Finama Ndiona “Owanga Sambu”

NDONGA bekwikilanga muna Nzambi, kansi ke belendanga songa ziku kia lukwikilu lwau ko. Ke belendanga mpe sasila ko ekuma mabundu mevangilanga mambu mambi y’ekuma o Nzambi keyambulwilanga e mpasi. Besambilanga Nzambi ndiona ke bazeye ko.

Kansi, olenda finama Nzambi. Muna longoka Nkand’a Nzambi olenda vwa zayi uwokesa lukwikilu lwaku yo zola muna Nzambi. O muntu muna kala ye lukwikilu lwakieleka, divavanga vo kazaya e ziku kia diambu. (Ayibere 11:1) Avo olongokele ludi mu kuma kia Nzambi, olenda kunzaya yo mokena yandi nze nkundi aku. Badika nona ya wantu basambanga kanele vo bakatikisanga kana vo Nzambi una.

▪ Patricia, ona oyikilu kala mun’elongi diantete. “Lumbu kimosi vava yakala mu buka kia akundi ame, bayantika mokena mu kuma kia dibundu. Yabavovesa vo yavaika muna nzo wau vo s’ame ona ka kwikilanga muna Nzambi ko watantana yo Mbangi a Yave ona wayiza kutusamunwina nsangu zambote. Mosi muna akundi ame wavova vo: ‘Mbangi za Yave nanga balungidi kwau.’

Wakaka wavova vo: “‘Nga tulenda kwenda kuna lukutakanu lwau muna zaya ziku kia diambu diadi?’ I diau mpe twavanga. Kana una vo ke twakwikilanga ko, akaka muna yeto twakwamanana kwenda muna tukutakanu wau vo Mbangi za Yave batoma kututambulanga.

“Kansi, muna lukutakanu lumosi lwakala kina kia Lumingu, yawá diambu dimosi diasoba ngindu zame. O mpovi wasasila e kuma wantu bemwenanga e mpasi. Kiazaya wo ko vo wantu balunga bavangwa, esumu ye lufwa muntu mosi watwasa lo yo sambukila wantu awonso. Wasasila mpe ekuma diavavanga vo Yesu kafwa muna vana wantu o moyo alunga una kavidisa Adami. * (Roma 5:​12, 18, 19) Vana vau, yayantika bakula mambu. Yabakula vo ‘vena yo Nzambi ona okutuvwanga o mfunu.’ Yakwamanana longoka Nkand’a Nzambi yo bakula vo ndenda samba kwa Nzambi.”

▪ Allan, ona oyikilu kala mun’elongi diantete. “Lumbu kimosi vava Mbangi za Yave bayiza kutusila umbangi, o nkaz’ame wabatambula wau vo wazolang’o wá mana belonganga mu kuma kia zinga ova ntoto yakwele mvu. Yafunga kikilu makasi. I bosi, yabokela nkaz’ame muna kuku yo kumvovesa vo: ‘Kukadi zowa ko, kukwikila mu mambu mama ko.’

O nkaz’ame wampovesa vo: ‘Nda mokena yau muna vunisa malongi mau.’

“Kialenda mo vunisa ko. Kansi, bansonga ngemba yo kunsisila nkanda, A Vida​—Qual a Sua Origem? A Evolução ou a Criação? O nkanda wau watoma sonekwa yo sasila ziku kia mambu, muna kuma kiaki yabaka nzengo zalongoka mayingi mu kuma kia Nzambi. Yayantika longoka Nkand’a Nzambi ye Mbangi za Yave yo bakula vo malongi mandi maswaswana kikilu ye mawonso yayindulanga mu kuma kia dibundu. Ekolo zayi wame wawokelanga, yayantika sadila e nkumbu a Yave muna sambu yame. Wau vo fu yambi yakala yau, yalomba lusadisu muna sambu. Ngina ye ziku vo Yave wavana mvutu za sambu yame.”

▪ Andrew, ozingilanga kuna Inglaterra. “Kana una vo yakala yo zayi wafwana mu mambu ma ngangu za nza, yakwikilanga kaka mun’elongi dia lunungunuku wau vo akaka bavovanga vo elongi diadi dialudi. Kiakwikilanga mu Nzambi ko mu kuma kia mambu mayingi mambi mevangamanga.

“Kansi, ezak’e ntangwa yakiyuvulanga: ‘Avo Nzambi una, ayeyi i nsas’a zingu? Ekuma e vita ye umpumbulu uwokelanga?’ Vava yakalanga mu mpasi, ezak’e ntangwa yalombanga lusadisu mu sambu, kansi kiazaya ndiona yamokenanga yandi ko.

