Nga Yave okutuvwanga kieleka o mfunu yovo ke tokanenanga mpasi za wantu ko? E mvutu za Nkand’a Nzambi mu kuma kia kiuvu kiaki za lufiaulwisu kikilu. Dialudi, Nzambi ovwanga kieleka wantu o mfunu ye ozolele vo twakala ye kiese muna zingu. Konso lumbu oyambulanga vo wantu awonso kana nkutu yimpumbulu bavwa nluta muna mawete mandi. Badika mvovo mia Paulu wa ntumwa.—Tanga Mavangu 14:16, 17.

Vava kamokena yo nkangu a mbanza Luseta ana ke basambilanga Nzambi ko, Paulu wavova vo: ‘Nzambi wayambula zula yawonso yenda ngyend’au muna tandu yavioka. Kansi, kalembwa songa kimbangi ko, wau kavanganga mawete, yo kunuvana mvula zituka kun’ezulu, ye nsungi zanyimi, kanuzadisanga ntima yo madia y’eyangi.’ E mvovo miami nkia nsasa miakala kw’awana bawanga Paulu?

O nkangu a mbanza Luseta babakula e nsasa a mvovo mia Paulu vana vau, kadi avati a nsengo bakala, o ntoto au mpe wa mbongo wakala. Kansi, Paulu wabasungamesa vo Nzambi i tuku dia mvula ye nsungi zanyimi. Ozevo, ntangwa zawonso bavelanga mbongo ayingi yo dia madia mambote, bavwanga nluta wa mawete ma Nzambi.

E mvovo mia Paulu kwa nkangu a mbanza Luseta, mambu mayingi mamfunu mikutulonganga mu kuma kia Yave wa Nzambi.

Yave okutuvananga nswa wa kuyisolela. Yave wayambula vo wantu a zula yawonso ‘benda muna nzila zau.’ Nsekola imosi ya Nkand’a Nzambi isasilanga o mvovo wau nze “benda muna nzila ibayangidikidi” yovo “muna nzila ina bazolele.” Yave ke komekenanga muntu ko muna kunsambila. Watuvana nswa wa kuyisolela kimana twayisolela e mpila zingu tuzolele.—Nsiku 30:19.

Yave ozolele vo twanzaya. Paulu wasasila vo Nzambi ‘kalembwa songa kimbangi ko.’ E nsekola ya Nkand’a Nzambi iyikilu kala isasilanga mvovo wau vo, “osonganga kwa wantu e mpila Nzambi kena.” O nsem’a Nzambi utelekanga kimbangi kia ‘fu yandi ilembi monekanga,’ kumosi yo wete wandi, ngangu, nkuma yo zola. (Roma 1:20) Yave wasengomona mayingi mu kuma kiandi muna Nkand’a Nzambi. (2 Timoteo 3:16, 17) Ediadi disonganga vo Nzambi ozolele vo twanzaya.

Yave ozolele vo twakala ye kiese. Paulu wavova vo: ‘Ozadisanga ntima mieto yo madia y’eyangi.’ Kana nkutu asumuki ana ke bazeye Yave ko, bedianga yo yangalala. Kansi, Nzambi ozolele vo twakala ye zingu kiakiese yakwele mvu. Tulenda vwa mpila zingu kiaki, avo tulongokele e ludi mu kuma kiandi yo sadila kio muna zingu kieto.—Nkunga 144:15; Matai 5:3.

Yeto awonso tuvwanga nluta muna mawete ma Yave lumbu yawonso. Ekuma olembi longokela mayingi muna zaya e mpila olenda yangidikila Nzambi ona ‘ozadisanga ntim’aku yo madia y’eyangi’?