Longoka Muna Nkand’a Nzambi

Ekuma Nzambi Keyambulwilanga e mbi ye Mpasi?

Elongi diadi dina ye yuvu ikutokanesanga ye disonga vana olenda tangila e mvutu za yuvu yayi muna Nkand’aku a Nzambi. Mbangi za Yave bena ye kiese kia kusasila e mvutu zazi.

1. E mbi aweyi yayantikila?

E mbi yayantika ova ntoto vava Satana kavova luvunu lwantete. Satana kakala vangwa kiambi ko vava kasemwa. Mbasi alunga kakala kansi “katelamena muna ludi ko.” (Yoane 8:44) Wazola vo kasambilwa vana fulu kia Nzambi. Satana wavuna Eva wa nkento antete, wanleba kimana kanlemvokela vana fulu kia Nzambi. Adami wayikama Eva muna kolamena Nzambi. O ukolami wa Adami watwasa mpasi yo lufwa.—Tanga Etuku 3:1-6, 17-19.

Vava Satana kafila Eva mu kolamena Nzambi, kimfumu kia Nzambi katelamena. O unu, ulolo wa wantu beyikamanga Satana muna bembola Luyalu lwa Nzambi. Muna kuma kiaki, Satana wakituka se ‘nyadi a nza yayi.’—Tanga Yoane 14:30; Lusengomono 12:9.

2. Nga Nzambi mu mpila yambi kasemena vangwa yandi?

O wantu ye mbasi kasema o Nzambi, bavangwa mu mpila yafwana kimana balemvokela e nkanikinu mia Nzambi. (Nsiku 32:5) Nzambi watuvanga ye nswa wa sola edi diambote y’edi diambi. O nswa wau ukutuvananga elau dia songa o zola kweto muna Nzambi.—Tanga Yakobo 1:13-15; 1 Yoane 5:3.

3. Ekuma Nzambi keyambulwilanga e mpasi?

Tuka kolo, Yave oyambulanga vo kimfumu kiandi kiatelamenwa. Ekuma? Muna songa vo kondwa kwa luyalu lwa Nzambi, ke vena luyalu ko lulenda twasa nluta kwa wantu. (Yeremiya 10:23) E ziku kia diambu diadi kitoma monekanga muna lusansu lwa wantu se 6.000 ma mvu miviokele kala. O luyalu lwa wantu lwa funga, ke lulendanga fokola vita ko, umpumbulu, nsoki ye mayela.—Tanga Kimpovi 7:29; 8:9; Roma 9:17.

Nswaswani ye luyalu lwa Satana, awana betondanga Nzambi se Nyadi au, bebakanga nluta. (Yesaya 48:17, 18) Ke kolo ko, Yave ofwasa tuyalu twawonso twa wantu. Awana kaka bena kun’esambu dia Luyalu lwa Nzambi i bevw’e nza.—Yesaya 2:3, 4; 11:9; tanga Daniele 2:44.

  4. O luzindalalu lwa Nzambi nkia lau lukutuvananga?

Satana wavova vo ke vena muntu ko olenda sikila ye kwikizi kwa Yave. O luzindalalu lwa Nzambi lukutuvananga elau mu sola kana vo tuzolele yalwa kwa Nzambi yovo kwa wantu. E mpila zingu kieto kisonganga kana vo nani tusolele.—Tanga Yobi 1:8-11; Ngana 27:11.

5. Aweyi tusolelanga Nzambi se Nyadi eto?

Tukuyisianga kuna sambu dia Luyalu lwa Nzambi vava tusadilanga e nsambila aludi ina e ngwizani ye Nkand’a Nzambi una vo i Diambu diandi. (Yoane 4:23) Nze Yesu, ke tukuyisianga mu mambu ma mbumba ko yovo nwana e vita.—Tanga Yoane 17:14.

Satana osadilanga e nkum’andi muna nungununa zumba ye mavangu mambi. Vava tubembolanga mavangu mama, akundi eto ye yitu yeto balenda kutuveza yo kutusia e kitantu. (1 Petelo 4:3, 4) Ozevo, tufwete sola. Nga tuvanga kikundi y’awana bezolanga Nzambi? Nga tulemvokela nsiku miandi miansongi? Avo tuvanga wo, tusonga vo Satana nkwa luvunu ona wavova vo kavena muntu ko olenda lemvokela Nzambi.—Tanga 1 Korinto 6:9, 10; 15:33.

Muna zaya diaka mambu makaka tala kapu kia 11 kia nkanda wau wavaikiswa kwa Mbangi za Yave. O Nkand’a Nzambi Adieyi Kieleka Kelonganga?

[Foto ina muna lukaya lwa 16]

Adami wasola e nsola mbi

[Foto ina muna lukaya lwa 17]

E nsola tusolanga isonganga kana vo ku sambu dia kimfumu kia Nzambi tuzolele kala