O lembama i lusakalalu lwa ntima, kondwa umvwania yovo lulendo. O nlembami ke kuyibadikilanga ko vo osundidi akaka. Konso muntu walembi lunga una vo nlembami ozayanga e tezo kiandi.

Mose kasadila wisa kiandi mu mpila yambi ko. Vava muntu ketambulanga wisa, tulenda zaya kana vo nlembami yovo nkwa lulendo. Robert G. Ingersoll wa nsoneki a nkanda mosi mu tandu kia 19 wasasila e diambu diadi mu mpila eyi: “Wantu ayingi balenda zizidila e mpasi. Kansi, avo zolele zaya fu kia muntu, umvana wisa.” O Mose wasonga mbandu ambote mu kuma kia lulembamu. Mu nkia mpila?

Mose watambula wisa kiampwena kwa Yave muna fila nkangu a Isaele. Kana una vo i wau, kakituka nkwa lulendo ko. Badika mpil’ambote kasingikila e diambu diampasi mu kuma ki’efwa. (Ntalu 27:1-11) Ke diakala diambu diakete ko muna bakila dio e nzengo, kadi e nzengo zazi ke zadi twasa kaka nluta yovo mfwilu kwa akento awaya ko kansi kwa mbandu zadi landa mpe.

O Mose adieyi kavanga? Nga wayindula vo wau kakala mfidi a nkangu a Isaele, wakala ye ngangu zafwana muna baka nzengo muna diambu diadina? Nga wabunda e vuvu muna ngangu zandi, muna mvu miandi mia salu yovo mu mana kazaya mu kuma kia Yave?

O nkwa lulendo nanga i wau kadi vanga. Kansi Mose kavanga wo ko. O Nkand’a Nzambi uvovanga vo: “O Mose osunzwidi diambu diau kwa Yave.” (Ntalu 27:5) Yindula ediadi! Kana una vo wafila nkangu a Isaele mu mvu 40, Mose kabunda vuvu muna yandi kibeni ko, kansi muna Yave. Kieleka, Mose nlembami kikilu kakala.

Kayindulanga ko vo yandi kaka ofwanukini tambula e wisa. Wayangalala vava Yave kasola Aneyisaele akaka mu kala se ngunza. (Ntalu 11:24-29) Vava ko wandi kamvovesa vo kasola akaka kimana bansadisa muna salu kiandi, vana vau wasadila luludiku lwaluna. (Luvaiku 18:13-24) Vava kiafinamanga lufwa lwandi, kana una vo wakala yo nkuma, Mose walomba kwa Yave kasola muntu wadi vinga vana fulu kiandi. Vava Yave kasola Yosua, Mose wanyikama yo wondelela nkangu balemvokela Yosua nze mfidi au yamuna Nsi a Nsilu. (Ntalu 27:15-18; Nsiku 31:3-6; 34:7) Diakala se lau diampwena kwa Mose mu fila Aneyisaele muna nsambila. Kansi kasia wisa kiandi va fulu kiantete ko lembi tokanena e wete di’akaka.

Katufwete yambula ko vo e ngangu yovo wisa kiatukitula se akwa lulendo. Sungamena dio vo: Muna sala e salu kia Yave una ufwene, lulembamu i diambu disundidi o mfunu ke ngangu zeto ko. (1 Samuele 15:17) Avo tu alembami, tusia ngolo muna sadila luludiku lwalu lwa Nkand’a Nzambi: “Bunda Yave e vuvu yo ntim’aku wawonso, kuyekamena waku umbakuzi ko.”—Ngana 3:5, 6.

E mbandu a Mose ikutulonganga mpe vo katufwete sianga wisa kieto va fulu kiantete ko.

Nga tulenda vwa nluta muna tanginina mbandu a lulembamu a Mose? Elo! Vava tusonganga lulembamu lwakieleka, ke dikalanga diampasi ko kwa wantu mu kutufinama ye kutuzola. Edi disundidi o mfunu, tuzolanga Yave wa Nzambi ona osonganga e fu kiaki kiambote. (Nkunga 18:35) “Nzambi osiang’akwa lulendo e kitantu, vo i alembami, okubavana nsambu.” (1 Petelo 5:5) Ekwe kuma kiamfunu tuvwidi muna tanginina lulembamu lwa Mose!