Finama Nzambi

‘E Yave, . . . Ngeye Unzeye’

E DIAMBU disundidi tokanesa muntu i zaya vo ke vena muntu ko okumbakulanga ngatu kumvwa o mfunu.” * Nga wamona wo kala e? Nga wamona kala vo ke vena muntu ko okuvwanga o mfunu ngatu bakula e ngindu zaku? Avo i wau, olenda fiaulwiswa mu zaya vo Yave ovwanga kikilu asambidi andi o mfunu yo zaya mawonso mekubabwilanga mu zingu kiau kia lumbu ke lumbu. E mvovo mia Davidi muna Nkunga 139 misonganga e ziku kia diambu diadi.

Davidi wakala ye ziku vo Nzambi wamvwanga o mfunu i kuma kavovela vo: “E Yave, nge wansete yo kunzaya.” (Tini kia 1) Muna sono kiaki, Davidi mvovo miambote kasadidi. E mvovo wa Kiyibere wasekolwa vo ‘sata’ una ye nsasa vo tima matadi mantalu (Yobi 28:⁠3), laya nsi (Afundisi 18:⁠2) yovo fimpa e diambu (Nsiku 13:14). Elo, Yave otomene kutuzaya, ofimpanga mawonso ma zingu kieto. Muna sadila mvovo “wansete,” Davidi okutulonganga vo Nzambi ovwanga konso muntu muna selo yandi o mfunu. Okubasatanga emvimba yo zaya muntu muntu muna yau.

Muna songa vo Nzambi okutusatanga mu mpila zayingi, Davidi wavova vo: “Ozeye mfong’ame ye ntelam’ame, obakula ngyindu zame o vala.” (Tini kia 2) Elo, Nzambi ozayanga vava tufonganga, musungula vava tuvundanga ku mfoko a salu kieto kia lumbu ye vava tusikamanga mu mene mu yantika diaka e salu yeto ya lumbu ke lumbu. Ozayanga mpe ngindu zeto, i sia vo, luzolo ye makani meto. Nga Davidi wamonanga wonga wau vo Nzambi wansatanga emvimba? Ve. Wazolanga vo Nzambi kansata. (Tini kia 23, 24) Ekuma?

Davidi wazaya wo vo Yave una ye kuma kiasikila mu fimpanga asambidi Andi. Wasoneka mu kuma kiaki vo: “[Oteza, NW] ngyend’ame ye ndavalal’ame, ozeye nzila zame zawonso.” (Tini kia 3) Lumbu yawonso Yave omonanga ‘ngyenda zeto zawonso,’ i sia vo mpilakanu zeto ye mavangu meto mambote. Nga Nzambi osianga e sungididi mu mbi yovo mu mambote tuvanganga? E mvovo wa Kiyibere wasekolwa vo “teza,” una ye nsasa vo “fimpa” yovo “vambula” nze una mvati a nzengo kevambulwilanga mbongo ambote ye mbongo ambi. E mvovo wa Kiyibere “ozeye,” una ye nsasa vo tonda yovo “yangalela.” Vava Yave kefimpanga e mvovo ye mavangu ma lumbu ke lumbu ma selo yandi, oyangalelanga mambote bevanganga. Ekuma? Kadi oyangalelanga e ngolo bevanganga mu kunyangidika.

O Nkunga 139 utulongele vo Yave otoma lunga-lunganga e selo yandi. Okubasatanga yo kubatala ekolo besalanga e salu yau ya lumbu ke lumbu. Muna kuma kiaki, ozeye mambu mekubatokanesanga yo bakula e mpasi bemonanga muna ngindu ye mu ntima. Nga ozolele sambila Nzambi ndioyo otokananga muna wete dia selo yandi? Avo i wau, kala ye ziku vo: Yave kalendi nkutu ‘vilakana salu kiaku ko, yo zola osonganga muna nkumbu andi.’​—⁠Ayibere 6:10.

[Mvovo Vana Yand’a lukaya]