Nani “Owanga Sambu”?
Nani “Owanga Sambu”?
AVO vena ye muntu Owanga sambu, muntu ndioyo i Mvangi. Nani olenda zaya ngindu zaku, avo ke ndiona wavanga tomfo twa wantu ko e? Nani diaka olenda wá sambu ya wantu yo kubasadisa? Nanga olenda kukiyuvula vo: ‘Nga diangangu mu kwikila vo vena yo Mvangi?’
Ndonga beyindulanga vo mu kwikila muna Mvangi o muntu kafwete katikisa e ziku kia mambu ma ngangu za nza. Kansi, e ngindu za sia vo ndiona okwikilanga muna Nzambi kalendi kwikila muna ngangu za nza ko, zaluvunu. Badika nona eyi:
▪ Muna lufimpu lwavangwa kw’alongi a mambu ma ngangu za nza muna sikola 21 zampwena kuna Estados Unidos, vana vena wantu tatu mosi kaka wavova vo, “kikwikilanga muna Nzambi ko.”
Dialudi, akwa ngangu ayingi bekwikilanga vo Nzambi una.
Ziku Kisonganga vo Vena yo Mvangi
Nga tufwete kwikila lembi kala ye ziku vo vena yo muntu Owanga sambu? Ve kikilu. E ngindu za sia vo o lukwikilu, i kwikila lembi kala ye ziku kia diambu, zaluvunu. Nkand’a Nzambi usonganga vo lukwikilu i “nton’a lekwa ilembele moneka.” (Ayibere 11:1) Kana una vo kulendi mona ezú dia radio ko, kansi e telefone aku ya celular isonganga e ziku vo vena ye zú dilembi monekanga edi diwisanga ndinga; ongeye okwikilanga muna diambu diadi. Diau adimosi mpe, kanele vo katulendi mona ndiona Owanga sambu ko, tulenda fimpa lekwa yayingi isonganga e ziku vo una kieleka.
Akweyi tulenda sololwela e ziku kisonganga vo Nzambi una? Muna talanga e nsema. Nkand’a Nzambi uvovanga vo: “Kadi konso nzo kwa muntu yatungwa; kansi ndiona watung’e lekwa yawonso i Nzambi.” (Ayibere 3:4) Nga okwikilanga mu mvovo miami? Vava obadikanga etuku dia moyo, e mpil’esivi yavangilwa e tomfo twa wantu kumosi ye ntoto ye mpila yasikidisilwa lekwa yawonso ina mo, nanga olenda kwikila vo vena ye ndiona osundidi wantu. *
Kansi, katulendi zaya mawonso ko mu kuma kia Nzambi muna talanga kaka e nsema. O vav’o zaya e ziku kia Nzambi muna talanga e nsema dina nze ngeye owanga nsindu mia muntu ofinamanga vana mwelo aku. Ozeye wo vo muntu una vana mwelo, kansi kuzeye ko kana vo nani. Muna kunzaya, ofwete ziula e mwelo. Diau adimosi mpe tufwete vanga muna zaya Ndiona wavanga lekwa yawonso.
O Nkand’a Nzambi i mwelo ulenda kusadisa mu vwa zayi mu kuma kia Nzambi. Vava oziulanga mwelo wau yo badika waka ungunza ye mpila walunganena, okala ye ziku vo Nzambi una. * Vana ntandu, o lusansu lwa mpila ina Nzambi kekadilanga yo wantu, lusonganga nkia mpila Nzambi kena ndiona Owanga sambu.
Nkia Mpila Muntu Kena Ndiona Owanga Sambu?
Nkand’a Nzambi usonganga vo ndiona Owanga e sambu, muntu, olenda kwaku kunzaya. Dialudi vo, muntu kaka olenda kutuwá yo kutubakula. Dialufiaulwisu vava tutanganga vo: “Ongeye owanga sambu, o wantu awonso kwa ngeye bekwiza.” (Nkunga 65:2) Nzambi owanga awana besambanga kwa yandi kuna kwikizi kiawonso. Una mpe ye nkumbu. Muna Nkand’a Nzambi tutanganga vo: “O Yave ovavuka kimpumbulu; e sambu ki’asongi, owanga kio.”—Ngana 15:29.
