“Ovo kimpumbulu oyele, o nkangu uvumuka.—Ngana 29:2.

O lusansu lwazala ye nona ya ayadi a ntima mbâdi ana betwasanga mpasi zayingi kwa nkangu beyalanga. Dialudi vo ke ayadi awonso ko bena yo ntima mbâdi. Akaka bena ye makani mambote mu kuma kia nkangu au. Kansi, vava beyadikwanga, makani mau mefunganga mu kuma kia nwanina wisa. Akaka besadilanga wisa kiau muna nluta mia yau kibeni yo mwesa nkangu e mpasi. Henry Kissinger ona wakala Nsoneki (secretário) a luyalu kuna Estados Unidos, wavova vo: “O lusansu i ziku kisonganga e ngolo zivangwanga kansi ke zilungisanga ekani ko ye mana metezwanga kansi ke melendakananga ko.”

Nkand’a Nzambi uvovanga vo: “Ke dia muntu ko dia singikila ntambi zandi.” (Yeremiya 10:23) Wantu alembi lunga, ke bena ye ngangu zafwana ko ngatu umbakuzi wa singika mambu una ufwene. Avo wantu ka balendi singika ntambi zau ko, aweyi balenda fidila o nkangu? Nga obakwidi ekuma ayadi ke belendelanga fokola mpasi ko? Nkumbu miayingi, e mpasi zitukanga muna mpila yambi ya yadila.

Yesu wavova vo: “Muna wau i bezayil’o wantu awonso vo nu alongoki ame, ovo nzolani nuna yau.”—Yoane 13:35.

Afidi a mabundu nsangu za zola ye ungudi besamunanga. Kansi, ke belendanga sadisa alongoki au ko mu songa nzola akieleka yo yambula fu kia sia mpambula. Vana fulu kia sadisa wantu mu songa o zola, mabundu maluvunu wantu mevambanesanga, kubafila mu kuyibadikila vo basundidi akaka, kotesa e ntantani vana kati kwa wantu ye zula. Muna nkanda O Cristianismo e as Religiões do Mundo, Hans Küng wa nlongi a mambu ma Nzambi wasoneka vo: “O wantu basundidi kuyitundidika yo nwana e vita za mambu ma mbumba, i awana bevukumunwanga yo solwa kwa mabundu.”

 Vana ntandu, Afidi a mabundu beyambulanga vo wantu bavukana lembi kazala, tá zumba yo yambula vo yakala kaleka yo nkw’andi yakala. Mavangu mama, mefilanga wantu mu sambukila yimbevo, katula vumu, yimita kondwa luzolo, vonda longo, vambanesa esi nzo yo twasa mpasi ye ntantu zayingi.

“Konso muntu vana ken’ovukumunwa, ovo otwalakeso kwa diandi’keto, yo nekenwa. I bosi, eketo, ovo diyimiti, diwutidi esumu.”—Yakobo 1:14, 15.

Wau vo yeto awonso tw’asumuki, tuvanganga mambu mambi ye mpe tunwananga muna lembi vukumunwa muna “zolela ya nitu.” (Efeso 2:3) Diampasi dikalanga mu venga e zolela yambi. Kansi, avo ukivene muna vangu diadi dia loko, dilenda kutwasila mpasi zayingi.

P. D. Mehta wa nsoneki wavova vo: “Mpasi zakaka tumonanga i mu kuma kia loko dieto, lembi kuyikenga, vava lungisa zolele yeto y’etima dia vanga luzolo lweto.” O mavangu nze kolwa malavu, nua fomo, tá mpanza, vukana ye makaka mpe, mekululanga o “zitu wa wantu ayingi” yo twasa mpasi kwa esi nzo, akundi ye akaka mpe. Wau vo tw’asumuki, tufwete kwikila vava Nkand’a Nzambi uvovanga vo: “Tuzeye wo vo o nsema wawonso ubuminanga yo kala yo nsongo kumosi yamu wau.”—Roma 8:22.

Nkand’a Nzambi uvovanga vo Satana i “nzambi a tandu kiaki” ye osalanga ntwadi ye mianda miambi miyikilwanga vo nkuya.—2 Korinto 4:4; Lusengomono 12:9.

Nze Satana, e nkuya besianga ngolo mu yala yo vukumuna wantu. Paulu wa ntumwa wazaya ziku kia diambu diadi vava kavova vo: “Ndwan’eto ke ya nitu yo menga ko, kansi yo kuluntu, ye wisa, ye mingyala-nza mia tombe kiaki, ye vu ya umwanda ya bi muna mwezulu.”—Efeso 6:12.

Kana una vo nkuya beyangalalanga bangika wantu, ediadi ke diau ko i kani diau diantete. Ekani diau diantete, i vukumuna wantu kimana bayambula sadila Yave wa Nzambi a Mpungu-ngolo. (Nkunga 83:18) Mavangu ma mpandu, tadila matuti, kindoki yo vavila elau muna nkanda mia mpandu, i mambu makaka besadilanga muna yala yo vukumuna wantu. Muna kuma kiaki, Yave okutulukisanga kimana twalembi bwa mu vonza yayi yo tanina awonso besianga Satana ye nkuya e kitantu.—Yakobo 4:7.

Vitila tezo kia mafunda mole ma mvu, Nkand’a Nzambi wasakula vo: ‘Zay’edi, ovo, muna lumbu yambaninu mukwiza ntangwa zampasi.’

Muna songa mana madi kitula lumbu yayi se yampasi, Nkand’a Nzambi uvovanga vo: “Kadi wantu bekal’akwa kuzola, minzola-nzimbu, akwa lusanu, akwa lulendo . . . minkondwa-ungudi, minkondwa-ngwawani, akw’ekumbu, minkondwa-volo, akwa lunzi, mindembi zola mawete, ayekodi, akwa nswatakesa, akwa lungumvi-ngumvi, azodi ekembo ke mu Nzambi ko.” Mawonso mama mewokesanga e mpasi tumonanga mu ‘lumbu yayi yambaninu’ tuzingilanga.—2 Timoteo 3:1-4.

Muna mawonso mama, nga obakwidi ekuma o wantu ke belendelanga fokola mpasi ko kana una vo bena ye makani mambote? Akweyi tulenda bakila lusadisu? Tufwete bunda vuvu muna Mvangi eto ona osianga nsilu vo ‘ofwasa mavangu ma Nkadi ampemba’ ye nkuya miandi. (1 Yoane 3:8) Elongi dilanda, disonga mana Nzambi kesinga vanga muna fokola mawonso metwasanga e mpasi.