Nkento mosi wakatikisanga vo Yave olenda kumvwa o mfunu wavova vo: “E ngindu za sia vo kina mfunu ko, i diambu diatoma kuntokanesanga muna sunda.” Nga i wau mpe oyindulanga? Avo i wau, nanga olenda kiyuvula: ‘Nga Yave ovwanga asambidi andi o mfunu?’ E mvutu i zazi, elo. E mvovo mia Yesu misonganga e ziku vo Yave okutuvwanga kieleka o mfunu.—Tanga Yoane 6:44.

O Yesu otomene zaya kiwuntu ye luzolo lwa Yave, adieyi kavova mu kuma kiaki? Wavova vo: ‘Ke vena ona olenda kwiza oku ngina ko, avo Se, ona wantuma, kekuntunta ko.’ (Luka 10:22) Ozevo, katulendi kituka alandi a Kristu ko ye asambidi a Yave wa S’eto ezulu avo Yave katuntuntidi ko. (2 Tesalonika 2:13) Avo tubakwidi e mvovo mia Yesu, tulenda kala ye ziku vo Nzambi okutuvwanga o mfunu.

O mvovo Yave okututuntanga, aweyi usongele? O mvovo wa Kingerekia wasekolwa vo “tunta,” usadilwanga mpe vava muntu ketuntanga yovo vola ekonde. (Yoane 21:6, 11) Nga Yave okututuntanga mu kingolo yo kutukomekena muna kunsadila? Ve kikilu. Yave watuvana nswa a kuyisolela, ozevo, kekutukomekenanga ko. (Nsiku 30:19, 20) Nkwa ngangu mosi wasasila diambu diadi mu mpila eyi: “Divavanga vo muntu yandi kibeni kaziula o ntim’andi.” O Yave osatanga ntima mia wantu ayingi ova nza muna tomba awana bena ye ntima miansongi. (1 Tusansu 28:9) Vava kemonanga vo muntu una yo ntima wa mpila yayi, Nzambi okuntuntanga. Mu nkia mpila?

O Yave kuna ngemba zawonso otuntanga akwa ntima miansongi. (Mavangu 13:48) Yave ovanganga wo mu mpila zole, muna nsangu zambote zisamunwanga kwa wantu mu nza yawonso ye muna mwand’andi avelela. Vava Yave kesololanga o ntima ulemvokelanga e ludi kia Nkand’a Nzambi, o mwand’andi usadisanga muntu ndioyo mu bakula yo lemvokela e ludi muna zingu kiandi. (1 Korinto 2:11, 12) Kondwa kwa lusadisu lwa Nzambi, ke twadi lenda nkutu kituka alandi a Yesu ko ngatu asambidi akwikizi a Yave.

Ozevo, e mvovo mia Yesu muna Yoane 6:44, adieyi mikutulonganga mu kuma kia Yave wa Nzambi? Yave otuntanga wantu e kuma kadi osololanga diambu diambote muna ntima miau yo kubalunga-lunga. O nkento oyikilu kala vana ntandu wakasakeswa kikilu vava kabakula e ziku kia diambu diadi. Wavova vo: “O kala se selo kia Yave i lau diampwena muntu kalenda vwa. Avo Yave unsolele mu kala selo kiandi, mfwete dio yangalela.” Adieyi tuvova mu kuma kiaku? O zaya vo Yave olunga-lunganga asambidi andi nga dikufilanga mu ziula e mwelo a ntim’aku?