Ekuma Tufwete Lemvokela Nkanikinu mia Nkand’a Nzambi?
Ekuma Tufwete Lemvokela Nkanikinu mia Nkand’a Nzambi?
NGA e nkanikinu mia Nkand’a Nzambi mu kuma kia vukana miaviokela e ntangwa yovo miabala? Ve. Kadi, e nkanikinu mia Nkand’a Nzambi milenda kutusadisa mu venga:
▪ Yimbevo yisambukilwanga muna vukana
▪ Yimita lembi kala wasompa
▪ Ntantu zitwasanga longo lwa lembi sikila
▪ Ntona zayiva
▪ Nsoni za sakanenwa kw’akaka
Yave wa Nzambi, * wa Mvangi eto, ozolele vo wamona e kiese ye vwa nluta miasadila lukau lwandi. O Nzambi yandi “okulong’oma ma mfunu.” (Yesaya 48:17) O muntu olemvokelanga e nkanikinu mia Nkand’a Nzambi mu kuma kia vukana ovwa:
▪ Edienga dia Nzambi
▪ Luvuvamu lwa ntima
▪ Ngwizani ambote muna nzo
▪ Nkumbu ambote
▪ Zitu
Adieyi tuvova kele vo kuzitisanga nsiku mia nkal’ambote ko mina muna Nkand’a Nzambi? Nga olenda soba e mpila zingu kiaku? Nga Nzambi osinga kutumba mu kuma kia mpila zingu wakala kiau?
Badika e diambu edi: Muna nkutakani y’Akristu muna tandu kiantete, mwakala y’awana bateka kala akwa ngyambila, minta-zumba kumosi y’awana bakala ye fu kia leka y’akw’au akala. Babaka e nzengo za soba e mpila zingu kiau yo vwa e nluta miayingi. (1 Korinto 6:9-11) O unu wantu ayingi mu nza yawonso bevanganga diau adimosi. Bayivevola muna zingu kia umpumbulu yo vwa e nluta mia zingila ngwizani ye nkanikinu mia Nkand’a Nzambi. Badika e nona kia Sarah, ona tuyikidi mun’elongi diantete.
“Yavevoka Vana Vau”
Sarah wabakula vo kakala ye luvevoko ko muna mpil’a zingu kakala kiau ngatu kiese kina kavavanga. Wavova vo: “Yamonanga vo e ntona zame ke zasalanga diaka mu mpila yambote ko. Nsoni yamonanga yo wonga wa yimita yovo sambukila kimbevo kiambi. Kiasala vilakana ko vo Nzambi una, yazaya wo vo e mpila zingu kiame ke kianyangidikanga ko. Yayimwenanga vo yafunzuka, ediadi diantokanesanga kikilu.”
Kuna kwalanda, Sarah wavanga e ngolo mu soba e zingu kiandi. Wavava lusadisu kwa mase mandi, ana bena vo Mbangi za Yave. Walomba mpe lusadisu kw’akuluntu Akristu muna nkutakani andi. Sarah wavova vo: “Yasivika o zola kuna mase mame y’akuluntu muna nkutakani bansonga. Yavevoka vana vau.”
Owau, Sarah wana wole kesansanga yandi mosi. Sarah wavova vo: “Ivovesanga wan’ame ye ziku kiawonso mu kuma kia nsola yavanga. Nzolele vo babakula e mfwilu yabaka mu lembi lemvokela e nkanikinu mia Nzambi. Ekani diame i kubasadisa mu zaya e nluta balenda vwa muna nitu ye ngindu avo balemvokele e nkanikinu mia Nzambi mu kuma kia vukana. Ngina ye ziku vo Nzambi okutuvananga nsiku mia nkal’ambote kadi kazolele ko vo twamona e mpasi.”
Ongeye mpe olenda vwa e nluta mia lemvokela e nkanikinu mia Nzambi. O Nkand’a Nzambi usianga nsilu vo: “Malongi ma Yave mansongi, memwesa ntim’e kiese. O nkanikinu a Yave wavelela, ukiesa meso. . . . Muna lunda zo i mwina nsendo ayingi.”—Nkunga 19:8, 11. *
[Mvovo Vana Yand’a lukaya]
^ tini. 8 Yave i nkumbu a Nzambi yasonamana muna Nkand’a Nzambi.
^ tini. 20 Muna zaya diaka mayingi mu kuma kia nkanikinu mia Nkand’a Nzambi, vava Mbangi za Yave mu zunga kieno. Yovo twika nkanda muna fulu ina muna lukaya lwa 4 yovo tala nzil’a Mbangi za Yave muna Internete, www.watchtower.org.
[Mvovo mia Sina muna lukaya lwa 8]
O veza e nkanikinu mia Nkand’a Nzambi mpasi ye ntantu ditwasanga
[Mvovo mia Sina muna lukaya lwa 9]
Awana belemvokelanga nkanikinu mia Nkand’a Nzambi bena ye ntona zambote ye ngwizani ambote y’esi nzo
