▪ Yesu wasia nsilu kwa muntu mosi wafwila vana ndambu andi ona wasonga kwikizi muna yandi yo unkabu wawonso vo: “Okala yame muna Paradiso.” (Luka 23:43) O muntu ndioyo akweyi kekala? E Paradiso akweyi ikala? Ku zulu yovo va ntoto? Nga ikala vana fulu kina o wantu bevingila e lumbu kia lufundisu?

Akulu eto Adami yo Eva mu Paradiso bazingilanga. Muna Nkand’a Nzambi tutanganga vo: “O Yave wa Nzambi okunini mpatu kuna este muna Edene; mûna kasidi o muntu kabumba. O Yave wa Nzambi obongele muntu, unsidi muna mpatu a Edene, kavata yo lunga-lunga yo.” (Etuku 2:8, 15) Vava e mvovo miami miasekolwa muna nding’a Kingerekia, e mvovo “mpatu” wasekolwa vo “paradiso.”

Wauna mase bekudikilanga masuku ma nzo vava bewutanga wana ayingi, diau adimosi mpe mase meto mantete badi wokesa e Paradiso ekolo wantu bawokelanga. Nzambi wabavovesa vo: “Nulungila nza, nukulula yo.”—Etuku 1:28.

Ozevo, ekani dia Mvangi eto diakala vo wantu bazinga yo wuta wana muna Paradiso ova ntoto. Badi zinga muna mpatu ova ntoto, ke vakala mfunu wa ziami ko. O ntoto wadi kala se fulu badi zingila wantu yakwele mvu. Ka lukatikisu ko vo lekwa ya mpila mu mpila ina ova ntoto, kiese kiayingi yikututwasilanga. Twavangwa mu zingila mu nza yambote.

Nga ekani dia Nzambi diasoba? Ve. Yave okutusikidisanga vo: “Diambu diame divaika mu nu’ame: ke dikumputukila nkatu ko, divanga kaka edi nzolele.” (Yesaya 55:11) Vioka 3.000 ma mvu tuka kiasemwa o muntu, Nkand’a Nzambi uvovanga mu kuma kia “Ona wasema nza yo Vanga yo” vo, “kasema yo nkatu ko, yakala kak’o wantu.” (Yesaya 45:18) O luzolo lwa Nzambi ke lwa soba ko. O ntoto ukituka se paradiso.

Diakiese vo, sono yayingi ya Nkand’a Nzambi ivovelanga oma ma Paradiso, yisonganga una ukala e zingu ova ntoto. Muna bong’e nona, ungunza wa Yesaya usonganga vo: “Betunga nzo yo kala mo; bekuna mpatu za vinyo, yo dia bundu yau.” (Yesaya 65:21) E nzo akweyi zitungilwa? E mpatu za vinyo akweyi zikuninwa? E bundu akweyi yidilwa? Ova ntoto. Muna Ngana 2:21 tutanganga vo: “Asongi bekal’omu nsi, alungi besala mo.”

O Yesu mpe wavovela oma ma paradiso ova ntoto. Wavova vo vena yo wantu bevwila moyo muna paradiso kun’ezulu, kansi, akete kaka. (Luka 12:32) Vava befwanga, befulwanga mu vwila moyo muna Paradiso kun’ezulu ye beyala kumosi yo Kristu e Paradiso ova ntoto. (Lusengomono 5:10; 14:1-3) Ayadi awaya bevanga mawonso kimana e Paradiso ova ntoto yatoma yalwa yo lungwa-lungwa mun’owu wa luzolo lwa Nzambi.

Yesu wazaya wo vo e lwalu i luzolo lwa Nzambi mu kuma kia ntoto. Vana ntandu, Yesu wakala kun’ezulu yo S’andi vava e mpatu ya Edene yasemwa. Awonso besonganga lukwikilu o unu, bekala y’elau dia zinga yakwele mvu ova ntoto. (Yoane 3:16) Yesu wasia o nsilu kwa wantu awaya vo: ‘Nukala yame muna Paradiso.’—Luka 23:43.

[Avwe a Foto muna lukaya lwa 15]

© FORGET Patrick/SAGAPHOTO.COM/Alamy