NTU A DIAMBU WA FUKWA: E NZA YAKONDWA MPAMBULA—NKIA NTAGWA IKALA
Fu kia Sia Mpambula Kiamwangana mu Nza Yawonso
JONATHAN wawutukila kuna América, kansi mase mandi esi Coréia, wabangikwanga tuka kileke kiandi mu kuma kia fu kiaki. Vava kakola, wavava zingila va fulu kina o wantu ke besianga mpambani ko mu kuma kia mpwa yovo kanda diandi. Wakituka se dotolo kuna mbanza Alasca kuna node ya América. Wau vo mbevo zayingi kawukanga bafwanana muna mpwa, wakala ye vuvu vo kewanana diaka ye wantu bekunsia mpambula ko kuna mbanza yayina.
E vuvu kiandi kiawonso kiafokoka vava kawuka nkento mosi wakala ye kimbuta kia mvu 25. Vava nkento ndiona kavutukil’o zayi, watungununa Jonathan yo kunlevola kadi tuka kileke kiandi walongwa vo kamenganga esi Coréia. Muna kuma kiaki, Jonathan wabakula vo mpasi zankatu kamona mu yaluka yo kwenda zingila kuna mbanza Alasca.
Dina diabwila Jonathan disonganga e ziku kia mana mevangamanga o unu. E fu kia sia mpambula kiamwangana mu nza yawonso. Konso fulu kina wantu, kina mpe ye fu kia sia mpambula.
Kana una vo e fu kiaki kiamwangana mu nza yawonso, wantu ayingi betumbanga kio. Ekuma fu kiaki kiwokelanga kana una vo kitumbwanga? E kuma kadi, ndonga muna wantu bemenganga e fu kiaki ke bazeye wo ko vo yau mpe fu kiaki bena kiau. Nga i diau mpe divangamanga kwa ngeye?
DIAMBU DIA NGEYE KIBENI
Diampasi mu bakula kana vo tuna ye fu kiaki muna ntima. Nkand’a Nzambi uyikanga e kuma ediadi divangamenanga vava tutanganga vo: “O ntima usundidi mawonso o tekama.” (Yeremiya 17:9) Muna kuma kiaki tulenda kuyivuna yo kwikila vo tuzolanga wantu a mpila zawonso yovo yindula vo tuna ye kuma kia menga makanda makaka.
Adieyi Ovanga avo Owananene ye Diambu nze Diadi?
Muna zaya kana vo tuna ye fu kia sia mpambula kwa makanda makaka yovo ve, badika e nona eki: Mu kangala una ngeye mosi mu fuku. Matoko mole ana kwasidi mona ko bafinamene. Omwene vo makesa ma wantu kikilu, mosi muna yau osimbidi lekwa vana koko.
Adieyi obanza mu kuma kia wantu awaya, nga vumisa bekuvumisa? Nanga mana wateka mona malenda kufila mu vava kuyitanina. Kansi, nga mafwete kufila kikilu mu badikila matoko mama vo yimpumbulu? E kiuvu kiakaka kilenda vangwa i kiaki: Nkia kanda yovo se kia nitu olenda kubabadikila? E mvutu zaku zisonga kana vo ongeye mpe una ye fu kia sia e mpambula yovo ve.
Avo tu akwa ziku, tukwikila vo yeto awonso tuna ye fu kia sia mpambula. Kana nkutu Nkand’a Nzambi uvovanga vo wantu bena ye fu kiaki, kadi tutanganga vo: ‘Muntu ofundisanga nkw’andi mun’owu wa ndose andi.’ (1 Samuele 16:7) Wau vo yeto awonso twasambukila fu kiaki kiambi, nga tulenda kio venga muna zingu kieto? Nga vena ye ntangwa ina wantu awonso bevevoka mu fu kiaki?
