Ng’ozolele zaya e ludi mu kuma kia Nzambi? Nani i Nzambi? Adieyi kezolanga ye adieyi kemenganga? Alweyi i luzolo lwa Nzambi? Muna Nkand’a Nzambi, una vo i Diambu diandi, Yave wa Nzambi osengomonanga e ludi mu kuma kiandi. Kansi, ke awonso ko betanganga Nkand’a Nzambi bebakulanga mvimba e ludi kiaki. Ekuma? Elau diabakula e ludi mu kuma kia Nzambi, ke divewanga kwa konso muntu ko. Yambula twabadika dina Yesu kavova mu kuma kiaki.—Tanga Matai 11:25.

E sono kiaki kiyantikilanga owu: “E ntangwa ina, o Yesu ovutwidi vo.” E mvovo mia Yesu, nanga mvutu za mana mateka bwa. Yesu watumba nkangu a mavata tatu ma mbanz’a Ngalili muna kavangila mavangu ma nkuma, wau vo ke bakwikila muna yandi ko. (Matai 11:20-24) Nanga olenda kukiyuvula: ‘Ekuma akaka muna awana bamona masivi ma Yesu ke bakwikidila muna ludi kalonganga ko?’ Ekuma kadi e ntima miau miabala miakala.—Matai 13:10-15.

Yesu wazaya wo vo muna bakula ludi mu kuma kia Nzambi, mambu mole tuvwidi o mfunu: Lusadisu lwa Nzambi yo makani mambote ma ntima. Yesu wavova vo: ‘Itondele, e Tata, Mfumu ezulu ye nza, wau wasweka mambu mama kw’akwa ngangu y’alungaladi, wasengomona mo kwa yingyanangyana.’ Ng’omwene ekuma o bakula e ludi kia Nkand’a Nzambi dibadikilwanga vo se lau? Yave wa “Mfumu ezulu ye nza,” olenda sweka yovo sengomona e ludi mun’owu wa luzolo lwandi. Nzambi kesianga mpambula ko, kadi ozolele vo wantu awonso bazaya e ludi. Aweyi Nzambi kesengomwenanga yovo sweka e ludi kwa akaka?

Yave osonganga edienga kwa alembami, ke akwa lulendo ko. (Yakobo 4:6) Oswekanga e ludi kwa “akwa ngangu,” i sia vo, akwa ngangu a nza yayi ana beyindulanga vo ke bavwidi mfunu wa lusadisu lwandi ko. (1 Korinto 1:19-21) Kansi, osengomonanga e ludi kwa “yingyanangyana,” i sia vo ana besonganga lulembamu nze wan’akete. (Matai 18:1-4; 1 Korinto 1:26-28) O Yesu wa mwana Nzambi, watoma zaya wantu a mpila yayi. Ndonga y’akwa lulendo, afidi a mabundu ana batanga sikola zampwena ke babakulanga nsas’a malongi ma Yesu ko, kansi alembami nze alowi a mbizi, babakulanga mo. (Matai 4:18-22; 23:1-5; Mavangu 4:13) Kansi, vakala mpe ye mvwama ye akwa ngangu ana basonganga nlemvo yo kituka se alandi a Yesu.—Luka 19:1, 2, 8; Mavangu 22:1-3.

Owau, tuvutukidi muna kiuvu tutekele vanga: Ng’ozolele zaya e ludi mu kuma kia Nzambi? Avo i wau, ofiaulwiswa mu zaya vo Nzambi kesonganga edienga diandi ko kw’awana bekuyibadikilanga vo akwa ngangu za nza yayi. Kansi, osonganga edienga kw’awana bevezwanga kwa akwa ngangu za nza yayi. Avo olongokele e diambu dia Nzambi y’ekani diasikila, okala vana vena awana Yave kevananga lukau lwantalu lwa bakula ludi mu kuma kiandi. O zaya e ludi kia Nzambi, dikutwasila e kiese owau ye kuna sentu ovwa moyo wina vo “moyo kikilu,” i sia vo moyo a mvu ya mvu muna nz’ampa kasila o nsilu o Nzambi. *—1 Timoteo 6:12, 19; 2 Petelo 3:13.