Adieyi Nzambi kevavanga oku kwa yeto? Nga tufwete lemvokela nsiku miayingi mina kasikidisa? Ve kikilu. Mun’owu wa mvovo mia Yesu Kristu wa Mwan’a Nzambi, dina Yave kevavanga oku kwa yeto dilenda yikilwa mu mvovo mosi kaka.—Tanga Maku 12:28-31.

Badika dina Yesu kateka vanga vitila kayika mvovo miami. Yesu walonganga muna tempelo muna lumbu kia 11 kia ngonde a Nisani, vitila lufwa lwandi. E mbeni zandi banyuvula kiuvu kia mpimpita muna kuntesesa esakuba. Kansi, e mvutu kavana zabafila mu lembi kunyuvula diaka. I bosi, Yesu wayuvulwa kiuvu kiaki: ‘Nkia nkanikinu i wantete muna miawonso?’—Tini kia 28.

E kiaki, kiuvu kiampasi kiakala. Ayuda batantananga muna zaya kana nkia nkanikinu i wantete yovo wasunda o mfunu muna nkanikinu 600 mia Nsiku a Mose. Akaka bavovanga vo e nkanikinu miawonso miafwanana ye ke vena nkanikinu usundidi ko. Nkia mvutu Yesu kavana muna kiuvu kiaki?

Muna mvutu zandi, Yesu wayika nkanikinu miole. Wavova vo, o nkanikinu wantete i wau: “Zolang’o Yave wa Nzambi aku yamuna nsi a ntim’aku yawonso yo muna fulumwinu kiaku kiawonso, yo mun’efuka diaku diawonso.” (Tini kia 30; Nsiku 6:5) E mvovo ntima, nyindu, moyo ye nkuma, ke mifwete vambulwa ko. * E mvovo miami misongele vo, muna zola Nzambi, divavanga vo twanzola yamuna nsi a ntim’eto awonso, nyindu ye mavwa meto. Nsekola imosi ya Nkand’a Nzambi isasilanga o mvovo wau vo: “O Nzambi ofwete zolwa muna mawonso ye una ufwene.” Avo ozolele Nzambi, ovanga mawonso muna zingila ngwizani ye nkanikinu miandi lumbu yawonso yo vwa dienga diandi.—1 Yoane 5:3.

O Yesu wavova vo o nkanikinu wa nzole i wau: ‘Zola nkw’aku nze una okuyizolelanga.’ (Tini kia 31; Fuka 19:18) Ofwete zola Yave kumosi ye mfinangani zaku. O zola mfinangani, kusonganga o zola kwa muntu muna Yave. (1 Yoane 4:20, 21) Avo tuzolanga mfinangani zeto, tukadila yau muna mpila tuzolanga vo bakadila yeto. (Matai 7:12) Muna mpila yayi, tusonga vo tuzolanga Nzambi ona watuvanga muna fwaniswa kiandi.—Etuku 1:26.

Nkia mfunu wina o nkanikinu wa zola Nzambi ye mfinangani? Yesu wavova vo: “Ke vena nkanikinu akaka usundidi miami o nene ko.” (Tini kia 31) Muna mvovo miankufi Yesu wasonga vo e nkanikinu miawonso miatuka muna nkanikinu miole miami.—Matai 22:40.

Ke diampasi ko mu yangidika Nzambi. Mawonso kevavanga oku kwa yeto malenda yikilwa mu mvovo wau wankufi: zola. O Nzambi ovavanga vo twanzola. O zola ke kusongelwanga kaka mu mvovo ye nyindu ko, kansi muna mavangu mpe. (1 Yoane 3:18) Ekuma olembi longokela una olenda yimina yo songa o zola muna Yave wa Nzambi una vo “i zola”?—1 Yoane 4:8.