O zola i tokanena wete di’akaka yo kubavwanga mfunu. O nkwa zola osonganga muna mvovo ye mavangu mandi una kebadikilanga azolw’andi, kana nkutu vava dikalanga diampasi muna vanga wo.

O Mose wasonga zola kwa Nzambi. Mu nkia mpila? Sungamena dina diasonama muna 1 Yoane 5:3: “I yau yiyi e nzol’a Nzambi, tulunda nkanikinu miandi: E nkanikinu miandi ke miampasi ko.” Mose wazolanga Nzambi kadi walundanga e nkanikinu miandi. Wavanga mawonso Nzambi kankanikina. Walemvokela Nzambi vava kantuma kavanga diambu diampasi dia kwenda mokena yo Faro wa nkwa lulendo. Walemvokela mpe vava kantuma kavanga diambu dina diamonekanga vo diakete kwandi, wanda nkau andi muna Mbu Ambwaki. Mose walemvokelanga konso nkanikinu kavewanga, wakala wampasi yovo ve. ‘I una kavanga.’—Luvaiku 40:16.

Mose wasonga o zola kwa akw’andi Aneyisaele. Oyau babakula vo Yave wasadilanga Mose muna fila nkangu andi. Muna kuma kiaki, bafinamanga Mose yo kunzayisa mambu mabatokanesanga. Tutanganga vo: “O nkangu utelamene vana vena Mose tuka menemene yaku masika.” (Luvaiku 18:13-16) Yindula e mpila Mose kayoyelanga vava kawanga mawonso matokanesanga Aneyisaele lumbu yawonso. Kana una vo i wau, Mose wakala ye kiese kiasadisa nkangu kazolanga.

Mose wasambanga mpe muna wete dia azolw’andi. Kana nkutu vava bamvanganga e mbi, wasambanga mu kuma kiau. Muna bonga e nona, vava Mireyame wa mpangi andi kanyidimina, Yave wantumba ye kimbevo kia wazi. Vana fulu kia yangalela mu kuma kia tumbu kavewa, Mose wadodokela Nzambi mu kuma kiandi yo samba vo: “E Nzambi unsasula, do.” (Ntalu 12:13) Nki kiadi fila Mose mu vanga sambu kiakina avo ke zola ko?

Tulenda tanginina Mose muna yima zola muna Nzambi. O zola kwaku kukutufila mu lemvokela nkanikinu miandi “muna nsi a ntima.” (Roma 6:17) Vava tulemvokelanga Yave ye nsi tima, tuyangidikanga ntim’andi. (Ngana 27:11) Muna vanganga owau, yeto mpe nluta tuvwa. Vana ntandu, vava tusadilanga Nzambi yo zola, ke tuvanga kaka oma mansongi ko kansi tukala ye kiese muna vanga mo.—Nkunga 100:2.

E mpila yakaka tulenda tanginina Mose i songanga nzol’a mvevo kwa akaka. Vava akundi ye yitu yeto bekutuzayisanga mana mekubatokanesanga, o zola kukutufilanga mu (1) wá ye sungididi kiawonso, (2) bakula e mpasi zau yo (3) kubavwa o mfunu.

Nze Mose, tulenda samba muna wete di’akaka. Ezak’e ntangwa, tulenda kendalala avo katuzeye mpila tulenda kubasadisila ko. Tulenda vova vo: “Nkendalele kikilu, kina ye diambu ndenda vanga ko avo ke samba kaka ko.” Kansi, sungamena dio vo: ‘E sambu kia muntu ansongi kivwidi nkuma.’ (Yakobo 5:16) E sambu yeto yilenda fila Yave mu vanga diambu dina kadi vanga ko. Ozevo, ke vena diambu disundidi mfunu ko tulenda vanga kw’azolwa eto avo ke samba mu kuma kiau ko. *

Nga kukwikidi ko vo tulenda longoka mayingi mu kuma kia Mose? Kana una vo wakala muntu nze yeto, watusisila mbandu ambote ya lukwikilu, lulembamu yo zola. Avo tutanginina mbandu andi una ufwene, dikututwasila nluta ye akaka mpe.—Roma 15:4.