E KIUVU kina muna fukwa ki’Eyingiilu diadi, nga tokanesa kikutokanesanga? Akaka ke bekwikilanga ko vo Nzambi nkwa nsoki. Kansi ulolo wa wantu o unu bekatikisanga kana vo Nzambi nkwa nsoki yovo ve. Ekuma?

Awana bevulukanga vava sumbula yibwanga, beyuvulanga: “Ekuma Nzambi kayambwidi vo e sumbula kiaki kiabwa? Nga Nzambi nkwa ntim’ambadi yovo nkwa nsoki?”

Akaka bevanganga e yuvu yayi vava betanganga Nkand’a Nzambi. Vava betanganga lusansu lwa Noa ye Kizalu bekiyuvulanga: ‘Ekuma Nzambi anzolwa kafwasila ulolo wa wantu? Nga diadi ke disonganga ko vo yandi nkwa nsoki?’

Nga wakivanga kala e yuvu ya mpila yayi? Nga diampasi kwa ngeye mu vana e mvutu kwa awana beyuvulanga kana vo Nzambi nkwa nsoki? Muna baka e mvutu, badika e kiuvu kiakaka kilenda kusadisa.

Muna mvovo miankufi, tumenganga yovo lenda o nsoki kadi tuzeye swaswanesa ewete yo bi. Twaswaswana kikilu ye bulu muna diambu diadi. O Mvangi eto watuvangila muna “mpw’andi.” (Etuku 1:​27) Ediadi aweyi disongele? Disongele vo Nzambi watuvana e lendo kia tanginina e fu yandi, nsiku miandi yo zaya swaswanesa ewete yo bi. Badika e diadi: Avo Nzambi watuvana e lendo kia zaya swaswanesa ewete yo bi ye tumenganga mavangu ma nsoki, nga Nzambi ke menganga mo ko e?

Nkand’a Nzambi usonganga e ziku vo Nzambi omenganga o bi, kadi ukutusikidisanga vo: “Una disundidi ezulu e nza, i una isundidi fu yame e fu yeno, ye ngindu zame e ngindu zeno.” (Yesaya 55:⁠9) Avo tuvovele vo Nzambi nkwa nsoki, sono kiaki tuvunisanga, dina nze yeto tuvovanga vo e fu yeto isundidi e fu ya Nzambi. Ozevo, una ke twalweke mu tezo kiaki ko, diamfunu twabadika mambu makaka mu zaya kana vo Nzambi nkwa nsoki yovo ve. Dilenda kala vo tukwikilanga vo Nzambi ke nkwa nsoki ko, kansi nanga tukiyuvulanga: Ekuma ezak’e ntangwa mavangu mandi memonekanga nze mansoki? Muna kutusadisa, yambula twabadika e nsas’a mvovo wau, “nsoki.”

Vava tuyikilanga muntu vo nkwa nsoki, tukumbadikilanga vo nkwa makani mambi. O nkwa nsoki oyangalelanga mona e mpasi za akaka yo lembi kubatokanena vava bemonanga e mpasi. Ozevo, o se ona otumbanga mwan’andi wau vo oyangalelanga mona e mpasi za mwana, o se ndioyo nkwa nsoki. Kansi, o se otumbanga mwan’andi y’ekani dia kunsingika, o ndioyo se diambote. Wau vo ke ntangwa zawonso ko tubakulanga ekuma muntu kavangidi e diambu edi yovo dina, ke diampasi ko mu kuntumba.

Yambula twafimpa mambu mole mefilanga wantu mu badika vo Nzambi nkwa nsoki: Sumbula yibwanga o unu yo tusansu twa Nkand’a Nzambi tusonganga mpila ina Nzambi kafwasila yimpumbulu. Nga ziku kia mambu mama kisonganga vo Nzambi nkwa nsoki?