Nga Olenda Bunda e Vuvu Muna Dibundu mu Diambu Ditadidi Nzimbu?
Estelle * nkumbu miayingi kayendanga ku nzo a nzambi yo wan’andi. Wavovesa mfidi andi a dibundu vo: “Nzolele longoka oma ma Nkand’a Nzambi. Kansi, kazola kundonga Nkand’a Nzambi ko.” I bosi, wayambula kwenda ku nzo a nzambi. Wavova vo: “Mfumu za dibundu bansonekena nkanda muna kunzayisa vo avo kilenda diaka kwenda ku nzo a nzambi ko, yatwikanga e nzimbu. Yabakula vo ke mono ko batokanenanga kansi nzimbu zame kaka bazolanga.”
Angelina, nkento mosi wankwikizi wavova vo: “Muna dibundu diame e longa dia nkayilu nkumbu tatu diaviokeswanga, yeto awonso twakomekenwanga vo twakobola nzimbu muna longa nkumbu tatu. Ntangwa zawonso balombanga nzimbu. Yabakula vo, ‘wantu awaya ke bena yo mwand’a Nzambi ko.’”
Muna zunga kiaku, nga mabundu ndekwa besadilanga muna komekena wantu kimana bavananga nzimbu? Nga diadi ngwizani dina yo Nkand’a Nzambi?
ADIEYI NKAND’A NZAMBI ULONGANGA?
Yesu ona wasikidisa nkubika Kikristu wavova vo: “Ngovo nutambwidi, nuvan’e ngovo.” (Matai 10:8) E nsangu za Nkand’a Nzambi ke zifwete tekwa ko, awonso bena yo luzolo balenda zo wá.
Akristu a tandu kiantete akweyi babakilanga e nzimbu zasadilwanga muna lungisa e nsatu za nkutakani?
Konso muntu wakubanga nzimbu nze “una kakanini muna ntim’andi, ke ku ntantu ko, ngatu ku nkomena: Kadi Nzambi ozolele mvani amvevo.” (2 Korinto 9:7) Paulu wa ntumwa wavova vo: “Fuku yo mwini twasadidinge, ke twafinangesa muntu vovo nwina, i nteleka twatelek’e nsangu zambote.” (1 Tesalonika 2:9) Paulu, wasalanga salu kia tunga saba muna kuyidikila.—Mavangu 18:2, 3.
ADIEYI MBANGI ZA YAVE BEVANGANGA?
Mbangi za Yave bekutakananga mu nzo betunganga ezi ziyikilwanga vo Maseka ma Kintinu. E nzimbu akweyi zitukanga? Mbangi za Yave ke besadilanga longa dia nkayilu ko ngatu mvolopi muna lomba nzimbu. Kansi, konso ndiona oyangalelanga oma melongwanga, olenda kobola nzimbu muna nkela ya tukau ina mun’Eseka dia Kintinu.
Akweyi kutukanga e nzimbu zisadilwanga muna dibundu?
Dialudi vo nzimbu divavanga muna nieteka yo twika Eyingidilu diadi. Kansi, e finkanda fiafi ke fitekwanga ko. Fisadilwanga muna mwanganesa eludi kia Nkand’a Nzambi.
Adieyi obenze: Nga nkubika yayi, ngwizani ina ye mvovo mia Yesu ye mbandu y’Akristu a tandu kiantete?
^ tini. 2 Nkumbu zakaka muna malongi mama zasobwa.
