ZINGU KIAME: Kun’evata diakete dia Texcoco yawutukila kuna nsi ya México. Muna tangwa yayina ke kwakala ye nzila zambote ko, nzila ya ntoto yadiatilwanga yazala ye mbundukutu. Ke diakala dianzenza ko mu mona wantu batesekanga mfunda yau vana ntandu a mabuluku yo nata yo kuna mbanza muna teka. Mase mame asukami bakala, omono i mwana ansambwadi muna wana vwa twawutuka. Muna kutudikila, o s’ame wavangululanga nsampatu. Kansi, wafwa vava yakala ye kimbuta kia mvu nsambwadi. Tuka kafwila, o ngw’ame ofuntukanga muna kutudikila.

O nkak’ame ayakala nsiki a nsambi (viola) kakala, yandi wakala se mfidi a buka kia korale kia dibundu. Ndonga muna yitu yame bazeye sika sadilwa yayi. O ngudi ame wayimbilanga muna buka kia korale, o ngudi ame ankazi yandi watwadisanga e nkunga, nsiki a piano mpe kakala. Minkwikizi mia Katolika twakala. Mono yakala se kindende kiasadisanga mpelo. Yazola kituka se misionario a dibundu dia Katolika. Muna ntangwa yayina, yakala ye fu kia tala filme za wantu benwananga e karate. Wau vo ntangwa zawonso yatalanga e filme zozo, yakituka mpe se nkwa nsoki.

Yakota mu sikola ya kinganga yakala kuna mbanz’a Puebla. Yakala y’ekani dia kituka se mpelo a dibundu dia Katolika. Kansi, vava yalwaka kumfoko a sikola yayi, e Dibundu dia Katolika diankendeleka kikilu. Ndumba mosi wa madre wazola leka yame. Kiatonda ko, kansi e diambu diadi diasikamesa etima diame dia zola sompa. Yamonanga mpe ulolo wa mpelo batanga e zumba. Muna kuma kiaki, yabembola ekani dia kituka se mpelo.

Yayantika longoka sika e miziki ku Conservatório Nacional de Música kuna Mbanz’a México. Vava yafokola longoka, yasompa yo wuta wana yá. Muna dikila e nzo ame, yayimbilanga muna misa mia Dibundu dia Katolika.

Tuka twasompanena, o longo lweto ke lwakala lwakiese ko. O nkaz’ame yo mono fu yambi twakala yau, musungula mu kuma kia nsongo twasongaziananga. Kuna lubantiku twatantananga yo nwana. Vava twalungisa mvu 13 mia lukazalu, twavambana yo vonda longo.

Yawanana ye Mbangi za Yave mu nkumbu antete una ke twavambanene ko yo nkaz’ame. Mbangi zole za Yave badodela kielo kiame yo mokena yame oma ma Nkand’a Nzambi. Yayindulanga vo nzeye mayingi mu kuma kia Nzambi, muna kuma kiaki, yazola kubasonga vo ke bazeye diambu ko. Yabavanga e yuvu yampasi yina yayindulanga vo ke belenda yo vanina mvutu ko. Kansi, yasivika kikilu vava yamona vo bampana e mvutu zambote zatuka muna Nkand’a Nzambi. Yakwikila vo kiazaya mayingi ko. O nkaz’ame kazolanga Mbangi za Yave ko, omono mpe kiakalanga ye ntangwa ko, muna kuma kiaki, bayambula kutukingula.

Vioka mvu tanu yasompa nkento akaka oyikilwanga vo Elvira, i bosi yawanana diaka ye Mbangi za Yave. O Elvira kamenganga Mbangi za Yave ko ikuma ke diakala diampasi ko mu yantika longoka Nkand’a Nzambi. Kana una vo i wau, mvu miayingi miavioka muna soba e zingu kiame.

Yabakula vo muna sambila Yave ye nsi a ntima wawonso, mfwete soba mambu makaka muna zingu kiame. Entete diavavanga vo yabembola e salu kia yimbila muna misa mia dibundu dia Katolika, ediadi diavavanga vo yavava salu kiakaka muna dikila e nzo ame. (Lusengomono 18:4) Diavavanga mpe vo yakazala yo Elvira.

E diambu diasunda e mpasi muna soba, i fu kia funga makasi mu konso kwa diambu. Sono yole ya Nkand’a Nzambi yatoma kunsadisa, e sono kiantete i Nkunga 11:5 kivovanga vo Yave omenganga mavangu ma yimpumbulu, kiazole 1 Petelo 3:7. E sono kiaki kiandonga vo avo nzolele vo Yave kawá e sambu yame, mfwete zitisa o nkaz’ame. Vava yabadikanga e sono yayi yo lomba lusadisu lwa Yave muna sambu, yayantika soba e fu yame malembe-malembe.

Owau e zingu kia nzo ame se kiakiese. Isianga ngolo mu vutulwisa e ngwizani yo wana yawuta yo nkento antete yo sadisa mpe esi nzo ame mu kala yo lukwikilu lwasikila muna Nzambi.

Vava yakala nleke yakala y’ekani dia kituka se mpelo yo sadisa wantu. Owau, e zingu kiame se kiambote. Salu kia longa yo sika miziki nsalanga muna dikila esi nzo ame. Ivutulanga matondo wau vo Yave wasonga luzindalalu lwandi kwa mono yo kumpana elau dia soba e zingu kiame yo kituka se muntu ambote.