Nkwa ngangu mosi owukanga yimbevo ya ntu wavova vo: Wantu mayingi bavwidi o mfunu muna kala ye zingu kiakiese, ke lungisa kaka nsatu za nitu ko. Tumonanga ziku kia diambu diadi vava wantu besonganga luzolo lwasadila muntu yovo lekwa kibasundidi. Muna lungisa luzolo lwalu, akaka besadilanga ntangw’au muna longoka nsema, salu kia bandula mafoto, miziki ye makaka mpe. Kana una vo i wau, ayingi ke bemonanga kiese kiakieleka ko muna mambu mama.

Atangi a Nkand’a Nzambi ke besivikanga dio ko kadi bazeye wo vo wantu bena ye nsatu za kingutukila za mambu ma mwanda. E kapu yantete ya nkanda Etuku isonganga vo vava kavanga yakala yo nkento antete, Nzambi wamokenanga yau yo kala ye ngwizani ambote yo yandi. (Etuku 3:8-10) Nzambi kavanga wantu ko kimana bayitumina. Kansi, bavwidi nsatu za mokena yo Mvangi au. Nkand’a Nzambi utoma vovelanga nsatu zazi.

Muna bonga e nona, Yesu wavova vo: ‘Akwa nsambu awana bazeye nsatu zau za mwanda.’ (Matai 5:3) Muna mvovo miami tulenda bakula vo muna kala ye kiese muna zingu tufwete lungisa nsatu zeto muna mwanda. Aweyi tulenda zo lungisila? Yesu wavana mvutu vava kavova vo: “Ke mu dia kaka ko i kazingila muntu, kansi mu konso edi divaikidi omu nu’a Nzambi.” (Matai 4:4) Aweyi e ngindu yo tuludiku twa Nzambi tuna muna Diambu diandi tulenda kutusadisila mu kala ye zingu kiakiese? Yambula twabadika mpila tatu zamfunu.

O unu, vena ye akwa ngangu ayingi bevananga tuludiku mu kuma kia kikundi, zola, zingu kia esi nzo, mpila yasingikila ntantani, kiese yo songa nsas’a zingu. Kansi, nani osundidi e ­ngangu mu vana luludiku lwambote mu mambu mama mawonso avo ke Yave wa Nzambi ko wa Mvangi eto?

Muna bonga e nona: Vava osumbanga lekwa kiampa nze masini makatulwila mafoto yovo komputador, ovingilanga vo e lekwa kiaki kiakala yo nkand’a luludiku (catálogo) usasilanga e mpila ambote ofwete kio sadila. Nkand’a Nzambi una nze nkanda luludiku una Nzambi kavana muna fila zingu kieto. “Nkanda wau” usonganga una twavangilwa ye mpil’ambote tulenda wo sadila.

Nze nkanda miakaka mia luludiku, Nkand’a Nzambi ukutulukisanga mu kuma kia mavangu mambi malenda sia zingu kieto mu vonza. O tuludiku tuna wantu bevananga tulenda kala twambote, kansi nga ke diangangu ko mu sadila luludiku lwa Mvangi eto muna venga e mpasi?

Kana una vo Yave wa Nzambi okutuvananga luludiku ye nkanikinu miandi, kansi ke kutukomekenanga ko vo twalemvokela mio. Kansi, wau vo okutuzolanga, Yave okutuwondelelanga vo: “Omono i Yave wa Nzambi aku, on’okulong’oma ma mfunu, yo kufila muna nzila in’ofwete kwenda. Ekwe, kele vo wawunikina nkanikinu miame! o luvuvamu luaku luadi kala nze nzadi, o unsongi waku nze mavuku ma kalunga.” (Yesaya 48:17, 18) Muna mvovo miankufi, avo tusadidi luludiku lwa Nzambi tukala ye zingu kiambote. Ozevo, muna kala ye zingu kiakiese Nzambi tuvwidi o mfunu.

Akaka bemonanga vo ke bavwidi Nzambi mfunu ko kadi mambu mampasi mebwanga ke mena ngwizani ko yo lukwikilu lwa Nzambi a zola. Nanga, balenda yuvula vo: ‘Ekuma wantu ambote bemwenanga mpasi?’ ‘Ekuma wana akaka bewutukilanga ambevo?’ ‘Ekuma tumwenanga mpasi zayingi?’ E yuvu yayi yamfunu kikilu, kadi ozaya e mvutu zasikididi za yuvu yayi dilenda vanga diambu muna zingu kieto. Kansi, vana fulu kia tumba Nzambi, yambula twazaya una Diambu dia Nzambi divaninanga mvutu za yuvu yayi.

E kapu kiatatu kia nkanda Etuku kiyikanga Satana ona wasadila nioka muna vukumuna yakala yo nkento antete bakolamena nsiku a Yave wa Nzambi walembi dia nti a zayila wete yo bi. Satana wavova kwa Eva vo: ‘Ke nufwa kweno ko: kadi o Nzambi ozeye wo vo, e lumbu nudia kio, o meso meno metemoka, nukala nze Nzambi, nuzaya wete yo bi.’—Etuku 2:16, 17; 3:4, 5.

