Nga wakendalala kala mu kuma kia diambu diambi diabwa muna dibundu? Avo i wau, dilenda kala diampasi mu bunda e vuvu muna mabundu. Kansi, kala ye ziku vo vena ye dibundu dina olenda bunda vuvu. Vava Yesu kakala ova ntoto, wakubika buka kia alandi akwikizi yo kubalonga vo bazingila ngwizani ye nkanikinu mia Nzambi. Yamu wau, vena ye alandi akieleka a Kristu ana besianga ngolo za zingila ngwizani ye nkanikinu mia Nzambi. Akweyi olenda kubasololwela?

Estelle ona oyikilu kala, wavova vo: “Yayantika longoka Nkand’a Nzambi ye Mbangi za Yave. Ke kolo ko, yabakula e sono kia Yoane 8:32 kivovanga vo: ‘Nwazay’e ludi, e ludi kikunuvevola.’”

Ray ona oyikilu kala, wavova vo: “Vava yayantika longoka Nkand’a Nzambi ye Mbangi za Yave, yabakula vo ke Nzambi ko twasanga e mpasi kwa wantu. Yayangalala mu zaya vo Nzambi ovwidi kuma kiampwena ke yambulwilanga e mbi ye osianga nsilu vo ke kolo ko osukisa yo.”

Diampasi mu vanga edi diansongi mu nza yayi ekolo wantu ayingi bevanganga oma mambi. Kansi, olenda kwaku vanga oma mambote. Wantu ayingi bavwidi o mfunu a lusadisu muna bakula yo sadila malongi ma Nkand’a Nzambi. Ekiaki i kuma Mbangi za Yave befidilanga elongi dia ngovo dia Nkand’a Nzambi kwa mafunda ma wantu mu nza yawonso. Konso lumingu, wantu ayingi belongokanga dina kieleka Nkand’a Nzambi ulonganga. Ediadi dikubasadisanga mu finama Mvangi au yo sikidisa zingu kia nzo za kiese. *

E lumbu owanana ye Mbangi za Yave, nga olenda kubayuvula ekuma bebundilanga dibundu diau e vuvu? Fimpa malongi yo lusansu lwau. I bosi, ngeye kibeni baka nzengo zaku kana vo vena ye dibundu olenda bunda e vuvu.