Finama Nzambi

“Mono Yave wa Nzambi aku Nsimba Koko Kwaku Kwalunene”

SE dimosi ovovese mwan’andi vo: “Simba koko kwame” ekolo besaukanga nzila iviokelanga makalu. Wau vo koko kwa s’andi kusimbidi lembo-lembo yandi, o mwana kena diaka ye wonga ko. Nga okalanga y’etima vo muntu kasimba muna koko kimana kafila mu nza yayi yazala ye vonza? Avo i wau, e mvovo miasoneka Yesaya milenda kufiaulwisa.—Tanga Yesaya 41:10, 13.

Yesaya kwa Aneyisaele kavova mvovo miami. Kana una vo Nzambi wabadikilanga zula kiaki nze ‘lusalu lwandi lwakuvwila,’ mbeni zayingi zabazunganga. (Luvaiku 19:5) Nga diafwana kubamwesa wonga? Yave wasadila Yesaya mu kubazayisa mvovo miami mia lukasakeso. Ekolo tufimpa mvovo miami, tufwete sungamena vo mfunu mpe mina kwa selo ya Nzambi o unu.—Roma 15:4.

Yave wabavovesa vo: ‘Ke numoni wonga ko.’ (Tini kia 10) Emiami ke mvovo miankatu ko. Yave wayika e kuma nkangu andi ke bafwete mwena wonga ko. Wavova vo: “Kadi ngina yaku.” Yave ke kalanga nseke ko yo nkangu andi, yo kubasia nsilu wa kwiza kubasadisa vava kaka bekala mu mpasi. Ozolele vo nkangu andi bazaya wo vo una yau, i sia vo, una vana ndambu au ye wakubama mu kubasadisa konso ntangwa. O zaya e diambu diadi dia lufiaulwisu kikilu.

Yave wavovesa diaka nkangu andi vo: “Kuvengozioka ko.” (Tini kia 10) E mvovo wa Kiyibere wasadilwa mu tini kiaki ulenda yika wantu “betalanga mwawonso mu zaya kana vo vena ye diambu dilenda kubasia mu vonza.” Yave wayika e kuma nkangu andi ke bafwete tadila mwawonso ko mu kuma kia wonga. Wavova vo: “Kadi omono i Nzambi aku.” Mvovo miami mia lukasakeso kikilu! Yave i “Mpungu ngolo.” (Nkunga 91:1) Wau vo Yave wa Nzambi au i Mpungu-ngolo, ke bafwete mona wonga ko.

Kansi, adieyi asambidi a Yave bafwete vingila kwa yandi? Wasia nsilu vo: “Ikusikidisa muna koko kwalunene kwa unsongi wame.” (Tini kia 10) Wavova diaka vo: “Mono Yave wa Nzambi aku nsimba koko kwaku kwalunene.” (Tini kia 13) Adieyi oyindulanga vava owanga mvovo miami? Nkanda mosi uvovanga vo: “E tini yole yayi diambu diamfunu isonganga mu kuma kia se yo mwana. [O se] kena kaka yo mwan’andi ko muna kuntanina, kansi una mpe vana ndambu andi muna lembi yambula vo konso diambu diabavambula.” Badika diambu edi: Yave ke yambula ko vo nkangu andi wavambuka yo yandi, kana nkutu vava benwananga ye mambu mampasi muna zingu kiau.—Ayibere 13:5, 6. 

O unu, selo ya Yave balenda fiaulwiswa kwa mvovo mia Yesaya. Mu ‘lumbu yayi yampasi,’ ezak’e ntangwa tulenda mona vo e mpasi zeto zisakidi. (2 Timoteo 3:1) Kansi, ke tufwete nwana ye mpasi zazi yeto mosi ko. Yave wasia nsilu wa kutufinama yo kutusimba muna koko. Nze una mwana kebundilang’e vuvu muna s’andi, yeto mpe tulenda simba koko kwandi kwa nkuma yo kala ye vuvu vo okutufila muna nzil’ambote yo kutusadisa muna ntangw’ampasi.—Nkunga 63:7, 8.