Longoka Muna Nkand’a Nzambi

Adieyi i Kani dia Nzambi mu Kuma kia Ntoto?

Elongi diadi dina ye yuvu olenda kivanga yo songa vana olenda tangila e mvutu za yuvu yayi muna Nkand’aku a Nzambi. Mbangi za Yave bena ye kiese kia kusasila e mvutu zazi.

1. Adieyi i Kani dia Nzambi mu Kuma kia Ntoto?

O ntoto i fulu kia wantu. Vava kasema e mbasi kun’ezulu, Nzambi wavanga muntu kimana kazingila ova ntoto. (Yobi 38:4, 7) E kiaki i kuma Yave katudila muntu antete muna paradiso eyi kayikila vo mpatu a Edene. Wansila o nsilu kumosi ye mbongo andi wa vwa e moyo a mvu ya mvu ova ntoto.—Etuku 2:15-17; tanga Nkunga 115:16.

E mpatu a Edene fulu kiakete kaka kiakala. Yakala yo nkento antete, Adami yo Eva, badi wuta o wana. Ekolo lutangu lwa wantu lwadi wokela, badi vata o ntoto yo kitula wo se paradiso. (Etuku 1:28) E ntoto ke ufwaswa nkutu ko.—Tanga Nkunga 104:5.

2. Ekuma o ntoto ke una paradiso ko?

Adami yo Eva bakolamena Nzambi, muna kuma kiaki bayingwa muna mpatu a Edene. E paradiso yavila, ke vakala muntu ko olenda yo vutula. Nkand’a Nzambi uvovanga vo: “E nza iyekwelo vana koko kwa kimpumbulu.”—Yobi 9:24; tanga Etuku 3:23, 24.

Kansi, o Yave kavilakana ekani diandi ko mu kuma kia wantu ngatu funga. (Yesaya 45:18) Ovanga mawonso kimana o wantu bazinga yakwele mvu.—Tunga Nkunga 37:11.

3. Nzambi aweyi kevutulwisila luvuvamu ova ntoto?

O wantu muna kala yo luvuvamu, e ntete, Nzambi ofwasa yimpumbulu. Muna vita ya Armangedo, mbasi za Nzambi befwasa awonso besianga Nzambi kitantu. Satana osiwa mu pelezo mu 1000 dia mvu, vo i awana bezolanga Nzambi, bevuluzwa yo yangalela e nz’ampa.—Tanga Lusengomono 16:14, 16; 20:1-3; 21:3, 4.

  4. E mpasi nkia ntangwa zifokoka?

Muna kolo kia 1000 dia mvu, Yesu oyala e nza tuka kun’ezulu yo vutulwisa yo se paradiso. Okatula mpe masumu ma awana bezolanga Nzambi. Yesu ofokola mayela, kinunu yo lufwa.—Tanga Yesaya 11:9; 25:8; 33:24; 35:1.

Nkia ntangwa Nzambi kefwasa e yimpumbulu ova ntoto? Yesu wayika “sinsu” yadi songa vo e mbaninu ifinamene. O mambu mevangamanga ova nza mesianga e zingu kia wantu mu vonza, mesonganga vo mu lumbu ‘yambaninu a tandu’ kiaki tuzingilanga.—Tanga Matai 24:3, 7-14, 21, 22; 2 Timoteo 3:1-5.

5. Nani ozingila muna Paradiso?

Yesu wavovesa alandi andi bakitula wantu s’alongoki yo kubalonga nzila za Nzambi. (Matai 28:19, 20) Omu nz’amvimba, Yave okubikanga mazunda ye mazunda ma wantu kimana bazinga muna nz’ampa. (Sefaniya 2:3) Muna Maseka ma Kintinu ma Mbangi za Yave, wantu belongokanga una balenda kadila akala ye mase mambote, akento ye ngudi zambote. Mase yo wana belongokanga kumosi mambu malenda kubasadisa mu kwikila muna vuvu kiasikila kia kusentu.—Tanga Mika 4:1-4.

Muna Seka dia Kintinu, owanana yo wantu bezolanga Nzambi ye awana belongokanga una balenda kunyangidikila.—Tanga Ayibere 10:24, 25.

Muna zaya diaka mambu makaka, tala kapu kia 3 kia nkanda wau, wavaikiswa kwa Mbangi za Yave. O Nkand’a Nzambi Adieyi Kieleka Kelonganga?