Longa Wan’aku

Ngekazi Wavidisa Edienga dia Nzambi mu Kuma ki’Eloko

NGA walakuka kala o moyo mu kuma kia lekwa?​— * Avo i wau, ediadi divangamanga mpe kwa wantu akaka. Kansi, nga ofwete vuna muna vwa e lekwa kina ozolele? Ve kikilu. Ndiona ovanganga wau nkwa loko. Yambula twabadika nona kia muntu mosi wayikilwanga vo Ngekazi ona wayisia mu vonza mu kuma ki’eloko. Muntu ndioyo wakala selo kia Elesa wa ngunz’a Yave wa Nzambi aludi.

Elesa yo Ngekazi bazinga mafunda ma mvu una Yesu wa Mwan’a Nzambi kawutukidi ko ova ntoto. Yave wasadila Elesa mu vanga masivi mayingi. Muna bong’e nona, Nkand’a Nzambi uyikanga lusansu lwa nkwa tunda mosi wa mwisi Suria ona wakala ye kimbevo kia wazi. Ke vakala muntu ko walenda kunwuka, kansi Elesa wanwuka.

Vava Elesa kasadilwanga kwa Nzambi muna wuka akaka, ka tambulwilanga nzimbu ko. Nga ozeye ekuma?​—E kuma kadi Elesa wazaya wo vo mu nkum’a Yave kavangilanga masivi mama. Vava Namani kawukwa, wamona kiese kiayingi yo vana Elesa lukau nze wolo ye mvwatu miambote. Elesa kazola tambula lekwa yayina ko, kansi Ngekazi walakukila yo moyo.

Vava Namani kavutuka kuna nsi andi, Ngekazi wayenda kunlanda, lembi kanina Elesa. Vava Ngekazi kabaka Namani, ng’ozeye dina kavova?​— ‘Elesa untumini, yavovesa vo olwakilu kwa nzenza zole. Nsobani zole za mvwatu kavwidi o mfunu muna vana kwa nzenza.’

Kansi, Ngekazi luvunu kavova. Wasoka mambu mu kuma kia nzenza zole. Wazola vwa lekwa ina Namani kavana kwa Elesa. O Namani kazaya wo ko vo maluvunu. Kuna kiese kiawonso, wavana lukau lwalu kwa Ngekazi. Namani, wakudikila lekwa yayingi ina Ngekazi kalomba ko. Nga ozeye dina diabwa?​—

Vava Ngekazi kavutuka kuna nzo, Elesa wanyuvula vo: “Akweyi otukidi?”

Ngekazi wavutula vo ‘ka kuma ko.’ Kansi, Yave wazayisa Elesa dina Ngekazi kavanga. Muna kuma kiaki, Elesa wavova vo: ‘E yayi ke ntangwa yatambula nzimbu ye mvwatu ko.’

Ngekazi watambula nzimbu ye mvwatu ke miakala miandi ko. Muna kuma kiaki, wasambukila wazi wa Namani. Adieyi tulenda longoka muna diambu diadi? Ka tufwete soka mambu ko ngatu vuna.

Ekuma Ngekazi kasokela mambu? Kadi nkwa loko kakala. Wavuna muna vwa lekwa yangani. Muna kuma kiaki, wabakama kimbevo kiampondi yavana kafwa.

Ngekazi wabaka mfwilu usundidi kimbevo kia wazi. Nga ozeye nkia mfwilu kabaka?​—Wavidisa edienga yo zola kwa Nzambi muna yandi. Yambula twayikenga mu lembi vanga diambu dilenda kutufila mu vidisa edienga dia Nzambi. Kansi, yambula twakala akwa ngemba yo kaulwilanga lekwa yeto kw’akaka.

Tanga Muna Nkand’aku a Nzambi

2 Ntinu 5:​5, 20-​27, Yuda 21

Yoane 15:10

[Mvovo Vana Yand’a]