Mokena oma ma Nkand’a Nzambi—Nga Yesu i Nzambi?

MBANGI ZA YAVE beyangalelanga mokena oma ma Nkand’a Nzambi ye mfinangani zau. Nga vena ye diambu muna Nkand’a Nzambi dina kutoma bakulanga ko? Nga ozolele zaya mana Mbangi za Yave bekwikilanga? Avo i wau, kukadi ye lukatikisu ko mu yuvula mambu mama vava omonana ye Mbangi za Yave. Bekala ye kiese kia mokena yaku e mambu mama.

Tala e mpila moko kina Mbangi za Yave balenda mokena ye mfinangani zau. Yindula vo Mbangi a Yave nkumbu andi Nlandu, wele kuna nzo a Makiese.

Nga Dialudi vo ke Nukwikilanga mu Yesu Ko?

Makiese: O nlongi a dibundu dieto edi kavova vo Mbangi za Yave ke bekwikilanga mu Yesu ko. Nga dialudi e?

Nlandu: Oyeto kwikila tukwikilanga muna Yesu. Kieleka, tuzeye wo vo o kwikila muna Yesu mfunu kwina muna vuluzwa.

Makiese: Omono mpe i diau ikwikilanga.

Nlandu: Ozevo yeto awole tukwikilanga muna diambu diadi. E nkumbu ame Nlandu. Nga lenda kunzayisa e nkumbu aku?

Makiese: E nkumbu ame Makiese. Ngyangalele muna kuzaya.

Nlandu: E Makiese, mono mpe ngyangalele. Nanga okiyuvulanga, ‘Avo Mbangi za Yave bekwikilanga muna Yesu, ekuma wantu akaka bevovelanga vo ke bekunkwikilanga ko?’

Makiese: Mono mpe diau ivavanga zaya.

Nlandu: E Makiese, muna lukufi nzolele kuzayisa vo oyeto kwikila kikilu tukwikilanga muna Yesu, kansi ke tukwikilanga mawonso ko mana wantu bevovanga mu kuma kiandi.

Makiese: Nga lenda vova dina ke nukwikilanga ko mu kuma kia Yesu?

Nlandu: Wantu ayingi bevovanga vo Yesu muntu ambote kaka kakala. Kansi, oyeto ke tukwikilanga wo ko.

Makiese: Mono mpe kikwikilanga wo ko.

Nlandu: Tumwene diaka diambu diakaka dina mono yo ngeye tukwikilanga. Diazole, Mbangi za Yave ke bekwikilanga ko muna malongi mevunisanga dina Yesu kavova mu kuma kiandi yo S’andi.

Makiese: Adieyi ozolele vova?

Nlandu: Mabundu mayingi melonganga vo Yesu i Nzambi. Nanga ongeye mpe i diau bekulonganga.

Makiese: Ingeta, o nlongi eto okutuvovesanga vo Nzambi yo Yesu muntu mosi.

Nlandu: Nga kukwikidi ko vo e mpila yambote ya zayila e ludi mu kuma kia Yesu i fimpa dina kavova mu kuma kia yandi kibeni?

Makiese: Elo, nkwikidi wo.

Adieyi Yesu Kavova?

Nlandu: Yambula twafimpa e sono kia Nkand’a Nzambi kilenda kutusadisa mu bakula diambu diadi. Tala dina tutanganga muna Yoane 6:38. Yesu wavova vo: “Nkulumukini kun’ezulu, ke mu vang’oluame luzolo ko, o luzolo lua ndiona wantuma kaka.” Kele vo Yesu i Nzambi, e mvovo miami ke miadi kala mialudi ko.

Makiese: Adieyi ozolele vova?

Nlandu: O Yesu edi kavova vo wakulumuka kun’ezulu ke mu kwiza vanga olwandi luzolo ko.

Makiese: Elo, edi kavova vo wayiza mu vanga luzolo lwa Ndiona wantuma.

Nlandu: Ozevo, avo Yesu i Nzambi, nani wantuma tuka kun’ezulu? Vana ntandu, ekuma Yesu kasakalela luzolo lwa ndiona wantuma?