Yave omonang’e nkenda ye ntantu. Oyandi “Nzambi a zola,” oyikilwanga vo ‘Nzambi a kiese.’ (2 Korinto 13:11; 1 Timoteo 1:11) Nkand’a Nzambi uvovanga mu kuma kiandi vava mbi yawokela vo: “Yave omwene ntantu.” (Etuku 6:5, 6) E ngindu za sia vo Nzambi otwasanga mpasi muna ntonta wantu, zaluvunu. Nkand’a Nzambi uvovanga vo: “Ke difwene kwa Nzambi ko, kavanga umpumbulu.” (Yobi 34:10) Nanga olenda kukiyuvula: ‘Avo Nzambi Mvangi wa Mpungu-ngolo, ekuma keyambulwilanga e mpasi?’
Wau vo Yave wavana wantu nswa wa kuyisolela ediadi disonganga mpila muntu kena o Nzambi. Nga ke tuyangalelanga ko o nswa katuvana o Nzambi muna kuyisolela una tufwete zingila? Diankenda kikilu vo ndonga besadilanga nswa wa kuyisolela mu mpil’ambi yo twasa mpasi kwa yau kibeni ye kwa akaka. Owau badika kiuvu kiaki kiamfunu: O Nzambi aweyi kalenda fokolwela e mpasi za wantu lembi katula nswa wa kuyisolela kabavana? Tubadika e kiuvu kiaki mun’elongi dilende.
[Mvovo Vana Yand’a]
^ tini. 8 Muna zaya diaka mambu makaka mesonganga vo Nzambi una tala finkanda, Origem da Vida—Cinco Perguntas Que Merecem Resposta ye nkanda Existe um Criador Que Se Importa com Você? miavaikiswa kwa Mbangi za Yave.
^ tini. 10 E finkanda, Um Livro para Todas as Pessoas ye nkanda, A Bíblia—Palavra de Deus ou de Homem? miavaikisa kwa Mbangi za Yave muna kusadisa mu kala ye ziku vo Nkand’a Nzambi kwa Nzambi wavumunwinwa.
[Babu kina muna lukaya lwa]
Nga Okatikisanga Nzambi mu Kuma kia Mbi Ivangwanga Muna Mabundu?
Diankenda kikilu vo mabundu mefilanga wantu mu katikisa vo vena ye Nzambi a nkenda ndiona owanga sambu. Wau vo mabundu mekuyisianga muna vita, mavangu ma nsoki yo yambulwila evangu dia leka wan’akete mu kingolo, ediadi difilanga awana besambilanga mu vova vo: “Kikiwilanga muna Nzambi ko.”
Ekuma mabundu mefilanga wantu mu vanga e mbi? E kuma kadi, wantu ambi bevangilanga mavangu mambi muna nkumbu a dibundu. Nkand’a Nzambi wasakula vo malongi ma luvunu ye mavangu ke ma Kikristu ko mekoteswa muna nsambila aludi. O Paulu wa ntumwa wavova kwa akengi Akristu vo: “Vovo nwina yeno kibeni mpe, vetelama wantu, ana bevova mambu mabendomoka, bavol’alongoki bend’abalandi.”—Mavangu 20:29, 30.
Nzambi omenganga mabundu maluvunu. O Nkand’a Nzambi utumbanga mabundu maluvunu yo kubayekeka e kuma muna mbungul’a ‘menga ma . . . awonso bavondw’ova nza.’ (Lusengomono 18:24) Wau vo mabundu maluvunu ke melonganga wantu ko mu kuma kia Nzambi aludi ona una vo nkwa zola, bena ye nkanu a menga vana ndose andi.—1 Yoane 4:8.
Ndiona “owanga sambu” ofwilanga e nkenda awana bebundunwanga kwa mabundu maluvunu. Wau vo Nzambi ozolanga wantu, ke kolo ko ofundisa afidi awonso a mabundu maluvunu muna Yesu ona wavova vo: “Engi bekumpovesa vo, e Mfumu, e Mfumu, ke yeto ko twasakwila muna nkumbu aku, . . . I bosi ikubakiesesela wo vo, kianuzaya nkutu ko: nukatuk’ova ngina, yeno avangi a umpumbulu.”—Matai 7:22, 23.
