Yuvu Y’atangi Eto . . .

Nga Bilungi i Fulu kia Tiya Kibangikilwanga o Wantu?

▪ Muna Nsangu Zambote za soneka antumwa, Yesu walukisa alongoki andi mu kuma kia nzengo a bilungi. Ediadi disonganga vo lulukisu lwa Yesu ke diambu diansaka ko. Nga lubangamu lwakwele mvu kayika?—Matai 5:22.

Entete, yambula twabadika e mvovo wau. E mvovo wa Kingerekia Ge’en·na ngwizani una ye mvovo wa Kiyibere geh Hin·nom, una ye nsasa vo, ‘ndimb’a Inomi’ yovo geh veneh-Hin·nom “ndimb’a wan’a Inom.” (Yosua 15:8; 2 Ntinu 23:10) O unu, e fulu kiaki kiyikilwanga vo Wadi er-Rababi eyenga dianda dina kuna sude ya Yerusaleme.

Muna lumbu ya atinu a Yuda, tuka muna tandu kia nana V.T.K, esi zula basadilanga e fulu kiaki mu sambila nzambi zau za luvunu yo yoka wan’au se kimenga vana tiya. (2 Tusansu 28:1-3; 33:1-6) Yeremiya wa ngunza wasakula vo e fulu kiaki kikituka se fulu kiavondela Ayuda befundiswa kwa Nzambi mu kuma kia bi wau vana moko ma esi Babele. *—Yeremiya 7:30-33; 19:6, 7.

Nkwa ngangu mosi wa mwisi Yuda, David Kimhi muna tandu kia (1160-1235 T.K.) wavova vo, e fulu kiaki kiakitulwa se fuku dia lozela e mvindu muna mbanz’a Yerusaleme. Kiasadilwanga mu yoka e titi, e tiya twatu ke twazimanga ko. Konso lekwa kiavetwanga vana fulu kiaki, kiabomonwanga yo kituka se ntoto ampolo.

Asekodi ayingi a Nkand’a Nzambi basoba e nsas’a mvovo Ge’en·na yo sekola wo vo “bilungi bia tiya.” (Matai 5:22) Ekuma? E kuma kadi bawizanesa o mvovo wau ye vangu dia esi zula dia sia vo, kimpumbulu avo ofwidi wayokwanga vana tiya kuna ndimba wakala kuna mbazi a Yerusaleme. Kansi, Yesu kasidi sadila e mvovo Gehenna ko ye nsas’a yoka muntu vana tiya.

Yesu wazaya wo vo evangu dia yoka o wantu vana tiya dia ngemi kwa Yave wa S’andi ezulu. Mu kuma kia mpila ina o mvovo Gehenna wasadilwanga muna lumbu ya Yeremiya wa ngunza, Nzambi wavova vo: “Batungidi mabata ma Tofete, mena muna ndimb’a mwan’a Inomi, bayoka wan’au amakala y’amakento muna tiya: ediadi kikanikini dio ko, ngatu kala mu ntim’ame.” (Yeremiya 7:31) Vana ntandu, e ngindu za sia vo amafwa bebangikwanga vana tiya ke zina ngwizani ko ye fu ya Nzambi a zola kumosi ye dina Nkand’a Nzambi ulonganga vo amafwa “ke bazeye diambu ko.”—Kimpovi 9:5, 10.

Yesu wasadila e mvovo “Gehenna” muna songa lufwasu lwakwele mvu lw’awana befundiswa kwa Nzambi. Muna kuma kiaki, e mvovo “Gehenna” nsasa mosi wina ye mvovo “eyanga dia tiya” uyikwanga muna nkanda Lusengomono. E mvovo miami miau miole lufwasu lwakwele mvu misonganga, kavena vuvu kia lufuluku ko kw’awana bekwendanga ko.—Luka 12:4, 5; Lusengomono 20:14, 15.

[Mvovo Vana Yand’a lukaya]