Owau Nzeye Nzambi Isambilanga
Owau Nzeye Nzambi Isambilanga
Lusansu lwa Marieta Manuel Bacudio
Lumbu kimosi, nlongi a dibundu dia Pentekosti ona wazayakana vo nkuma wa wuka kakala wau wayiza kutukingula. Vava kampiakana, yafwa kiambu, i sia vo ‘yatambula mwanda.’ Vava yasikama, yatambula nkuma wa wuka. Aweyi diambu diadi diambwila, nki diavanga muna zingu kiame? Yambula yanuzayisa ntete lusansu lwame.
YAWUTUKILA kuna mbanza Ilocos Norte, Filipinas kina kia 10 kia ngonde ya Desemba, 1968. Mono i mwana nsambwadi muna kumi dia wana twawutuka. Twasansukila muna dibundu dia Katolika. Yafokola sikola zandá muna mvu a 1986, yakala ye luzolo lwakituka se mfelemi. Wau vo yabakama kimbevo kiangolo, ekani diadi ke dialungana ko. Yayindulanga vo yadi fwa. Muna kuma kiaki, yasamba kwa Nzambi kansadisa yo kunsia nsilu vo avo nsasukidi, ikunsadila muna zingu kiame kiawonso.
Vava yasasuka, yasungamena nsilu yasila kwa Nzambi. I bosi, muna ngonde a Yuni, 1991 yakota muna sikola za kimpelo muna dibundu dia Pentekosti. Muna malongi ma sikola mwakoteswa mpe elongi dia “lukau lwa ngovo lwa mwand’avelela.” Yakala ye luzolo lwa tambula nkum’a wuka. Muna sikola twalongwa vo tulenda tambula nkuma wau muna lembi dia yo samba nkumbu miayingi. Muna songa vo yatambula “lukau” lwalu, lumbu kimosi vava nkw’ame a sikola kasambanga mu nding’angolo, yawá sambu kiandi kuna kinsweki. Vava kafokolanga o samba, yavutuka mu nzaki vana fulu kiame yo fukama. I bosi, yamvovesa mawonso kalomba muna sambu kiandi, muna kuma kiaki wakwikila vo omono mpe yatambula “lukau lwangovo.”
Ekolo yakwamanana tanga, yuvu yayingi yakala yau. Kasikil’owu, e sono kia Matai 6:9 kiyikanga “Ese” ye “nkumbu” andi. Yayuvulanga, “Nani i Se ndiona kayika o Yesu” ye “Nkia nkumbu ifwete veleleswa?” Alongi ame ke bampananga mvutu zasikila ko. Balonganga elongi dia nzambi mu ntatu yo yika vo elongi diadi mbumba. Ediadi diantokanesanga kikilu. Kana vo i wau, yakwamanana longoka y’ekani diakituka se nlongi.
Yawanana ye Mbangi za Yave
Muna sikola batulonganga vo dibundu dia Mbangi za Yave dialuvunu. Diayikilwanga mpe vo antikristu. Muna kuma kiaki, yayantika menga e dibundu diadi.
Vava yalungisa mvu miole muna sikola yayi, yayenda kingula mase mame ekolo twakala muna vundu. Carmen wa mbut’ame ankento vava kawá vo ku nzo yakala, wayiza kunkingula. Oyandi wakala se Mbangi a Yave ye wasalanga e salu kia ntangwa ke ntangwa. Vava kateza kundonga oma ma Nzambi, muna nganzi zawonso yamvovesa vo: “Nzeye kala Nzambi isambilanga.” I bosi, yantianguna yo kununguna, lembi kumvana diaka elau dia mokena yame.
Vava yavutuka muna sikola za kimpelo, Carmen wantwikila finkanda Deve-se Crer na Trindade? * Vana vau, yafitikisa fio yo loza fio vana tiya. Yakwamanana kumenga.
Yanungunuka yo Kituka se Mama Selo
Vava yakwamanana tanga e sikola, yalonganga wantu akaka yo kubakitula s’alongoki. Yatoma yangalala vava ngw’ame yo mpangi ame ayakala bakota mpe mu dibundu dia Pentekosti.
Muna ngonde a Malusu ya mvu a 1994, yafokola sikola ya kimpelo muna dibundu dia Pentekosti. Nze una mpovele kala, tata nlongi wayiza kutukingula muna lumbu kiakina. Yeto awonso twafokola sikola twazola kala yandi, kadi twakwikilanga vo nkuma wa wuka kakala wau. Twakala yandi entwadi kun’evovelo. Twayantika takuka, sika makonzo ekolo miziki miasikwanga. I bosi, konso muntu kaviakananga wafwang’e kiambu yo “tambula mwanda.” * Vava kampiakana, mono mpe yafwa kiambu. Vava yasikama, yamona wonga, kansi yatoma yangalala vava yabakula vo nkuma wa wuka yatambula.
