Nga Wana Bafwete Longoka Mambu ma Nzambi?

“Tuvwidi ulolo wa mabundu mu kutulonga mu menga akw’eto, ke mukutufila ko twazolana muntu yo nkw’andi.” U kavova​—⁠JONATHAN SWIFT, NSONEKI WA MWISI GRÃ-BRETANHA.

NSONEKI ndioyo wavova e mvovo miami muna tandu kia 18, kansi o unu ndonga bekwikilanga mu mvovo miandi. Kieleka, akaka bekwikilanga vo mase ke bena yo nswa ko wa longa mambu ma Nzambi kwa wan’au. Beyindulanga vo wana besansukilanga muna nzo za mikwikizi ke besansukanga mu mpila yambote ko.

Adieyi obenze? Nkia mvovo mina mialudi muna mvovo milende?

● Amase ke bena ye nswa ko wa longa wan’au mambu ma Nzambi.

● Amase bafwete vingila yavana wan’au bekula, i bosi bekubalonga oma ma Nzambi.

●Ekolo wana bakinu bakete, mase bafwete kubalonga mana bekwikilanga mu kuma kia Nzambi. Kansi vava bekula, mase bafwete kubakasakesa basia e sungididi kiau muna mambu ma yau kibeni.

● O wana bafwete landa lukwikilu lwa mase mau lembi lo katikisa.

Nga Dibundu Wana Dimwesanga e Mpasi?

Ke vena se dianzodi ko ozolanga mwesa o mwan’andi e mpasi. Mambu mebwanga nkia ziku mesonganga? Nga mekwikidisanga e mvovo mi’awana bevovanga vo o wana ke bafwete longwa mambu ma Nzambi ko? Tuka kolo, afimpi a mambu belongokanga e diambu diadi mu zaya kana vo lukwikilu lwa mase lulenda twasa nluta kwa wan’au. Nkia diambu babakula?

Afimpi a mambu babakula vo vana fulu kia mwesa wana e mpasi, e dibundu nluta miambote ditwasanga muna lunungunuku lwa mwana. E nsangu zasonama muna zulunalu Social Science Research * mu mvu wa 2008 zivovanga vo: “E dibundu diwokesanga e ngwizani vana vena mase yo wana ye kwa mase ye ngudi. E dibundu ye fu kia lunga-lunga e nsatu za mwanda za wana, i mambu mamfunu muna zingu kia wana ye mesadisanga mu siamisa e ngwizani ya esi nzo.” Nanga omwene una mvovo miau mifwananene ye mvovo mia Yesu Kristu vava kavova vo: ‘Akwa nsambu awana bazeye nsatu zau za mwanda.’​—⁠Matai 5:⁠3.

Adieyi tuvova mu kuma kia ngindu za sia vo o wana bafwete kula ntete, i bosi belongwa mambu ma Nzambi ye ma dibundu? E ngindu zazi ke zina ngwizani ko ye mvovo emi: Ngindu za mwana zina nze katini kiakondwa má, kivavanga vo kiazadiswa. Kieleka, divavanga vo mase basola kana vo bezadisa “katini” kuna nzo ye nkanikinu mia nkal’ambote ye mambu mambote bekwikilanga mu kuma kia Nzambi yovo beyambula vo wantu kuna mbazi bazadisa mambu mambi muna ngindu ye ntima wa mwana.

Ayeyi i Mbumba?

Lusansu lusonganga vo mambu melongwanga muna mabundu mesianga wantu mu mpasi yo kubafila mu lembi zola akw’au. Ozevo, mase aweyi balenda vengela e diambu dina Jonathan Swift kayikidi kuna lubantiku lw’elongi diadi? Aweyi balenda longela wan’au mambu ma Nzambi malenda kubasadisa mu zola akw’au?

E mvutu zina muna yuvu tatu yilende: (1) O wana nkia mambu bafwete longoka? (2) Nani ofwete kubalonga? (3) Nkia ndekwa zilenda sadilwa muna toma kubalonga?

[Mvovo Vana Yand’a lukaya]