Makiese: Owau mu bakula ngina dina ovovanga. Kansi, kikwikidi ko vo sono kimosi kaka kilenda songa vo Yesu ke Nzambi ko.

Nlandu: Badika diaka dina Yesu kavova mu lumbu kiakaka. Ngindu zau amosi kasonga muna kapu kia 7 kia Yoane. Nga lenda tanga muna Yoane 7:16?

Makiese: Ke diambu ko. “O Yesu ubavutwidi vo, Elongi diame ke diame ko, dia ndiona wantuma kaka.”

Nlandu: Ntondele, e Makiese. Mun’owu wa sono kiaki, nga Yesu ngindu za yandi kibeni kalonganga?

Makiese: Ve, edi kavova vo mana kalonganga ma ndiona wantuma.

Nlandu: I wau kikilu. Vena diaka ye yuvu tulenda kiyuvula: ‘Nani watuma Yesu? Nani wanzayisa mana kalonganga?’ Nga muntu ndioyo osundidi Yesu? E ziku kia diambu i kiaki: Ndiona otumanga osundidi ona ketumanga.

Makiese: Dialudi kikilu! Wau i nkumbu wantete ntangidi e sono kiaki.

Nlandu: Badika diaka e mvovo mia Yesu muna Yoane 14:28: “Nuwidi una inuvovese vo, kwenda nkwenda, yakunuyizila. Ovo nunzolele, nuyangalela vo ngyenda kwa Se: e kuma kadi, o Se unsundidi.” Mun’owu wa sono kiaki, o Yesu aweyi kabadikilanga o S’andi?

Makiese: Yesu wavova vo o S’andi unsundidi. Mbwene vo Yesu wabadikilanga Nzambi vo osundidi e wisa.

Nlandu: I wau kikilu. Badika diaka nona kiakaka. Tala dina Yesu kavovesa alongoki andi muna Matai 28:18. Tutanganga vo: “E wisa kiawonso ki’ezulu ye nza kiaveno kwa mono.” Nga Yesu edi kavova vo yandi una ye wisa kiawonso?

Makiese: Ve. Edi kavova vo e wisa kiawonso kiavewa kwa yandi.

Nlandu: Kele vo Yesu i Nzambi, aweyi kadi vaninwa diaka e wisa? Nani wamvana kio?

Makiese: Nzolele yatoma fimpa diambu diadi.

Yo Nani Kavovananga Yandi?

Nlandu: Vena ye diambu diakaka divunisanga vo Yesu i Nzambi.

Makiese: Nkia diambu?

Nlandu: I dina tutanganga mu kuma kia luvubu lwa Yesu. Tala dina diasonama muna Luka 3:​21, 22. Nga lenda tanga sono kiaki?

Makiese: “O wantu awonso una bavubwa, o Yesu mpe kavubwa, yo samba, ezulu diziukidi, o mwand’avelela unkulumukini, muna mpw’a to, nz’eyembe, e ndinga itukidi kun’ezulu vo, Ongeye Mwan’ame anzolwa; omu ngeye i nyangalelanga.”

Nlandu: Nga omwene dina Yesu kavanga vava kavubwa?

Makiese: Wasamba.

Nlandu: Elo. Kansi, olenda kiyuvula: ‘Avo Yesu i Nzambi, kwa nani kasambanga?’

 Makiese: Kiuvu kiambote kikilu. I bosi nkwenda yuvula kwa nlongi eto.

Nlandu: Vena ye diambu diakaka tufwete fimpa. Tumwene vo vava Yesu kavaikanga muna maza, muntu wavova tuka kun’ezulu. Nga omwene dina kavova?

Makiese: Wavova vo Yesu i Mwan’andi, okunzolanga yo kunyangalela.

Nlandu: I wau kikilu. Kansi, avo Yesu i Nzambi, nani wavova mvovo miami tuka kun’ezulu?

Makiese: Kiayindwidi wo ko.

“Se” yo “Mwana.” Ekuma?