Vava yatambula nkuma wau, yasadila wo muna wuka kingyana-ngyana mosi wakala ye ngyanduka zangolo. Vava yasamba, vana vau o mwana wayantika vaika e kiufuta yo sasuka. Ediadi diamfila mu yindula vo ndenda lungisa e nsilu yasila kwa Nzambi. Kana una vo i wau, kiakala ye kiese ko, kadi yakwikilanga vo vena ye Nzambi mosi kaka, kansi kiazaya ko kana vo Nzambi ndioyo nani. Yayantika mpe katikisa malongi mayingi ma dibundu.
Mambu Masoba Ngindu Zame
Kitantu kiame kwa Mbangi za Yave kiawokela. Konso nkanda mia Mbangi za Yave yawananga, yayokanga mio. Kansi, diambu dimosi diabwa kuna kinsalukisa. Yakendalala kikilu vava yazaya vo ngw’ame wakatuka muna dibundu wau vo Carmen wayantika longoka yandi Nkand’a Nzambi. E kitantu kiame kwa Carmen kiawokela.
Lumbu kimosi yawana Despertai! muna nzo ya ngw’ame. Kansi, kiayoka yo ko, kadi yavava zaya nkia mambu ngw’ame katanganga muna finkanda fiafi. Vava yayantika fio ziula, yamona elongi diavovelanga o lusansu lwa muntu mosi ona wakwikilanga muna malongi ma dibundu diandi. Kansi, vava kayantika tanga nkanda mia Mbangi za Yave kumosi ye Nkand’a Nzambi, wabakula vo malongi ma nzambi mu ntatu, bilungi bia tiya ye moyo ulembi fwanga, ka mena mu Nkand’a Nzambi ko. Ntim’ame wayantika dudila, kadi malongi mama i mau yavavanga bakula. Tuka lumbu kiakina, yavava bakula ludi kia Nkand’a Nzambi.
I bosi, yatanga diaka lusansu lwa muntu akaka muna Despertai! ona wakala nduvu a malavu ye fomo zangolo, kansi wasoba e zingu kiandi mu kuma kia malongi ma Nkand’a Nzambi. Ediadi diamfila mu yantik’o tanga e nkanda mia Mbangi za Yave. Yawanana ye finkanda, O Nome Divino Que Durará Para Sempre. * Vava yatanga fio yabakula vo e nkumbu Nzambi, Yave. Yayangalala kikilu mu zaya e ludi mu kuma kia Nzambi mosi kaka aludi.—Nsiku 4:39; Yeremiya 10:10.
Yakwamanana tanga yo zaya mayingi mu kuma kia Nkand’a Nzambi kuna kinsweki. Kasikil’owu, muna sikola ya kimpelo muna dibundu dia Pentekosti, yalongwa vo Yesu i Nzambi, kansi muna Nkand’a Nzambi yalongoka vo Yesu “Mwan’a Nzambi amoyo.”—Matai 16:15, 16.
Ngindu Zame Zasoba
Vava yawanana diaka ye Carmen, wasivika kibeni vava yanlomba finkanda O Nome Divino Que Durará Para Sempre ye nkanda miakaka. Mvu miayingi yaviokesa muna sikola yayina, kansi kialongoka ludi ko, mpofo yakala. Owau, ntim’ame wazala ye kiese mu kuma kia ludi kia Nkand’a Nzambi yalongokanga. Yatoma bakula mvovo mia Yesu vava kavova vo: ‘Nuzay’e ludi, e ludi kikunuvevola.’ (Yoane 8:32) E ludi kiaki kiayantika soba zingu kiame.
Mu fikolo, yayindula vo, ndenda kwame sambila Yave wa Nzambi kuna kinsweki yo kwamanana muna salu kia longa muna dibundu diame. Ke kolo ko, yabakula vo kilendi longa diaka malongi makaka ko ma dibundu mana yalonganga. Kansi, wonga yamonanga, kadi muna dibundu mu yabakilanga e nzimbu. Aweyi yadi zingila avo ngyambwidi e salu kiaki? Kuna diak’esambu, nsoni diadi kala avo mosi muna alongi a dibundu okitukidi se Mbangi a Yave. Muna kuma kiaki, yakwamanana muna salu kiame kia longa, kansi yavenganga malongi maluvunu.
