Adieyi Tulongokele Mu Kuma Kia Yesu

Ambasi Adieyi Bevanganga kwa Yeto?

Yesu wazinga kun’ezulu yo S’andi ‘una ke kiakedi nza ko.’ (Yoane 17:5) Ikuma vo, wafwana kikilu muna vana e mvutu za yuvu yilende.

Nga mbasi mfunu bekutuvwanga?

▪ Yesu walonga vo mbasi bevwanga kikilu o wantu o mfunu. Wavova vo: ‘Kiese kikala vana vena mbasi za Nzambi, muna diambu dia nsumuki mosi ovilukidi o ntima.’—Luka 15:10.

Yesu wasonga vo mbasi batambula e kiyekwa kia lunga-lunga kimwanda kia selo ya Nzambi. Muna kuma kiaki, vava Yesu kalukisa alongoki andi mu diambu dia tesesa akaka esakuba wavova vo: “Nutoma tala ke nwavez’omosi vana ven’away’andwelo; kadi inusamunwini vo, e mbasi zau kun’ezulu zikwam’o tala ndose Es’ame wina kun’ezulu.” (Matai 18:10) E mvovo miami ke misonganga ko vo konso nlongoki a Yesu una ye mbasi okunlunga-lunganga. Yesu wasonga vo mbasi ana besalanga kumosi yo Nzambi betokananga mu kuma kia nkutakani ya Akristu.

 Nkadi Ampemba aweyi kalenda kutumwesesa mpasi?

▪ Yesu walukisa alongoki andi vo Satana ovavanga vukumuna wantu kimana bayambula longoka e ludi mu kuma kia Nzambi. Wavova vo: ‘Konso on’owidi diambu dia kintinu, kalembi dio zaya, ndiona wambi okwiza, kakatul’edi dikuninu muna ntim’andi.’—Matai 13:19.

Muna kingana kiandi mu kuma kia muntu wakuna masa muna mpatu andi, Yesu wasonga una Satana kevukumunanga o wantu. O muntu muna kingana kiaki i Yesu, vo i masa i Akristu akieleka ana beyala kumosi yo Yesu kun’ezulu. Kansi, Yesu wavova vo vezidi e ntantu yo “kuna mbongo ambi muna nsi a masa.” E mbongo ambi i Akristu aluvunu. “O ntantu wakuna yo i Nkadi Ampemba.” (Matai 13:25, 39) Wauna e mbongo ambi ilenda moneka nze masa, awana mpe bekiyikilanga vo Akristu balenda moneka nze asambidi akieleka. Mabundu melonganga malongi ma luvunu mevunang’o wantu yo kubafila mu kolamena Nzambi. Satana osadilanga mabundu ma luvunu mu sima wantu balembi kala akundi a Yave.

Adieyi tufwete vanga twalembi mweseswa mpasi kwa Satana?

▪ Yesu wayikila Satana vo ‘nyadi a nza.’ (Yoane 14:30) Muna sambu kiandi kwa Nzambi, Yesu wasonga una tulenda taninwa vana moko ma Satana. Wasamba kw’Esandi kun’ezulu mu kuma kia alongoki andi vo: “Wabakenges’aka muna ndiona wambi. Ke ba nza ko, nze mono kia nza ko. Ubavaulwila muna ludi: e diambu diaku i ludi.” (Yoane 17:15-17) O kala yo zayi wa Diambu dia Nzambi dilenda kututanina twalembi vukumunwa mu nza iyalwanga kwa Satana.

Ambasi adieyi bevanganga kwa yeto o unu?

▪ Yesu wavova vo: “Kuna mbaninu a nza ambasi bevaika, bevaula an’ambi mun’asongi.” (Matai 13:49) Owau, mu lumbu ‘yambaninu’ tuzingilanga, ulolo wa wantu betambulwilanga e nsangu zambote za Kintinu kia Nzambi.—Matai 24:3, 14.

Kansi ke awonso ko belongokanga Nkand’a Nzambi i betondwanga kwa yandi. Ambasi befilanga e salu kia selo ya Yave, o wantu ana bezolanga kikilu Nzambi bevambulwanga y’awana ke besadilanga mana belongokanga ko. Yesu wavova mu kuma ki’awana betondwanga kwa Nzambi vo: “I yau yana, ovo bawidi e diambu muna ntim’ambote asonga, betatila dio, beyima mbongo muna luzindalalu.”—Luka 8:15.

Muna zaya diaka maka mambu tanga kapu kia 10 kia nkanda wau, wavaikiswa kwa Mbangi za Yave. O Nkand’a Nzambi Adieyi Kieleka Kelonganga?

[Foto ina muna lukaya lwa 16]

Ambasi besadisanga akwa ntima mia nsongi mu yikama e nkutakani ya Akristu