NTU A DIAMBU WA FUKWA: EKUMA MPASI ZIWOKELELANGA? NKIA NTANGWA ZIFOKOKA?
Wantu Ayingi Bafwa Kondwa Kuma
Noelle, mwana mbote kakala ye wazolanga bandula e teke. Lumbu kimosi, vava kakala ye mvu 3 ye ngonde 11, ekolo kasakananga vana yanzala kia nzo au wabwa muna yanga dia yolela (piscina) yo fwa.
Charlotte, Daniel, Olivia, Josephine . . . Awaya i akaka muna yingyana-ngyana 20 yafwa, vava kimpumbulu kimosi kanonga 26 ma yingyana-ngyana yakala ye mvu 6 yovo 7 muna sikola imosi kuna Connecticut. E diambu diadi diavangama kina kia 14 kia Desemba, 2012, kuna Estados Unidos. Muna longi dia lufwa, Obama wa nyadi a nsi ya Estados Unidos, wayika e nkumbu za yingyana-ngyana yafwa muna sumbula kiakina yo vovesa ana bafwilwa yitu yau vo: “E sumbula yayi ifwete fokoka.”
Vava kakala ye mvu 18, Bano ye mase mandi bayaluka ku Iraque muna mvu a 1996 yo kwenda kuna Noruega. Akundi andi banyikilanga vo Sun Rays, i sia vo, mwini utemene. Kansi, Bano wafwa kumosi yo wantu 76 ana bavondwa kina kia 22 kia Yuli, 2011, kwa kimpumbulu kimosi oyelanga kimbevo kia ntu. O kimpumbulu ndioyu wakisana vo: “Nu ndoloka . . . wau yalembi vonda wantu ayingi.”
O unu, tuwanga nsangu zayingi za mambu ma nsoki mevangamanga mu za yawonso. Yindula e ntantu ye mpasi bemonanga o wantu mu kuma kia awana befwanga mu sumbula kia makalu, umpumbulu, vita, mavangu ma nsoki ye sumbula yakaka. Wantu ayingi befwanga yovo mona e mpasi kondwa kuma.
Akaka betumbanga Nzambi kadi beyindulanga vo Mvangi eto ke vwanga wantu mfunu ko. Ayingi bevovanga vo Nzambi omonanga e mpasi zeto, kansi ke vanganga diambu ko. Akaka bevovanga vo sumbula yayi Nzambi okananga yo. O wantu ngindu zaswaswana bena zau mu kuma kia diambu diadi. Akweyi tulenda bakila mvutu za sikididi? Muna malongi melanda, tufimpa Nkand’a Nzambi una vo i Diambu dia Nzambi muna zaya mana metwasanga e mpasi ye una zifokokela.