Vava yawanana diaka yo Carmen, wampovesa vo ngiendanga kuna tukutakanu twa Mbangi za Yave. Wau vo ezak’e ntangwa yayendanga kuna vula dia sina dia dibundu diame kuna mbanz’a Laoag City, yavava Eseka dia Kintinu dia Mbangi za Yave kuna kinsweki. Bansunzula kwa Alma Preciosa Villarin ona wakala se mviti a nzila a ntangwa ke ntangwa muna nkutakani, watoma zayakana muna nkumbu ya “Precious.” Kana una vo yakwamanana menga Mbangi za Yave, yatambulwila vo kalongoka yame Nkand’a Nzambi.
Carmen wasonga luzindalalu muna kundonga e ludi kia Nkand’a Nzambi. O Precious mpe wasonga luzindalalu lwalu. Watoma kunsadisa muna bakula e ludi kia Nkand’a Nzambi kana una vo ezak’e ntangwa yafunganga makasi, tantana yandi yo kunkazila mu kuma kia malongi makaka mana yakwikilanga. O walakazi yo lulembamu kasonga Precious kumosi ye Mbangi zakaka za Yave, diansivikisa kikilu yo kumfila mu sambila Yave.
Muna ngonde a Yuli ya mvu a 1995, yatoma bakula vo muna yangidika Yave mfwete yambula e salu kiame kuna dibundu. Ekuma? E kuma kadi, o nkanda Lusengomono 18:4, uvovanga mu kuma kia dibundu dialuvunu vo: “Numvaika, e nkangu ame, ke nwakala yandi e ntwadi muna masumu mandi, ke nwatambul’owu wa vuku yandi.” O wau, akweyi yadi bakila diaka e nzimbu? Yalongoka muna Ayibere 13:5 vo, avo tuvangidi luzolo lwa Nzambi, ‘kekutuyambula nkutu ko, ngatu kutusisa.’
Kana una vo o s’ame ye mpangi ame ayakala batoma kunsia kitantu, tumingu tole vitila luvubu lwame, kuna unkabu wawonso, yayoka lekwa yawonso yasadilanga muna salu kiame kia kinlongi. Vava yavanga wo, yamona vo e nkuma wawonso wa wuka yakala wau wavila. Vitila ediadi, vava yalekanga, yamonanga nze mono yaniemwanga, kansi owau, kimonanga wo diaka ko. E ninga yamonanga vana zianela ame, kimonanga yo diaka ko. Yalongoka muna Nkand’a Nzambi vo, konso tukau yovo nkuma wa wuka o unu, ke utukanga kwa Nzambi ko, kansi kwa mianda miambi utukanga. Kiese kiayingi ngina kiau wau vo yavevoka muna mavangu mama, nze una ntaudi ankento kavevokela muna “mwand’a unganga” muna lusadisu lwa Paulu yo Banaba.—Mavangu 16:16-18.
Ekwe kiese yamona vava yavubwa kumosi ye ngw’ame muna ngonde a Setemba ya mvu a 1996! Kuna nima luvubu, yakota mu salu kia ntangwa ke ntangwa kia Mbangi za Yave yo mona kiese kia salu kiaki mu mvu miayingi.
O wau, yasompana yo Silver. Tulonganga ludi kia Nkand’a Nzambi kwa mwan’eto ankento. Akaka mpe muna mpangi zame, bayantika sadila Yave. Kana una vo ikuyibanzanga mu kuma kia mvu miayingi yaviokesa lembi zaya Nzambi, kansi ngina ye kiese wau vo nzeye Nzambi isambilanga.
[Mvovo Vana Yand’a]
^ tini. 10 Fiavaikiswa kwa Mbangi za Yave, kansi ke finietekwanga diaka ko.
^ tini. 13 Muna mabundu makaka wantu bekwikilanga vo, o mwanda mu ngolo zawonso ulwakilanga kwa minkwikizi, i dianu befwilanga kiambu muna “tambula mwanda.”
^ tini. 18 Fiavaikiswa kwa Mbangi za Yave.
[Mvovo mia Sina muna lukaya lwa 27]
Yasadila nkuma wau muna wuka kingyana-ngyana mosi wakala ye ngyanduka zangolo
[Mvovo mia Sina muna lukaya lwa 28]
E ludi kiaki kiayantika soba zingu kiame
[Mvovo mia Sina muna lukaya lwa 29]
Yayangalala kikilu mu zaya e ludi mu kuma kia Nzambi mosi kaka aludi
[Foto ina muna lukaya lwa 27]
Yatumbikwa kiselo
[Foto ina muna lukaya lwa 28]
O Precious walongoka yame Nkand’a Nzambi
[Foto ina muna lukaya lwa 29]
Yavubwa yo ngw’ame
[Foto ina muna lukaya lwa 29]
Muna salu kia ntangwa ke ntangwa kia Mbangi za Yave
[Foto ina muna lukaya lwa 29]
Kumosi yo nkaz’ame, mwan’ame ye yitu yame bakota muna nsambila aludi
