Nga Diambi mu Sadila Mpandu?

Tuka muna kileke, Barbara * walotanga ndozi, wá ndinga yo kwikila vo yitu yandi ana bafwa kamokenanga yau. Yandi yo nkaz’andi Joachim bakala ye fu kia tanga nkanda mia mpandu, balendanga nkutu tanga kalati yovo tala pelo za mpandu zisonganga oma mesinga vangama. E pelo zazi zasonga vo nzimbu zayingi bekala zau. I diau mpe diavangama, kadi bayantika baka nzimbu zayingi muna kinkita bavanganga. Lumbu kimosi, e pelo diabalukisa vo wantu ambi bekwiza ku nzo au, diabavovesa mpe dina bafwete vanga muna kuyitanina.

KANA una vo kwikila muna mavangu ma mpandu dilenda moneka vo dia uzowa, wantu ayingi beyangalelanga mo. Mu nza yawonso, ndonga bevwatanga nkisi muna nitu, sadila pranchetas ouija, kwenda kwa nganga za matombola mu zaya kana vo menga mambote bena mau yovo mu zaya dina bafwete vanga mu kuyitanina. Nsangu zimosi zavaika mu zulunalu mosi ya Alemanha (Focus), zakala yo ntu a diambu vo “Komputadore ye Lúcifer,” zayika vo: “Internete itoma filanga wantu mu yangalela mavangu ma kindoki.”

Nga ozeye dina Nkand’a Nzambi uvovanga mu kuma kia mpandu? Nanga olenda sivika avo owilu dio.

Adieyi Nkand’a Nzambi Uvovanga mu Kuma kia Mpandu

Muna nsiku kavana Nzambi kwa nkangu andi Isaele yankulu, wavova vo: “Ke vasoloka vovo wina ko . . . konso ona ovanda mpandu, yovo otadila matuti, yovo ovovelela nkisi yovo omika, yovo oloka nkisi, yovo ngang’a ntombodi, yovo ngang’a moko, yovo ngang’a mafwa. Kadi awonso bevanga mambu mama i ungemi kwa Yave.” (Nsiku 18:10-12) Ekuma Yave kasimina mavangu ma mpandu?

Nze una usonganga e nona tuyikidi kuna lubantiku, ndonga bekwikilanga vo awana ben’o moyo balenda mokena ye mvumbi. Bekwikilanga mpe vo nsangu bewanga muna nzo za nganga za nkisi kwa mvumbi zitukanga. E ngindu zazi zitukanga muna mabundu mayingi melonganga vo avo muntu ofwidi ku nza ya kimwanda kekwendanga. Nswaswani ye malongi mama, Nkand’a Nzambi uvovanga ye sikididi kiawonso vo: “Afwa ke bazeye diambu ko.” (Kimpovi 9:5) Usonganga vo amafwa bena nze wantu balele tulu, ke bezayanga diaka konso  diambu ko. * (Matai 9:18, 24; Yoane 11:11-14) Avo i wau, nanga olenda kiyuvula: Adieyi tuvova mu kuma kia wantu bevovanga vo bamokena kala ye mvumbi? Aki nani kikilu bemokenanga yau?

Mokena ye Nkwiya

E nsangu zasoneka Matai, Maku, Luka ye Yoane zisonganga vo vava Yesu kakala ova ntoto, kamokenanga ye vangwa ya mianda. Muna Maku 1: 23, 24 tutanganga vo “nkwa mwand’ansafu” wavovesa Yesu vo: “Izeye owu wina.” E vangwa ya mianda batomene mpe kuzaya owu wina. Kansi, nga ongeye mpe ozeye owu bena?

Una Nzambi kasemene wantu ko, wasema vangwa yayingi ya mianda yovo ambasi. (Yobi 38:4-7) E mpil’a zingu kia mbasi kisundidi eki kia wantu. (Ayibere 2:6, 7) Basundidi o nkuma ye ngangu ye basemwa mu lungisa luzolo lwa Nzambi. O ntozi a nkunga wayimbila vo: “Nukembela Yave, yeno ambasi zandi: Yeno akwa nkuma ye ngolo, alunganisi a diambu diandi.”—Nkunga 103:20.

