Ekuma Ndiona “Owanga Sambu” Keyambulwilanga e Mpasi?

KANA nkutu vo besambanga, akaka ke bekwikilanga ko vo Nzambi una. Ekuma? Nanga, mu kuma kia mpasi zayingi bemonanga mu nza yayi. Nga wakiyuvula kala ekuma Nzambi keyambulwilanga e mpasi?

Nga Nzambi wavanga wantu kimana bakala asumuki yo monanga e mpasi? Ke twadi lenda zitisa nzambi ko ona ozolanga vo wantu bamonanga e mpasi. Yindula vo omwene kalu diampa, oyantikidi dio tala. Ke kolo ko omwene vo vena ye fulu kimosi kiabofoka. Adieyi ovova? Nga oyindula vo i una diavangilwa? Ve kikilu. Ekalu diadi diatoma vangwa, kansi dilenda kala vo muntu bofwele dio.

Diau adimosi mpe, adieyi tulenda vova vava tumonanga e lekwa kavanga Nzambi ye mpila yasikidisilwa yo mona mpe mavangu ma nsoki metwasanga mpasi kwa wantu? Nkand’a Nzambi uvovanga vo Nzambi wavanga yakala yo nkento antete balunga, kansi yau kibeni bakitwasila e mpasi. (Nsiku 32:​4, 5) Nzambi osianga nsilu vo ofokola e mpasi zawonso batutwasila yo kitula awana bekunlemvokelanga se wantu alunga. Ekuma keyambulwilanga e mpasi yamu wau?

Ekuma Keyambulwilanga e Mpasi Yamu Wau?

Nzambi oyambulanga e mpasi yamu wau mu kuma kia mpaka zavaikiswa kana vo nani ofwete yala o wantu. Yave kavanga wantu ko muna kiyala. Yandi kibeni wadi kala Nyadi au. Nkand’a Nzambi uvovanga vo: “E nzil’a muntu ke ina muna yandi ko.” (Yeremiya 10:​23) Diankenda kikilu wau vo o yakala yo nkento antete bakolamena kimfumu kia Nzambi. Muna kulula nsiku a Nzambi, bakituka s’asumuki. (1 Yoane 3:4) Mu kuma kiaki, bavidisa moyo au alunga yo twasa mpasi kwa yau kibeni ye kwa wan’au.

Se tuka kolo Yave oyambulanga vo wantu bakiyala. O lusansu lusonganga vo o wantu ke balendi kukiyala ko. Lusonganga mpe vo tuyalu twawonso twa wantu, mpasi tutwasanga. Ka vena luyalu ko lulenda fokola vita, umpumbulu, nsoki ye mayela.

O Nzambi Aweyi Kefokolwela Mpasi?

Nkand’a Nzambi usianga nsilu vo ke kolo ko Nzambi otwasa e nz’ampa ya unsongi. (2 Petelo 3:​13) Awana kaka bezolanga Nzambi yo muntu yo nkw’andi i bezingila mu nza yayi.​—Nsiku 30:​15, 16, 19, 20.

Nkand’a Nzambi uvovanga mpe vo muna ‘lumbu kia lufundisu’ eki kifinamanga, Nzambi ofokola mpasi zawonso yo fwasa awana betwasanga zo. (2 Petelo 3:7) I bosi, Yesu Kristu wa Ntinu wasolwa kwa Nzambi oyala awana belemvokelanga Nzambi. (Daniele 7:​13, 14) O Yesu adieyi kevanga muna luyalu lwandi? Muna Nkand’a Nzambi tutanganga vo: “Alembami bevwa nza; beyangalela muna mawete mayingi.”​—Nkunga 37:11.

Yesu wa Ntinu ezulu, osingika mawonso ye fokola mayela, ununu yo lufwa lwayiza mu kuma kia wantu bakolamena Yave wa “nto a moyo.” (Nkunga 36:9) Yesu osinga wuka awonso betambulwila luyalu lwandi lwa nzolwa. Muna luyalu lwandi e nsilu miami mia Nkand’a Nzambi milungana:

▪ “O ntungi kevova ko vo, yela nyela; ankangu ana bekala mo beyambulwilw’o bi.”​—Yesaya 33:24.

▪ ‘[Nzambi] okunguna mansanga mawonso muna meso mau; o lufwa, ke lukala diaka ko; musungula kala diaka dilu, yovo kazu, ngatu mpasi: oma mantete maviokele.’​—Lusengomono 21:4.

Nga ke dialufiaulwisu ko mu zaya vo ke kolo ko Nzambi olungisa nsilu andi wafokola mpasi zawonso? Ekolo tuvingilanga ndungana a nsilu miami, tufwete bunda vuvu vo Nzambi owanga sambu yeto kana una vo oyambulanga e mpasi mu fikolo.

Kieleka, Nzambi una. Olenda wá sambu yaku yo mona ntantu ye mpasi zaku. Ozolele vo wazinga yo mona e ntangwa ina kefokola e mpasi zaku zawonso.