Longoka Muna Nkand’a Nzambi

Aweyi esi nzo aku Balenda Kadila ye Kiese?

Elongi diadi dina ye yuvu ikutokanesanga ye disonga vana olenda sololwela e mvutu za yuvu yayi muna Nkand’aku a Nzambi. Mbangi za Yave bena ye kiese kia kusasila e mvutu zazi.

1. Ekuma o kazala kwinina o mfunu muna kala ye zingu kia nzo kiakiese?

Yave wa Nzambi akiese yandi i tuku dia longo. O sompana mfunu kwina muna kala ye zingu kia nzo yakiese kadi kusadisanga akazi bazinga vamosi yo sansa o wana mu mpila yambote. O Nzambi aweyi kebadikilanga longo? Ozolanga vo longo lwazinga yakwele mvu, yakala yo nkento bafwete sonekesa longo lwau kwa luyalu. (Luka 2:​1-5) Nzambi ozolanga vo akazi basonganga kwikizi muntu yo nkw’andi. (Ayibere 13:4) Yave otondanga kaka vo Nkristu kavonda longo yo sompa diaka, avo nkaz’andi otele zumba.​—Tanga Matai 19:​3-6, 9.

2. Yakala yo nkento aweyi bafwete kadilanga muntu yo nkw’andi?

Yave wasema yakala yo nkento muna salaziana. (Etuku 2:​18) Wau vo yakala i ntu, kafwete vitang’o ntu mu lungisa nsatu za nitu za esi nzo andi yo kubalonga oma ma Nzambi. Kafwete toma zolanga nkaz’andi. Yakala yo nkento bafwete zolananga yo songaziana o zitu. Wau vo akala ye akento wantu alembi lunga, o zaya loloka i nsabi muna kala ye longo lwakiese.​—Tanga Efeso 4:​31, 32; 5:​22-25, 33; 1 Petelo 3:7.

3. Nga ofwete vambana yo nkaz’aku avo kuna ye longo lwakiese ko?

Avo ngeye yo nkaz’aku ke nuwizananga ko, nusia e ngolo mu vangila mawonso kuna zola. (1 Korinto 13:​4, 5) Diambu dia Nzambi ke dilonganga ko vo vambana i nzil’a fokolwela e ntantani muna longo. Kansi, avo vabwidi diambu disianga moyo andi mu vonza, Nkris­tu olenda bak’e nzengo za vambana yovo ve yo nkaz’andi.​—Tanga 1 Korinto 7:​10-13.

4. Wana, adieyi Nzambi kevavanga kwa yeno?

Yave ozolele vo nwakala ye kiese. Okunuvananga malongi mambote mu kuma kia una nulenda kadila ye kiese muna kileke kieno. Ozolanga vo nwabak’e nluta muna ngangu ye mambu mayingi mana mase meno bazeye. (Kolosai 3:​20) Yave oyangalelanga mawonso nuvanganga muna kunkembelela.​—Tanga Kimpovi 11:9–12:1; Matai 19:​13-15; 21:​15, 16.

5. Mase, aweyi wan’eno balenda kadila ye kiese?

Nufwete sia ngolo za vavila wan’eno madia, fulu kia leka ye mvwatu. (1 Timoteo 5:8) Kansi, o wan’eno muna kala ye kiese, nufwete mpe kubalonga bazola Nzambi yo longoka mambu mandi. (Efeso 6:4) E mbandu eno ya songa zola kwa Nzambi ilenda simba ntima mia wan’eno. Avo nusadidi Nkand’a Nzambi, malongi meno malenda soba e ngindu za wan’eno.​—Tanga Nsiku 6:​4-7; Ngana 22:6.

 Wana beyangalalanga vava mase mau bekubakasakesanga yo kubasanisina. Elongi ye tumbu mpe bevwang’o mfunu. Ovanga wo disadisa wana mu lembi landa nzila zikubatwasila mpasi muna zingu. (Ngana 22:​15) Kansi, ke diambote ko mu kubamwesa e mpasi yovo kubavangila mambu ma ngolo-ngolo.​—Tanga Kolosai 3:21.

Mbangi za Yave bevaikisanga nkanda mia mpila mu mpila mu sadisa mase yo wana. Malongi mena mu nkanda miami mu Nkand’a Nzambi metukanga.​—Tanga Nkunga 19:​7, 11.

Muna zaya diaka mambu makaka, tala kapu kia 14 kia nkanda wau wavaikiswa kwa Mbangi za Yave. O Nkand’a Nzambi Adieyi Kieleka Kelonganga?