Nkand’a Nzambi usonganga vo kuna kwalanda, mbasi zakaka bayantika kwiza mokena yo wantu ova ntoto lembi vewa nswa kwa Nzambi. Nki’ekani bakala diau? E mbasi antete wavanga wo, wasadila luvunu mu fila yakala yo nkento antete, Adami yo Eva, babembola Nzambi wa Mvangi au. Muna kuma kiaki, wayikitula se Satana wa Nkadi Ampemba, mvuni ye ntantu a Nzambi.—Etuku 3:1-6.

I bosi, mbasi zakaka ‘bayambula ekiau kalu’ kun’ezulu, bavwata nitu za wantu yo yantika vukana ye miote mia wan’amakento ova ntoto. (Yuda 6; Etuku 6:1, 2) E mbasi zazi zakolami kumosi ye wana bawuta bayantika bangika wantu. Muna kuma kiaki, e nza ‘yazala ye ngungula’ yovo umpumbulu. Nanga ozeye lusansu lwa Nkand’a Nzambi luyikanga una Nzambi kasukisila yimpumbulu muna Kizalu kia lumbu ya Noa.—Etuku 6:3, 4, 11-13.

E maza ma kizalu mafila mbasi zazi mu vwata diaka nitu zau za kimwanda yo vutuka kun’ezulu. Kansi, o Mvangi ka bayambula ko vo bavutuka diaka muna ‘kalu kiau’ kun’ezulu. Nzambi wabasia va fulu kitezaneswanga ye “mawulu ma tombe.” (2 Petelo 2:4, 5) Nkand’a Nzambi uyikilanga mbasi zakolami vo “nkwiya.” (Yakobo 2:19) E nkwiya miami yau benungununanga mavangu ma mpandu.

E Nkwiya Nki’ekani Bena Diau

Ekani diantete dia nkwiya mimokenanga yo wantu, i kubavunginika kimana balembi sambila Yave wa Nzambi aludi. O nkuma bena wau akwa mpandu ke wakaka ko, wa vunginika kaka wantu kimana balembi vwa zayi wa ludi mu kuma kia Nzambi yo kala ye ngwizani ambote yo yandi.

Ekani diazole dia nkwiya dilenda zayakana muna mpila ina Satana wa mfumu au katontela Yesu. Satana wazola vana Yesu “yintinu yawonso ya nza yo nkembo au.” Adieyi Satana kavavanga vo Yesu kavanga? Wavova vo: “Ovo ofukama, wankunda.” Elo, Satana ye nkwiya miandi bezolanga vo basambilwa. Kansi, Yesu wabembola e ngindu zazi za sia vo kayambula Nzambi ye nsambil’aludi.—Matai 4:8-10.

O unu, e mbasi zambi ke bekuyisenzekanga diaka ko muna mokena. Kansi, bakinu vuna awana bakondelo ngangu, muna mambu mebadikilwanga vo nsaka, nze sadila bola de  cristal, makaya ma nti, kalati yovo pelo dia bikulwila mambu, lolonzi yampwena ye horóscopo. Keba walembi vunginikwa kwa mavangu mama! Ke nzila za kotela mu nza ya kimwanda ko. Mianda miambi besadilanga nkum’au mu mpila yambi mu vanga mambu malenda yangidika wantu y’ekani dia kubavuna kimana balembi sambila Yave. Avo ekani diau ke dilunganene ko, nkumbu miayingi mianda miambi bebangikanga wantu ana bebwanga muna ntambu miau yo kubakot’e nsoki. Avo i diau divangamanga kwa ngeye, adieyi olenda vanga muna venga mianda miami?