Nlandu: Edi diaka tufwete fimpa: Tutanganga vo Yesu wayikilanga Nzambi vo S’andi ezulu. Vava Yesu kavubwa, ndinga yatuka kun’ezulu yayikila Yesu vo Mwan’andi. O Yesu wakiyikilanga mpe vo Mwan’a Nzambi. Owau, kele vo zolele kundonga vo wantu wole bafwanana, nkia nona olenda sadila mu sasila diambu diadi?

Makiese: Ndenda sadila nona kia mpangi zole.

Nlandu: Dialudi. Olenda mpe sadila nona kia Nsimba ye Nzuzi bena vo bafwanana. Kansi o Yesu wayikila Nzambi vo Se, wakiyikila yandi kibeni vo Mwana. Ozevo, adieyi obenze kazola vova o Yesu?

Makiese. Yesu muntu kayika vo unsundidi e kimbuta ye wisa.

Nlandu: I wau kikilu. Badika e diambu edi: Olenda yindula nona kiaki kiambote mu songa wantu wole bafwanana, i sia vo, nona kia mpangi yovo kia Nsimba yo Nzuzi. Kele vo Yesu i Nzambi, nga Yesu una vo Nlongi Anene, kadi sadila nona kiaki ko yovo nona kiakaka kiatoma kiá muna sasila e diambu diadi?

Makiese: Kieleka.

Nlandu: Kansi, Yesu nona kia “Se” yo “Mwana” kasadila mu yika e ngwizani kena yau yo Nzambi.

Makiese: Diambu diamfunu ovovele.

Alandi Antete a Yesu Adieyi Bavova?

Nlandu: Vitila ngyenda, nzolele vo twafimpa diambu diakaka mu kuma kia moko kieto, kele vo una ye ntangwa.

Makiese: Elo, e ntangwa ina.

Nlandu: Avo Yesu i Nzambi, nga alongoki a Yesu ke badi wo vova ko e?

Makiese: Dialudi kikilu.

Nlandu: Kansi, ke vena fulu ko muna Nkand’a Nzambi kisonganga vo i wau balonganga. Tala dina Paulu wa ntumwa una vo mosi mun’alandi andi kasoneka. Muna Filipi 2:​9, wayika dina Nzambi kavanga vava Yesu kafwa yo fuluka: “O Nzambi, kankundidikila kikilu, kakumvana nkumbu ina iviokele nkumbu zawonso.” Mun’owu wa sono kiaki, adieyi Nzambi kavanga kwa Yesu?

Makiese: Kivovanga vo Nzambi wankundidika.

Nlandu: Elo. Kansi, kele vo Yesu wafwanana kakala yo Nzambi vitila kafwa, kuna kwalanda o Nzambi wantudidika, nga Yesu wadi sunda Nzambi? Aweyi kadi sundila Nzambi e wisa?

Makiese: Ve, ke dilendi vangama ko.

Nlandu: Ntondele. Mun’owu wa sono yayi yawonso, nga lenda vova vo Nkand’a Nzambi ulonganga vo Yesu i Nzambi?

Makiese: Ve, ke diau ko ulonganga. Nkand’a Nzambi uvovanga vo Yesu i Mwan’a Nzambi.

Nlandu: I wau kikilu. E Makiese, nzolele kuzayisa vo Mbangi za Yave betoma zitisanga Yesu. Tukwikilanga vo lufwa lwandi nze Masia lwaziula nzila kimana akwa kwikizi awonso bavuluka.

Makiese: Mono mpe i diau nkwikilanga.

Nlandu: Kansi, nanga lenda kiyuvula: ‘Aweyi tulenda songela kwa Yesu vo tuvutulanga matondo wau kafwa muna wete dieto?’ *

Makiese: Itoma kiyuvulanga kiuvu kiaki.

Nlandu: Ndenda vutuka mu kwiza kusonga e mvutu za Nkand’a Nzambi. Nga ku nzo okala mu ola yayi muna lumingu lukwiza?

Makiese: Ingeta, ku nzo ikala.

Nlandu: Ke diambu ko, sala kiambote.

[Mvovo Vana Yand’a]