Muna mvovo miami, Satana wasonga vo Nzambi ke mvuni kaka ko kansi mpe mpil’andi a yadila yambi kikilu. Nkadi Ampemba wavova vo kele vo wantu banwididi, bekala ye zingu kiambote. Mambu mama aweyi madi singikilwa? Yave wavana e ntangwa kimana Satana kasonga kana vo mana kavova maludi yovo maluvunu. Nzambi wavana elau kwa Satana y’awana banyikama kimana basonga kana vo wantu balenda toma zinga kondwa kwa Nzambi.

Azeyi i mvutu zaku muna mvovo mia Satana? Nga wantu balenda kala ye zingu kiambote yo kuyiyala kondwa kwa Nzambi? E yimbevo, lufwa, umpumbulu, vita, vondaziana ye mpasi zakaka zibwilanga wantu zisonganga vo luyalu lwa wantu kondwa kwa Nzambi, mfwilu kaka lutwasanga. Vana fulu kia tumba Nzambi mu kuma kia mpasi za wantu, Nkand’a Nzambi usonganga etuku dia mpasi vo: ‘Muntu oyalanga nkw’andi muna kumwesa mpasi.’—Kimpovi 8:9.

Muna lufimpu lwalu, nga kukwikidi ko vo Nzambi tuvwidi o mfunu muna zaya mvutu za yuvu yayi itokanesanga wantu? Adieyi kevanga o Nzambi?

Se tuka kolo wantu bevavanga vevoka muna yimbevo, ununu ye lufwa. Befwasanga ntangwa ankatu, ngolo ye nzimbu muna kuyivevola mu mpasi zazi. Akaka bevavilanga luvevoko lwalu muna nlongo mivangwanga mu kitula wantu s’aleke yo lembi fwa, Xangrilá ye makaka mpe. Mawonso mama ke mekubatwasilanga nluta ko.

Nzambi ozolele vo wantu bakala ye zingu kiakiese. I una kakana tuka kuna lubantiku ye ke vilakana ekani diandi ko. (Etuku 1:27, 28; Yesaya 45:18) Tuna ye vuvu muna Yave wa Nzambi vo konso diambu kakanini dilungana. (Yesaya 55:10, 11) Nkand’a Nzambi uyikanga nsilu a Nzambi wavutulwisa Paradiso ina nkento yo yakala diantete bavidisa. Muna nkand’a Lusengomono tutanganga vo: ‘[Yave wa Nzambi] okunguna mansanga mawonso muna meso mau; o lufwa, ke lukala diaka ko; musungula kala diaka dilu, yovo kazu, ngatu mpasi: Oma mantete maviokele.’ (Lusengomono 21:4) Aweyi Nzambi ketwasila nsambu zazi ye aweyi tulenda vwila nluta wa nsilu wau?

Yesu wa Mwan’a Nzambi walonga alongoki andi basambanga kimana luzolo lwa Nzambi lwavangama. Wantu ayingi batomene zaya ye bevutukilanga sambu kiaki kiyikilwanga mpe vo Sambu kia Mfumu. E sambu kiaki kivovanga vo: “E S’eto koko’zulu, yambula nkumbu aku yazitiswa. E kintinu kiaku kiza. O luzolo luaku luavangam’ova nza nze koko’zulu.” (Matai 6:9, 10) Elo, Yave wa Nzambi osadila Kintinu kiandi muna sukisa emvimba mpasi zawonso zitukanga muna luyalu lwa wantu yo sikidisa nz’ampa eyi kasila nsilu. * (Daniele 2:44; 2 Petelo 3:13) Adieyi tufwete vanga muna vwa nluta wa nsilu a Nzambi?

Yesu Kristu wasonga dina tufwete vanga: “I wau wuwu o moyo a mvu ya mvu, bazaya ngeye vo i Nzambi aludi, yo Yesu Kristu mpe ona watuma.” (Yoane 17:3) Muna lusadisu lwa Nzambi tulenda zinga yakwele mvu muna nz’ampa yasilwa nsilu. Nga nsilu wau ke usonganga ko vo Nzambi kikilu tuvwidi o mfunu?

Paulu wa ntumwa wavova mu kuma kia Nzambi kwa esi Atenai muna Arèopàgo vioka mafunda mole ma mvu vo: “Muna yandi i tunin’o moyo, yo kiya, yo kala; wauna bavovele ezaka ntozi zeno za nkunga, ovo, kadi oyeto mpe tu wutwa yandi.”—Mavangu 17:25, 28.

Mana Paulu kavovesa esi Atenai makinu maludi yamu unu. Mvangi eto okutuvananga fulumwinu, madia ye maza tunuanga. Katulendi zinga ko kondwa kwa lekwa yayi yambote kekutuvananga o Yave kimana twakala moyo. Ekuma Nzambi kevaninanga lekwa yayi kwa wantu awonso kana una vo akaka ke bekumvwanga mfunu ko? Paulu wavova vo: “Bavava Nzambi, benkwa kumbabata bansolola, kufwil’owu kavavukidi muna konso muntu vava twina ko.”—Mavangu 17:27.

Nga ozolele zaya Nzambi una ufwene, i sia vo, zaya mayingi mu kuma kia makani mandi, luludiku lwandi, zingu kiambote owau yo zinga yakwele mvu? Avo i wau, lomba kwa muntu utwasidi nkanda wau yovo sonekena asoneki a nkanda wau. Bekala ye kiese kia kusadisa.