“I bosi, o nkaz’ame wavewa finkanda-nkanda, E Nza Yayi Nga Ilenda Vuluka? E kiaki, i kiuvu kiantokanesanga kibeni. Finkanda-nkanda fiafi fiamfila mu yindula: ‘Nga diamfunu mu fimpa dina Nkand’a Nzambi kevovanga mu kuma kiaki?’ I bosi, vava yakala mu vundu kuna salu, yavewa nkanda, A Bíblia​—Palavra de Deus ou de Homem? * Vava yazaya vo malongi ma Nkand’a Nzambi ngwizani mena ye malongi ma ngangu za nza, yamona vo mfwete zaya mayingi mu kuma kia Nkand’a Nzambi. Ozevo, vava Mbangi a Yave mosi kampovesa vo kalongokanga yame Nkand’a Nzambi, yatambulwila. Ekolo yabakulanga ekani dia Yave, yayantika kwikila vo Nzambi una kieleka ye ndenda mokena yandi muna sambu.”

▪ Jan, wakala muna dibundu dia Protestante kuna Londres. “O luvunu ye mambu mayingi mambi mevangamanga muna dibundu, mamfila mu bembola dibundu. Yayambula mpe tanga sikola yo yantika sika e nsambi muna vwa nzimbu. I nzaya yazaya o Pat, wakala muna dibundu dia Katolika, kansi nze mono oyandi mpe wabembola dio.

“Twazingilanga kumosi y’aleke akaka bayambula tanga sikola mu nzo mosi yabembolwa. Oyau mabundu ma Ásia bayangalelanga, twamokenanga mu kuma kia nsas’a zingu mu ola zayingi muna fuku. Kana una vo mono yo Pat ke twakwikilanga muna Nzambi ko, kansi twakwikilanga vo vena ye ndiona wavanga ‘lekwa yawonso.’

“Vava twayaluka yo kwenda zingila kuna node ya mbanza Londres muna vava salu kia sika miziki, i bosi mwan’eto wantete kawutuka. Fuku umosi, vava mwan’eto kayela, yayantika samba kwa Nzambi ndiona yalembi kwikilanga. Mono yo Pat ke twawizananga diaka ko, muna kuma kiaki, yambembola yo nata mwan’eto. I bosi, yasamba diaka yo yindula vo valenda kala ndiona olenda kungwa. Lembi wo zaya, o Pat diau adimosi mpe kavanga.

“Muna lumbu kiakina, Mbangi zole za Yave bakingula Pat ye kumvana malongi mamfunu ma Nkand’a Nzambi. O Pat wambokela muna telefone ye kungyuvula kana vo nzolele longoka yandi Nkand’a Nzambi ye Mbangi za Yave. Ke kolo ko, twalongoka vo muna yangidika Nzambi tufwete kazala. Diamoneka vo ke dilendakana ko, kadi twatantananga kwayingi.

“Twazola zaya mayingi mu kuma kia ndungan’a ungunza wa Nkand’a Nzambi, ekuma wantu bemwenanga e mpasi yo vav’o zaya kana nki i Kintinu kia Nzambi. Malembe-malembe, twayantika bakula vo Nzambi okutuvwang’o mfunu, muna kuma kiaki twavava kunlemvokela. Twakazala. O luludiku lwa Nkand’a Nzambi lukutusadisanga mu sansa wan’etu atatu. Tuna ye ziku vo Yave wawá sambu yeto.”

Fimpa Wakizayila e Ziku

Ndonga muna wantu tuyikidi vana tandu ke bavukumunwa ko muna mabundu maluvunu yo bakula ekuma Nzambi keyambulwilanga e mpasi. Nga omwene? Muna nona yawonso tuyikidi, o zayi waludi wa Nkand’a Nzambi wasadisa wantu awaya mu kala ye ziku vo Nzambi owanga e sambu.

Nga ozolele kuyifimpila muna kala ye ziku vo Nzambi una? Mbangi za Yave bena y’etima dia kusadisa mu zaya e ludi mu kuma kia Yave ye una olenda finamena ndiona “Owanga sambu.”​—Nkunga 65:2.

[Mvovo Vana Yand’a lukaya]

 [Mvovo mia Sina muna lukaya lwa 10]

“Ekolo yabakulanga ekani dia Yave, yayantika kwikila vo Nzambi una kieleka ye ndenda mokena yandi muna sambu”

 [Foto ina muna lukaya lwa 9]

O lukwikilu lwakieleka mu ziku kia diambu lutukanga ye luzolo lwa zaya e ludi mu kuma kia Nzambi