Aweyi Olenda Zingila ye Nzimbu Zakete

OBED, wana wole kesansanga. Tezo kia mvu kumi kasadila mu otele mosi yampwena kuna mbanza ya nsi mosi ya África. Ke diakalanga diampasi ko kwa yandi mu lungisa e nsatu za esi nzo andi. Ezak’e ntangwa, wayendanga kumosi y’esi nzo andi mu fulu yambote ya nsi au. Mawonso mama mafokoka vava kakatulwa muna salu wau vo lutangu lwa wantu bayendanga muna otele lwakuluka.

Stephen, vioka mvu 22 kasadila ku banco yampwena yo kituka nkutu se mosi muna mfumu za banco yayi. Mawete mayingi katambulanga muna salu kiaki, nze nzo yampwena, ekalu diansisi, selo ya nzo yo fila wana mu sikola zambote. Vava e banco yayantika katula asadi, oyandi mpe wakatulwa muna salu. Stephen wavova vo: “Mono y’esi nzo ame twakendalala kikilu. E vuvu kiame kiadimbuka yo yantika tokana kwayingi.”

Wantu ayingi bebwilwanga mambu mama. Muna kuma kia kuluka kwa nzimbu mu nza yawonso, ndonga bakala ye zingu kiambote bekatulwanga mu salu. Ayingi beyalukanga mu kwenda vavi salu, betambulwilanga futwa nzimbu zakete ekolo e ntalu ya lekwa mu wokela kaka ina. Kiakala mu nsi za umvwama yovo za usukami, ke vena nsi ko ilembi nwananga ye mpasi za nzimbu.

Mfunu wa Kala ye Ngangu

Avo nzimbu zakete tufutwanga yovo tukatwilu mu salu, tulenda lwakilwa kwa ngindu zalembi songa. Dialudi vo, ke tulendi venga mvimba ko o ntelamw’a moyo. Kansi, nkwa ngangu mosi wavova vo: “Ovo ozeza muna lumbu kiampasi, o nkum’aku ukè.” (Ngana 24:10) Vana fulu kia tokana kwayingi mu kuma kia mpasi za nzimbu, tufwete vanga dina tuvoveswanga muna Nkand’a Nzambi vo ‘twalunda ngangu za vimpi.’—Ngana 2:7.

Kana una vo Nkand’a Nzambi ke nkanda wa mambu ma nzimbu ko, malongi mena mo mesadisanga wantu ayingi mu nza yawonso. Yambula twafimpa maka malongi mena muna Nkand’a Nzambi.

Badika e ntalu. Badika mvovo mia Yesu miasonama muna Luka 14:28: “Nani vovo nwina, ovo ozolele o tunga nzo ezulu, kalembi teka vwanda, kabadika ntalu, kana wina y’eki kiamanina?” O lemvokela nkanikinu wau divavanga vo twasikidisa e mpila tusadila nzimbu zeto yo lembi fwasa nzimbu muna lekwa ina ke tuvwidi mfunu ko. Kansi, nze una Obed kavova, o vanga wo ke diambu diakete ko. Wavova vo: “Una kiakatwilu mu salu ko, lekwa yayingi twasumbanga ina ke twavwanga kikilu mfunu ko. Ke twatanga mbalu ko kadi nzimbu zayingi twakala zau za sumbila konso lekwa tuzolele.” O teka sikidisa una tusadila nzimbu dikutusadisa mu sumba kaka lekwa ina esi nzo bavwidi o mfunu.

Soba mpil’a zingu kiaku. O vevola zingu dilenda kala diampasi, kansi mfunu dina. Kingana kimosi kia Nkand’a Nzambi kivovanga vo: “O nlungaladi omwene mbi, oswekamene.” (Ngana 22:3) Stephen wavova vo: “Muna lundidila nzimbu, diavava vo twayaluka muna nzo a yeto kibeni, ina vo yakete ye ke yamanisa tungwa ko muna kati. O wana basoba sikola  zakaka ke zilombanga nzimbu zayingi ko, kansi zilonganga mu mpila yambote.”

