Nga Ozeye?

Nkia lekwa ya ‘se kia mbankanka’ iyikwanga muna nkand’a Luvaiku?

▪ Lusansu lwa Nkand’a Nzambi lusonganga vo e nlele miasadilwanga nze yaka ye mwelo a saba (tabernáculo), fulu kia nsambila kuna Isaele yankulu, mu “se ki’ebundi ye nduwa ye mbankanka” miavangilwanga. (Luvaiku 26:1; 38:​18) E “mvwatu miavauka” mia nganga mpe mu ‘se kia mbankanka’ (yovo mbwaki) miavangilwanga.​—Luvaiku 28:​1-6.

Má yakete-kete yamoyo yasadilwanga mu vaikisa maza ma se kia mbwaki yatoma twá. E má yayi yamoyo ke ina ye mave ko, mu nti uyikilwanga vo carvalho ikalanga, nti wau utoma monekanga kuna Oriente Médio ye mu nsi zina lukufi ye Mbu a Mediterrâneo. Se kiaki kia mbwaki muna maki ma má yayi yamoyo itukanga. Vava bekalanga ye maki, má yayi ikitukanga nze bundu kilenda tezaneswa ye madezo makete-kete. Ilamanga muna ntayi ye makaya ma nti. Avo banonene yo nika yo, ivaikisanga dimbwa kiambwaki kina kiasangwanga ye maza. E maza mama mesadilwanga mu kitula e nlele se wambwaki. Plínio, o Velho, wa nsoneki a lusansu wa mwisi Roma wavovela e se kiaki kiambwaki yo songa vo i kimosi muna se kina wantu batoma zolanga muna tandu kiakina.

Muna awana basoneka e Sono ya Kingerekia ya Kikristu, aki nani bakala muna lumbu kia Pentikosti ya mvu a 33 wa Tandu Kieto?

▪ Dilenda kala vo muna wantu vwa basoneka Sono ya Kingerekia ya Kikristu, sambanu muna yau bakala muna lumbu kia Pentikosti.

Lusansu lwasonama muna Mavangu lusonganga vo Yesu wakanikina alongoki andi vo: ‘Ke bakatuka muna Yerusaleme ko, bavingila nsilu Ese.’ (Mavangu 1:4) Lusansu lwalu lusonganga mpe vo Matai, Yoane ye Petelo, ana basoneka Nkand’a Nzambi, balemvokela nkanikinu wau yo lungana “vana fulu kimosi” y’alongoki akaka. Abunzi a Yesu mpe bakala mo. (Mavangu 1:​12-14; 2:​1-4) Wole muna yau, Yakobo ye Yuda, basoneka nkanda miole muna Nkand’a Nzambi miyikilwanga muna nkumbu zau.​—Matai 13:55; Yakobo 1:1; Yuda 1.

Muna Nsangu kasoneka Maku, wavovela toko dimosi ona watina muna fuku una Yesu kakangwa. Yandi kibeni kayika, kadi alongoki awonso babembola Yesu muna fuku wauna. (Maku 14:​50-​52) Muna kuma kiaki, nanga Maku i mosi muna wantu antete bakituka alongoki a Yesu. Nanga kakala mpe muna lumbu kia Pentikosti.

O wantu wole basidi mun’awana basoneka e Sono ya Kingerekia ya Kikristu i Paulu yo Luka. Muna Pentikosti ya mvu a 33 wa Tandu Kieto, Paulu kakala nlandi a Kristu ko. (Ngalatia 1:​17, 18) Nanga, Luka mpe kakala ko muna lumbu kia Pentikosti, kadi ke kuyiyikanga ko muna akwa “umbangi wa meso” wa salu kia Yesu.​—Luka 1:​1-3.

 [Foto ina muna lukaya lwa 22]

Má Yamoyo Yasadilwanga Muna Vanga se kia Mbwaki

[Avwe a Foto]

Muna lutumu lwa SDC Colour Experience (www.sdc.org.uk)

[Foto ina muna lukaya lwa 22]

Vava Petelo Kafilanga Elongi Kina kia Pentikosti ya mvu a 33