Aweyi Tulenda Vengela Mavangu ma Mpandu

Kuyivuni ko, e mianda mimokenanga yo wantu, atantu a Nzambi. Fwaswa besinga fwaswa. (Yuda 6) Akolami ye akwa luvunu, ana bevwatanga nitu za wantu afwa. Aweyi omona kele vo obakwidi vo nkundi aku nkwa luvunu, ona ozolanga vo wayambula sia sungididi muna mambu mena vo mamfunu kwa ngeye? Adieyi ovanga kele vo obakwidi vo nkundi ona wazayila muna Internete muntu ambi, ona ovavanga kaka wantu ana ketá yau e zumba? Obakama muna ntambu mia nkwiya dia vonza kikilu. Ofwete vanga mawonso olenda mu kubavenga. Adieyi ofwete vanga?

Vava balongoka dina Nkand’a Nzambi uvovanga mu kuma kia mpandu, ayingi bazingilanga muna mbanza Efeso yankulu bayoka nkanda miau mia mpandu, kana una vo ntalu yayingi miafwanga. ‘Bayoka mio vana vena wantu awonso.’ (Mavangu 19:19, 20) O unu, vena ye lekwa yayingi ina ngwizani ye mianda miambi, ke nkanda kaka ko, yovo nsanga mivwatwanga muna nitu, ngatu pranchetas ouija ye lekwa yakaka. E lekwa yayi ilenda kala filme yovo CD, yovo lekwa yakaka ina muna Internete. Venga konso lekwa kilenda vana mianda miambi e nzila yo kubaka mu ntambu.

Sungamena akazi ana tuyikidi kuna lubantiku lw’elongi diadi. E kalati yovo pelo diau dia zayila mambu diabalukisa vo akwa nsoki bekwiza ku nzo au, kansi ke bafwete kubawila ko ngatu tambula konso lekwa kiau. Kansi, vava Connie ye Gudrun bena vo Mbangi za Yave, balwaka vana mwelo a nzo au yo kubavovesa vo nsangu zambote za Nzambi bakala zau mu kubazayisa, Joachim ye Barbara batambulwila kubawá. Vava bamokenanga, bavovela mavangu ma mpandu. Connie yo Gudrun babazayisa ludi kia Nkand’a Nzambi mu kuma kia mavangu mama. Bayantika longoka Nkand’a Nzambi.

Ke vavioka kolo ko, Joachim yo Barbara babaka nzengo za yambula emvimba mawonso mena ngwizani ye nkwiya. Mbangi za Yave babavovesa vo e nkwiya ke beyangalala ko mu kuma kia nzengo babaka. Kieleka, Joachim ye Barbara bawanana ye mambu mayingi mampasi yo bangikwa kwa nkwiya yo kubavumisa. Mu fikolo, wonga wayingi bamonanga konso fuku yo vevoka kaka vava bayaluka mu nzo yakaka. Konso ntangwa bakalanga muna mpasi, akazi awaya babundang’e vuvu muna mvovo mina muna Filipi 4:13: “Nlenda vanga mawonso muna ndion’okunkùmikanga.” Yave wasambula ngolo bavanganga. E mianda miambi miayambula kubabangika. O unu, Joachim ye Barbara bena ye kiese kia sambila Yave wa Nzambi aludi.

Nkand’a Nzambi ukasakesanga awonso ana bazolele vwa nsambu za Yave oku vo: “Nusakalelela Nzambi; vo i Nkadi ampemba, nunsi’e kitantu, kakunutina. Nufinama Nzambi, oyandi mpe okunufinama.” (Yakobo 4:7, 8) Avo ozolele, Yave wa Nzambi olenda kusadisa kimana wavevoka muna wisa kia nkwiya. Vava beyindulanga una bavevokela muna mavangu ma mpandu, Joachim yo Barbara bekwikilanga ye nsi a ntima wawonso e mvovo mia Nkunga 121:2, mivovanga vo: “O lusadisu luame kwa Yave lutuka.”

[Mvovo Vana Yand’a lukaya]

[Mvovo mia Sina muna lukaya lwa 11]

Mavangu ma mpandu mekakidilanga wantu balembi kala ye ngwizani ambote yo Nzambi

[Mvovo mia Sina muna lukaya lwa 12]

“Nufinama Nzambi, oyandi mpe okunufinama.”—YAKOBO 4:8