Mbokena zambote y’esi nzo mfunu zina muna kulukiana e zingu kiampa. Una kakatwilu ko muna salu, Austin ona wasadila mvu vwa mu banco mosi wavova vo: “Mono yo nkaz’ame twavwanda kimana twasoneka lekwa ina tuvwidi kikilu o mfunu. Twakatula madia mana mefwanga ntalu yayingi, yambula vanga nkangalu miadianga nzimbu zayingi yovo sumba mvwatu miampa miakondwa mfunu. Ivutulanga matondo wau vo esi nzo ame batambulwila vanga nsobani zazi.” Dialudi vo kuna lubantiku, o wana nanga ke bebakula ko ekuma nusobele e mpil’a zingu, kansi yeno mase nulenda kubasadisa mu bakula vo mfunu dina.

Tambulwila salu yakaka. Avo wakulukilwa sala e salu kia masonekeno, o sala e salu ya moko dilenda kala diampasi. Austin wavova vo: “Wau vo mfumu yakala kuna kompani yasadilanga, diampasi kikilu diakala mu tambulwila salu ya moko.” Ediadi ke diasivi ko mu kuma kia dina divovanga Nkand’a Nzambi muna Ngana 29:25: “O wonga wa wantu utwas’enekwa.” O zadisa ngindu zaku ye dina akaka balenda yindula ke dikutwasila nzimbu ko zina olenda sadila mu dikila esi nzo aku. Adieyi dilenda kusadisa mu sunda ngindu zazi zambi?

E nsabi i kala ye lulembamu. Vava kakatulwa muna salu kia otele, Obed wabokelwa kwa nkundi mosi kasalanga yandi kimana kayantika sadila kuna kompani diandi dia vangulula makalu. E salu kiaki kiavavanga vo muntu kenda mu fulu yandá muna nzila zazala ye mbundukutu a ntoto mu kwenda sumba tinta ye sengwa yakaka ya makalu. Obed wavova vo: “Kiazolanga salu kiaki ko, kiamonanga mpe dina mfwete vanga ko mu yangalela e salu kiaki. Kansi, lulembamu lwansadisa mu tambulwila salu kina vo nzimbu zakete kiafutanga avo zitezaneso ye zina yafutwanga kuna kompani yasadilanga entete. Kana una vo i wau, e nzimbu zazi zikunsadisanga mu lungisa nsatu za esi nzo ame.” Nga olenda vanga diau adimosi?

Yangalela ina una yau. Disionario dimosi disasilanga vo nkwa luyangalalu i “ndiona ke vidisanga kiese kiandi ko yo tambulwila e mambu una mena.” Ediadi dilenda moneka diasivi kwa ndiona onwananga ye mpasi za nzimbu. Kansi, badika e mvovo mia Paulu wa ntumwa, ona wazaya e nsas’a kala muna usukami. Wavova vo: “Yalongok’o yangalela konso owu ngina. Nzeye owu wa sakalela, nzeye mpe owu wa wokelela.”—Filipi 4:11, 12.

E zingu kieto o unu kilenda kala kiambote, kansi wau vo mambu soba mesobanga, o mbazi tulenda kala mu mpasi. Tulenda baka nluta muna lemvokela luludiku lwavumunwinwa lwa Paulu, ona wavova vo: “O vumina-Nzambi yo luyangalalu i ndandu kikilu: kansi wau tuna yo dia yo vwata, tuyangalela ko.” Paulu kakasakesa wantu ko vo bakala miolo, kansi wabasonga o mfunu wa lembi sia nsatu za nitu va fulu kiantete.—1 Timoteo 6:6, 8.

Nto a Kiese Kiasikila

O kala ye lekwa yawonso tulenda sumba yovo kala ye umvwama ke ditwasanga kiese kiasikila ko. Yesu yandi kibeni wavova vo: “Edi diviokele e nsambu (yovo kiese), dia vana, ke mu tambula ko.” Elo, e kiese yo luyangalalu lutukanga muna sadila ina tuna yau mu sadisa akaka yo kubakasakesa.—Mavangu 20:35.

O Mvangi eto, Yave wa Nzambi otomene zaya e nsatu zeto. Muna Nkand’a Nzambi, okutuvananga tuludiku tusadisanga wantu ayingi mu tomesa zingu kiau yo kubavevola muna ntelekw’a moyo wasaka. Ediadi ke disongele ko vo mavwa ma muntu wokela mewokela vana vau. Kansi, Yesu wasia nsilu vo awana ‘betombelang’ekulu kintinu ye ndungidi a Nzambi,’ nsatu zau za lumbu ke lumbu zilungiswa.—Matai 6:33.