Yuvu Y’atangi Eto . . .

Nga Akristu Awonso Akwikizi ku Zulu Bekwenda?

▪ Ndonga betanganga e mvovo mia lufiaulwisu mia Yesu vava kavova vo: “Kadi muna nzola kazolele nza o Nzambi i kavanin’o Mwan’andi amosi, kimana konso on’okwikilanga muna yandi ke vila ko, moyo a mvu ya mvu kevwa.” (Yoane 3:16) Nga Yesu edi kazola vova vo awonso besambilanga S’andi, Yave wa Nzambi kun’ezulu bekwenda vwila moyo a mvu ye mvu ye kiese?

Tala e mvovo milenda kusadisa mu yindula: “Ke ven’ona watomboka kun’ezulu ko, ona kaka watuka kun’ezulu, kakulumuka, wa Mwan’a muntu, ona win’oku’zulu.” (Yoane 3:13) E mvovo miami misonganga vo selo yakwikizi kuna nz’ankulu nze Noa, Abarayama, Mose yo Davidi, ke bayenda ku zulu ko. (Mavangu 2:34) Yau awonso akweyi bayenda? Muna mvovo miankufi: Selo yayi yakwikizi mu ziami bena, bafwa, ke bazeye diambu ko, lufuluku bevingilanga.—Kimpovi 9:5, 6; Mavangu 24:15.

O Yesu yandi i muntu antete wavova vo vena ye wantu akaka bekwenda zingila kun’ezulu avo bafwidi. Wavovesa antumwa zandi vo okubakubikila fulu kun’ezulu. (Yoane 14:2, 3) Ediadi diakala se diambu diampa kwa nkangu a Nzambi. I bosi Paulu wa ntumwa wasasila vo vava Yesu kafwa yo fuluka mu kwenda kun’ezulu, Yesu wakubikila alongoki andi zingu kiampa yo kubaziulwila nzila ina wantu ke bakangalelanga ko.—Ayibere 10:19, 20.

Nga ediadi disongele vo akwa kwikizi awonso balenda kwenda kun’ezulu? Ve, o lufuluku kun’ezulu lwavewa kaka kwa fibuka fia wantu. Muna fuku wansuka, Yesu wavovesa alongoki andi vo muna Kintinu ki’ezulu ‘nuvwanda vana kunda, nwafundisa.’ Muna kuma kiaki, o yala kumosi yo Yesu kun’ezulu i kiyekwa kina bavewa.—Luka 22:28-30.

Ke ntumwa kaka ko bavewa kiyekwa kiaki, vena mpe ye wantu akaka bavewa e vuvu kiaki. Muna mona meso kasongwa, Yoane wa ntumwa wamona Yesu ye buka kia wantu bafuluka kun’ezulu bayikilwa vo ‘kintinu ye anganga beyala ova nza.’ (Lusengomono 3:21; 5:10) Wantu kwa bakala ko? Nze una uvangamanga muna tuyalu twawonso, akete kaka beyalanga. Diau adimosi mpe divangamanga muna Kintinu ki’ezulu. Yesu wa Mwan’ememe a Nzambi, oyala ye 144.000 “basumbuka vana vena wantu.”—Lusengomono 14:1, 4, 5.

Kieleka, 144.000 i lutangu lusundidi o kete avo tutezanese yo lutangu lwa selo yawonso yakwikizi tuka kuna nz’ankulu yamu wau. Ediadi dialudi kadi 144.000 befulwanga mu kwenda kun’ezulu mu sala e salu kiavauka kina bavewa. Avo nzo ozolele tungisa, nga obokela wantu awonso bazeye tunga muna zunga kiaku? Ve. Wantu akete kaka ovwa o mfunu. Diau adimosi mpe, ke selo yawonso ko yakwikizi besolwanga kwa Nzambi benda yala kumosi yo Kristu kun’ezulu.

O luyalu lwalu lw’ezulu lulunganesa ekani dia Nzambi mu kuma kia wantu. Yesu ye 144.000 keyala yau bevit’o ntu muna salu kia kitula o ntoto se paradiso, kimana selo yawonso yakwikizi ova nza bazinga mo ye kiese yakwele mvu. (Yesaya 45:18; Lusengomono 21:3, 4) Muna paradiso mu zinga mpe awana befulwa bena muna nyindu a Nzambi.—Yoane 5:28, 29.

Selo yawonso yakwikizi ya Yave tuka kuna nz’ankulu yamu wau, balenda vwa lukau lwa moyo a mvu ya mvu. (Roma 6:23) Akete kaka bevwila o moyo kun’ezulu mu kwenda sala e salu kiamfunu bavewa, ndonga yawonso bevwila moyo ova ntoto ukitulwa se paradiso.