Nga Vena ye Muntu Owanga Sambu?

“Yakatikisanga kana vo Nzambi una. Kana una vo i wau, ezak’e ntangwa yasambanga. Kiakala ye ziku ko vo vena ye muntu owanga e sambu, kansi yakala ye vuvu vo valenda kala muntu kun’ezulu olenda wá e sambu yame. Kiakala ye kiese ko ngatu kala y’ekani muna zingu. Yayindulanga vo atovoki kaka bekwikilanga muna Nzambi, muna kuma kiaki, kiakwikilanga muna Nzambi ko.”​—PATRICIA, * IRLANDA.

NGA wabwila kala e diambu diadi? Nga osambanga kana nkutu vava okatikisanga vo Nzambi una? Avo i wau, ka ngeye kaka omonanga e diambu diadi. Badika nona yilende:

▪ Muna lufimpu lwavangwa kuna nsi ya Grã-Bretanha, vana vena 2.200 za wantu, tezo kia 500 za wantu bekwikilanga vo vena ye Nzambi ona wavanga nza ye owanga nsambu. Muna wantu awaya, vioka 1.200 za wantu besambanga ezak’e ntangwa.

▪ O lufimpu lwavangwa muna nsi zayingi lusonganga vo vana vena 10.000 ma wantu, ayingi bayika vo ke bekwikilanga muna Nzambi ko, samba besambanga.

Ekuma Wantu Bekatikisilanga vo Nzambi Una?

Allan wa mwisi Grã-Bretanha, wavova vo: “Kiakwikilanga muna Nzambi ko, kadi yayindulanga vo mabundu masokwa muna vanga kinkita yo yala e zingu kia wantu.” Yayindulanga mpe vo, avo Nzambi una, mambu mambi ke madi vangamanga ko. Kana una vo i wau, ezak’e ntangwa ‘yasambanga.’ Yakiyuvulanga: ‘Ekuma twinina ova nza?’

Awonso beyindulanga mpila yayi, bena ye kuma bekatikisilanga kana vo vena ye ndiona owanga e sambu. Nkumbu miayingi, o wantu awaya bekatikisanga muna lembi baka mvutu za yuvu yayi yilende:

▪ Nga vena ye Mvangi?

▪ Ekuma mabundu mevukumunanga wantu mu vanga e mbi?

▪ Ekuma Nzambi keyambulwilanga e mpasi?

Kele vo wazaya mvutu za yuvu yayi, nga wadi kala ye luzolo lwa samba?

[Mvovo Vana Yand’a]