Longoka Muna Nkand’a Nzambi

Aweyi Olenda Zayila e Nsambila Aludi?

Elongi diadi dina ye yuvu olenda kivanga yo songa vana olenda tangila e mvutu za yuvu yayi muna Nkand’aku a Nzambi. Mbangi za Yave bena ye kiese kia kusasila e mvutu zazi.

1. Nga vena ye nsambila imosi kaka aludi?

Yesu nsambila imosi kaka kalonga kwa alongoki andi: I nsambila aludi. Ina nze nzila ifilanga ku moyo. Mu kuma kia nzila yayi, Yesu wavova vo: “Ke bengi ko ana besolola yo.” (Matai 7:​14) Nzambi nsambila imosi kaka ketondanga ina ngwizani ye Diambu diandi dina vo i ludi. Asambidi awonso aludi bayikiakana muna lukwikilu lumosi.​—⁠Tanga Yoane 4:​23, 24; 14:6; Efeso 4:​4, 5.

2. Ekuma mabundu mayingi bekiyikilanga vo Akristu?

Ngunza za luvunu beyivisanga mabundu ma Kikristu muna sia e zolela ya yau kibeni va fulu kiantete. Nze una Yesu kasakula, bekuyisonganga nze “mameme,” kansi bena se mevwa mansita. (Matai 7:​13-15, 21, 23) Akristu awaya aluvunu babundumuka vava kiafwa antumwa za Yesu.​—⁠Tanga Mavangu 20:​29, 30.

3. Nkia fu iswaswanesanga asambidi akieleka?

Asambidi akieleka bezitisanga o Nkand’a Nzambi nze Diambu dia Nzambi. Besianga e ngolo za zingila e ngwizani ye nkanikinu miandi. Muna kuma kiaki, e nsambila aludi yaswaswana kikilu ye nsambila zilonganga ngindu za wantu. (Matai 15:​7-9) Asambidi akieleka bezingilanga e ngwizani ye mana belonganga.​—⁠Tanga Yoane 17:17; 2 Timoteo 3:​16, 17.

E nsambila akieleka yizitisanga e nkumbu a Nzambi, Yave. Yesu wazayisa e nkumbu a Nzambi. Wasadisa wantu bazaya Nzambi yo kubalonga vo basamba kimana e nkumbu a Nzambi yaveleleswa. (Matai 6:⁠9) Muna zunga kiaku, aki nani bekasakesanga wantu mu sadila nkumbu a Nzambi?​—⁠Tanga Yoane 17:26; Roma 10:​13, 14.

4. Aweyi olenda zayila asambidi akieleka?

Akristu akieleka, besamunanga Kintinu kia Nzambi. Nzambi watuma Yesu muna samuna nsangu za Kintinu. Kintinu kia Nzambi kaka kifokola e mpasi za wantu. Yesu wakwamana samuna e nsangu zazi yamuna lumbu kia lufwa lwandi. (Luka 4:43; 8:1; 23:​42, 43) Wavovesa alandi andi basamuna e nsangu za Kintinu kia Nzambi. Avo muntu wizidi ku nzo aku mu kusamwinina e nsangu za Kintinu kia Nzambi, adieyi i dibundu diandi?​—⁠Tanga Matai 10:7; 24:⁠14.

Alandi a Yesu ke ba nza yayi yambi ko. Ke bekuyisianga mu mambu ma tuyalu ko, ngatu mu ntantani za yintwadi ya nza. (Yoane 17:​16) Ke betangininanga mavangu mambi ko ye fu ya nza yayi.​—⁠Tanga Yakobo 1:27; 4:⁠4.

5. Nkia sinsu kiswaswanesanga Akristu akieleka?

Akristu akieleka bezolanga muntu yo nkw’andi. Belongokanga muna Nkand’a Nzambi vo bazitisanga wantu a mpila zawonso. Kana una vo esi mabundu ma luvunu beyikamanga e vita za zula, Akristu akieleka ke bevanganga wo ko. (Mika 4:​1-4) Kuna mvevo wawonso besadilanga ntangwa ye mavwa mau muna sadisa akaka.​—⁠Tanga Yoane 13:​34, 35; 1 Yoane 4:​20, 21.

Aki nani besadilanga o Nkand’a Nzambi, zitisa nkumbu a Nzambi yo samuna vo Kintinu kiandi i kiau kaka kifokola e mpasi zawonso za wantu? Aki nani besonganga o zola, ye ke beyikamanga vita ko? E ziku kisonganga vo Mbangi za Yave.​—⁠1 Yoane 3:​10-12.

Muna zaya diaka mambu makaka, tanga kapu kia 15 kia nkanda wau wavaikiswa kwa Mbangi za Yave O Nkand’a Nzambi Adieyi Kieleka Kelonganga?

 Foto ina muna lukaya lwa 16]

“Bekusanang’o zaya Nzambi; kansi muna mavangu mau nkalu bekumvananga.”​—⁠Tito 1:16